ភ្នំពេញៈ វិទ្យាស្ថានស្រាវជ្រាវ និងនវានុវត្តន៍ឌីជីថល (IDRI) នៃបណ្ឌិត្យសភាបច្ចេកវិទ្យាឌីជីថលកម្ពុជា (CADT) និង អង្គការ GIZ ICONE បានចុះកិច្ចព្រមព្រៀងមួយ ដើម្បីបង្កើនបរិវត្តកម្មឌីជីថល (Digital Transformation) ក្រៅតែផ្តោតលើរាជធានីភ្នំពេញទៅកាន់បណ្ដាខេត្តភាគពាយព្យរបស់កម្ពុជា។
កិច្ចព្រមព្រៀងដែលត្រូវបានចុះហត្ថលេខាកាលពីថ្ងៃទី ៥ ខែមេសា ឆ្នាំ ២០២២ រវាងលោកបណ្ឌិត Stefan Hanselmann នាយក GIZ ICONE និងលោក សំ សេដ្ឋសេរី នាយកវិទ្យាស្ថានស្រាវជ្រាវ និងនវានុវត្តន៍ឌីជីថល (IDRI) នៃ CADT។
ស្ថិតក្រោមកិច្ចព្រមព្រៀងនេះនឹងគាំទ្រដល់សហគ្រាសនៅភាគពាយព្យរបស់កម្ពុជា ជាពិសេសនៅខេត្តសៀមរាប បាត់ដំបង និងបន្ទាយមានជ័យ ដើម្បីបង្កើនផលិតភាព និងជំរុញដំណើរការឌីជីថលរបស់ខេត្តទាំងនោះ។
កិច្ចសហប្រតិបត្តិការនេះរួមមានការដាក់ឱ្យប្រើប្រាស់កម្មវិធីឌីជីថល និងដំណោះស្រាយ ការបណ្តុះបណ្តាលជំនាញឌីជីថល និងព្រឹត្តិការណ៍ផ្លាស់ប្តូរចំណេះដឹងនៅរាជធានីភ្នំពេញ សៀមរាប បាត់ដំបង និងបន្ទាយមានជ័យ។
លើសពីនេះ កិច្ចសហប្រតិបត្តិការរវាង GIZ ICONE និង IDRI នឹងលើកកម្ពស់នវានុវត្តន៍ ដែលជំរុញដោយទិន្នន័យក្នុងឧស្សាហកម្មកែច្នៃ និងផលិតកម្ម ដើម្បីបង្កើតបរិយាកាសដែលអាចនឹងគាំទ្រដល់ដំណើររបស់កម្ពុជាឆ្ពោះទៅរកសេដ្ឋកិច្ចទំនើប និងពិពិធកម្ម ដោយប្រើប្រាស់ដំណោះស្រាយបដិវត្តន៍ឧស្សាហកម្មជំនាន់ទី ៤។
លោក Stefan Hanselmann ចង្អុលបង្ហាញថា គម្លាតឌីជីថលរវាងទីក្រុងភ្នំពេញ និងបណ្ដាខេត្តដែលកំពុងវិវឌ្ឍន៍សេដ្ឋកិច្ច គឺជាកត្តាសំខាន់បំផុតសម្រាប់ចក្ខុវិស័យរយៈពេលវែងរបស់កម្ពុជាក្នុងការក្លាយជាសេដ្ឋកិច្ចដែលមានភាពធន់។
លោកបានថ្លែងថា៖ «ការណ៍នេះរួមបញ្ចូលទាំងការជំរុញឱ្យមានការបង្រួមគម្លាតយេនឌ័រឌីជីថល និងការពង្រឹងសិទ្ធិអំណាចអាជីវកម្មដែលដំណើរការដោយស្ត្រី»។
លោកបន្ថែមថា ការដែលមានការិយាល័យរបស់ពួកគេនៅតាមខេត្ត និង CADT មានមជ្ឈមណ្ឌលនវានុវត្តន៍របស់ពួកគេនៅរាជធានីភ្នំពេញ កិច្ចសហប្រតិបត្តិការនេះត្រូវបានបង្កើតឡើង ដើម្បីភ្ជិតគម្លាតឌីជីថលតាមរយៈការសាងសង់ស្ពាន។
លោក សុភាព សេង ប្រធាន CADT មានឱ្យដឹងថា វាជាពេលវេលាដ៏ត្រឹមត្រូវក្នុងការពង្រីកសកម្មភាព CADTs ទៅតាមបណ្ដាខេត្តជាច្រើនទៀត និងនាំយកដំណោះស្រាយឌីជីថល និងភាពប៉ិនប្រសប់ដល់ក្រុមហ៊ុននៅក្រៅរាជធានីភ្នំពេញ។
លោកបានថ្លែងថា៖ «កិច្ចសហប្រតិបត្តិការក្នុងចំណោមតួអង្គទាំងអស់នៅក្នុងប្រព័ន្ធអេកូឡូស៊ីគឺចាំបាច់ដើម្បីជំរុញដំណោះស្រាយបច្ចេកវិទ្យារបស់កម្ពុជាដែលបានអភិវឌ្ឍសម្រាប់ និងដោយប្រជាជនកម្ពុជា ដើម្បីធ្វើឱ្យជីវិត ការអប់រំ និងអាជីវកម្មកាន់តែប្រសើរឡើង ក្រៅពីទីក្រុងភ្នំពេញ»។
កាលពីដើមខែកុម្ភៈ រដ្ឋាភិបាលបានដាក់ចេញគោលនយោបាយរដ្ឋាភិបាលឌីជីថលកម្ពុជាឆ្នាំ ២០២២-២០៣៥ ក្នុងគោលបំណង ដើម្បីបង្កើតរដ្ឋាភិបាលមួយ ដែលគាំទ្រដោយហេដ្ឋារចនាសម្ព័ន្ធឌីជីថល និងបច្ចេកវិទ្យាដែលធ្វើទំនើបកម្មរចនាសម្ព័ន្ធអភិបាលកិច្ច និងត្រួសត្រាយផ្លូវសម្រាប់កំណែទម្រង់លើគ្រប់វិស័យ៕LA