ភ្នំពេញៈ គម្រោងកសាងរោងចក្រផ្គត់ផ្គង់ទឹកស្អាតបាក់ខែងដែលមានតម្លៃជាង ១៨៦,៤ លានដុល្លារ និងជារោងចក្រប្រព្រឹត្តិកម្មទឹកស្អាតធំជាងគេនៅកម្ពុជា នៅពេលនេះសម្រេចការសាងសង់បានប្រមាណ ៦០ ភាគរយ ហើយដោយរោងចក្រនេះអាចបង្កើនសមត្ថភាពផលិតទឹកស្អាតក្នុងរាជធានី-ភ្នំពេញបាន ៦៥ ភាគរយ។ តាមផែនការរោងចក្រនេះនឹងដាក់ឱ្យដំណើរការនៅត្រីមាសទី ១ ឆ្នាំ ២០២៣ ខាងមុខ។
លទ្ធផលនេះត្រូវបានបង្ហាញក្នុងអំឡុងដំណើរទស្សនកិច្ចរបស់ក្រុមមន្ត្រីរដ្ឋាករទឹកស្វយ័តក្រុងភ្នំពេញ, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងសេដ្ឋកិច្ច និងហិរញ្ញវត្ថុ, ទីភ្នាក់ងារអភិវឌ្ឍន៍បារាំង (AFD), ធនាគារវិនិយោគអឺរ៉ុប (EI-B) និងសហភាពអឺរ៉ុប ( EU) នៅការដ្ឋានសំណង់កាលពីថ្ងៃទី ៤ ខែមេសា។
គម្រោងផ្គត់ផ្គង់ទឹកស្អាតបាក់ខែង គឺជាគម្រោងហេដ្ឋារចនាសម្ព័ន្ធដ៏សំខាន់ដែលបានកំណត់ក្នុងផែនការមេទី ៣ ឆ្នាំ ២០១៦-២០៣០ របស់រដ្ឋាករទឹកស្វយ័តភ្នំពេញ (PPWSA)។ សមត្ថភាពផលិតសរុបរបស់រោងចក្រនេះមាន ៣៩០ ០០០ ម៉ែត្រគុបក្នុង ១ ថ្ងៃដែលសង់ជា ២ ដំណាក់កាល។
សមត្ថភាពនេះនឹងគ្រប់គ្រាន់ដើម្បីឆ្លើយតបនឹងការខ្វះខាតទឹកស្អាតក្នុងរាជធានីភ្នំពេញនាពេលបច្ចុប្បន្ន ដែលត្រូវបានប៉ាន់ប្រមាណថា មានចំនួន ២០០ ០០០ ម៉ែត្រគុបក្នុង ១ ថ្ងៃនៅអំឡុងរដូវប្រាំង។ រយៈពេលត្រឹម ១ ឆ្នាំបន្ទាប់ពីពិធីបើកការដ្ឋានសាងសង់ក្រោមអធិបតីភាពលោកនាយករដ្ឋមន្ត្រីកម្ពុជាដំណាក់កាលទី ១ នៃគម្រោងសម្រេចបាន ៦០ ភាគរយហើយគ្រោងនឹងដាក់ឱ្យដំណើរការនៅត្រីមាសទី ១ ឆ្នាំ ២០២៣។ សមត្ថភាពពេញលេញនឹងសម្រេចបាននៅរយៈពេល ១ ឆ្នាំបន្ទាប់ពីការបញ្ចប់ដំណាក់កាលទី ២។
គម្រោងនេះត្រូវបានផ្តល់ហិរញ្ញប្បទានដោយប្រាក់កម្ចីចំនួន ២ ដែលមានតម្លៃ ១៨៦,៤ លានដុល្លារពីទីភ្នាក់ងារអភិវឌ្ឍន៍បារាំង (AFD) កម្ចី ១០០ លានដុល្លារបានពីធនាគារវិនិយោគអឺរ៉ុប (EIB) បន្ថែមនឹងជំនួយឥតសំណង ១៤ លានដុល្លារពីសហភាពអឺរ៉ុប (EU) តាមរយៈ Asia Investment Facility និងការវិនិយោគផ្ទាល់ដោយរដ្ឋាករទឹកស្វយ័តក្រុងភ្នំពេញ ចំនួន ៨០ លានដុល្លារ។
លោក ឡុង ណារ៉ូ អគ្គនាយកក្រុមហ៊ុន PPWSA បានឱ្យដឹងថា ដោយសហការជាមួយទីភ្នាក់ងារអភិវឌ្ឍន៍បារាំង (AFD) ធនាគារវិនិយោគអឺរ៉ុប (EIB) និងដៃគូអភិវឌ្ឍន៍ផ្សេងទៀត PPWSA បានបន្តជួសជុល ស្តារនីតិសម្បទា និងអភិវឌ្ឍរោងចក្រ និងបណ្តាញផលិតទឹកស្អាតនៅកម្ពុជា។
លោកបន្តថា៖ «បន្ទាប់ពីការបញ្ចប់គម្រោងផ្គត់ផ្គង់ទឹកស្អាតបាក់ខែងក្នុងឆ្នាំ ២០២៤ សមត្ថភាពផលិតរបស់យើងនឹងកើនពី ៦០០ ០០០ ម៉ែត្រគុបក្នុង ១ ថ្ងៃដល់ ១ ០០០ ០០០ ម៉ែត្រគុបក្នុង ១ ថ្ងៃ។ ការណ៍នេះនឹងឆ្លើយតបទៅនឹងការកើនឡើងនៃតម្រូវការទឹកស្អាតក្នុងរាជធានីភ្នំពេញ និងការពង្រីកទៅទិសដៅជាច្រើនទៀត»។
លោក Kris Peeters អនុប្រធាន EIB ទទួលបន្ទុកប្រតិបត្តិការនៅកម្ពុជា បានឱ្យដឹងថា កិច្ចសហប្រតិបត្តិការរវាងរដ្ឋាភិបាលកម្ពុជា និងក្រុមអឺរ៉ុប រួមទាំងធនាគារវិនិយោគអឺរ៉ុប ធនាគារសហភាពអឺរ៉ុបលើការអនុវត្តគម្រោងបាក់ខែងគឺជាគំរូដ៏ល្អមួយអំពីរបៀបដែលប្រទេសនានាអាចធ្វើការរួមគ្នា ដើម្បីកែលម្អជីវភាពរស់នៅ និងចក្ខុវិស័យសេដ្ឋកិច្ច សង្គម និងសុខភាពសម្រាប់ប្រជាជនរបស់ពួកគេ។
លោកលើកឡើងថា៖ «ខ្ញុំជឿថា ការដាក់ឱ្យប្រើប្រាស់ EIB Global ដែលជាសាខាមួយនេះគឺជាការខិតខំប្រឹងប្រែងសម្រាប់ប្រតិបត្តិការរបស់ EIB នៅខាងក្រៅសហភាពអឺរ៉ុបនឹងអនុញ្ញាតឱ្យយើងចម្លងគម្រោងដូចជាបាក់ខែង នេះនឹងបង្កើនឥទ្ធិពលរបស់យើងនៅក្នុងបណ្ដាប្រទេសជាង ១៦០ ជុំវិញពិភពលោកដែលយើងគាំទ្រ»។
PPWSA កំពុងប្រឈមនឹងតម្រូវការទឹកដែលកើនឡើងយ៉ាងឆាប់រហ័សតាំងពីឆ្នាំ ២០១០ ដោយសារកំណើនសំណង់ និងប្រជាជន។ បន្ទាប់ពីការបង្កើនសមត្ថភាពផលិតទឹករបស់ខ្លួនទ្វេដងពីចន្លោះឆ្នាំ ២០១២-២០១៧ នៅពេលនេះ PPWSA មានគោលបំណងរក្សាការផ្ដល់សេវាតម្រូវការទឹកស្អាតរបស់ខ្លួន និងពង្រីកតំបន់សេវាកម្មរបស់ខ្លួនដល់ ១០០ ភាគរយនៅទីក្រុងត្រឹមឆ្នាំ ២០២៥ ដោយមានការគាំទ្ររួមគ្នាពីទីភ្នាក់ងារអភិវឌ្ឍន៍បារាំង ធនាគារវិនិយោគអឺរ៉ុប និងសហភាពអឺរ៉ុប៕ LA
វីដេអូ៖