.jpg)
ទីក្រុងកូឡុំបូៈ ប្រធានសភាបានព្រមានកាលពីថ្ងៃពុធថា វិបត្តិសេដ្ឋកិច្ចដែលជាប់គាំងរបស់ប្រទេសស្រីលង្កា បង្កហានិភ័យការអត់ឃ្លាននៅទូទាំងប្រទេសដីកោះមួយនេះដែលមានប្រជាជនចំនួន ២២ លាននាក់ ខណៈដែលកង្វះខាតយ៉ាងខ្លាំង និងការដាច់ចរន្តអគ្គិសនីនឹងកាន់តែអាក្រក់ទៅៗ។
ការផ្គត់ផ្គង់ស្បៀងអាហារ និងប្រេងឥន្ធនៈដែលខ្វះខាតរួមជាមួយនឹងអតិផរណាកើនឡើងខ្ពស់បំផុតមិនធ្លាប់មាន និងការដាច់ចរន្តអគ្គិសនីបានបណ្ដាលឱ្យមានការលំបាកវេទនាកាន់តែខ្លាំងដោយសារតែការធ្លាក់ចុះដែលរងផលប៉ះពាល់ខ្លាំងបំផុតរបស់ប្រទេសនេះចាប់តាំងពីទទួលបានឯករាជ្យពីចក្រភពអង់គ្លេសកាលពីឆ្នាំ ១៩៤៨។
ការខឹងសម្បាជាសាធារណៈកំពុងតែក្តៅគគុកដោយមានហ្វូងមនុស្សព្យាយាមសម្រុកចូលផ្ទះរបស់ឥស្សរជនរដ្ឋាភិបាលមួយចំនួន រួមទាំងលោកប្រធានាធិបតី Gotabaya Rajapaksa និងបាតុកម្មទ្រង់ទ្រាយធំនៅតាមកន្លែងផ្សេងទៀត។
លោក Mahinda YapaAbeywardana បានប្រាប់សមាជិកសភាថា ការលំបាកកាន់តែខ្លាំងនឹងកើតឡើង។
លោក Abeywardana បានឱ្យដឹងនៅពេលចាប់ផ្តើមការពិភាក្សារយៈពេល ២ ថ្ងៃស្តីពីបញ្ហាសេដ្ឋកិច្ចដែលកាន់តែអាក្រក់ទៅៗថា៖ «យើងត្រូវបានគេប្រាប់ថានេះគឺជាវិបត្តិដ៏អាក្រក់បំផុត ប៉ុន្តែខ្ញុំគិតថា ការណ៍នេះទើបតែចាប់ផ្តើមប៉ុណ្ណោះ»។
លោកថ្លែងថា៖ «ការខ្វះខាតស្បៀងអាហារ ឧស្ម័ន និងកង្វះអគ្គិសនីនឹងកាន់តែអាក្រក់ទៅ...នឹងមានការខ្វះខាតស្បៀងយ៉ាងធ្ងន់ធ្ងរ និងការអត់ឃ្លាន»។
កងកម្លាំងសន្តិសុខបានបំបែកការហ្វូងក្រុមតវ៉ាប្រឆាំង ដោយប្រើឧស្ម័នបង្ហូរទឹកភ្នែក កាណុងបាញ់ទឹក និងគ្រាប់កៅស៊ូ ប៉ុន្តែការដាក់ប្រទេសក្នុងភាពអាសន្នដោយប្រធានាធិបតីកាលពីសប្តាហ៍មុន ដើម្បីបង្ក្រាបបាតុកម្មត្រូវបានលុបចោលកាលពីពាក់កណ្តាលអធ្រាត្រ។
មនុស្សជាង ៦០ នាក់ត្រូវបានចាប់ខ្លួនជាប់ពាក់ព័ន្ធនឹងភាពចលាចល ហើយមនុស្សជាច្រើនបានឱ្យដឹងថា ពួកគេត្រូវបានគេធ្វើទារុណកម្មនៅក្នុងមន្ទីរឃុំឃាំងរបស់ប៉ូលិស។
ក្រុមសមាជិកសភាបានជំរុញឱ្យមានការពិភាក្សាមួយលើក្រឹត្យគ្រាអាសន្នក្នុងអំឡុងសម័យប្រជុំសភានៅសប្តាហ៍នេះ ដែលរដ្ឋាភិបាលបានបាត់បង់មតិភាគច្រើន បន្ទាប់ពីការបោះបង់ចោលសម្ព័ន្ធមិត្តនយោបាយ ដែលភាគច្រើននៃពួកគេបានអំពាវនាវឱ្យប្រធានាធិបតី លោក Rajapaksa ចុះចេញពីតំណែង។
គណបក្សប្រឆាំងបានច្រានចោលការទំនាក់ទំនងរបស់លោកប្រធានាធិបតីរួចហើយ ដើម្បីបង្កើតរដ្ឋបាលបង្រួបបង្រួមមួយ បន្ទាប់ពីការលាលែងតំណែងរបស់គណៈរដ្ឋមន្ត្រីស្ទើរតែទាំងអស់កាលពីល្ងាចថ្ងៃអាទិត្យ។
ប៉ុន្តែរហូតមកដល់ពេលនេះ មិនទាន់មានសញ្ញាច្បាស់លាស់ណាមួយដែលថាសមាជិកសភាបក្សប្រឆាំងនឹងដាក់ញ្ញត្តិដកសេចក្ដីទុកចិត្ត ដើម្បីផ្តួលរំលំរដ្ឋបាលរបស់លោកប្រធានាធិបតី Rajapaksa នោះទេ។
កង្វះរូបិយប័ណ្ណបរទេសយ៉ាងខ្លាំងបានធ្វើឱ្យប្រទេសស្រីលង្កាជួបការលំបាកក្នុងការនាំចូលទំនិញសំខាន់ៗ ដោយការរីករាលដាលជំងឺកូវីដ ១៩ ដែលបានបំផ្លាញប្រាក់ចំណូលសំខាន់ៗបានពីវិស័យទេសចរណ៍ និងការផ្ទេប្រាក់ពីក្រៅប្រទេសចូលមកក្នុងប្រទេសវិញសម្រាប់ជាទុន ដើម្បីទូទាត់ទំនិញអន្តរជាតិសម្រាប់បំពេញសេចក្តីត្រូវការក្នុងប្រទេស។
ទីភ្នាក់ងារវាយតម្លៃបានព្រមានអំពីការខកខានសងបំណុលបរទេសដែលអាចកើតឡើងចំនួន ៥១ ពាន់លានដុល្លាររបស់ប្រទេសស្រីលង្កា ហើយអាជ្ញាធរមិនអាចបង្កើនប្រាក់កម្ចីពាណិជ្ជកម្មបន្ថែមទៀតបានទេ ដោយសារតែការទម្លាក់ចំណាត់ថ្នាក់ឥណទាន។
ក្រុមសេដ្ឋវិទូ បានឱ្យដឹងថា វិបត្តិនេះកាន់តែធ្ងន់ធ្ងរឡើងដោយសារការគ្រប់គ្រងមិនត្រឹមត្រូវរបស់រដ្ឋាភិបាល ការខ្ចីប្រាក់ដែលកើនឡើងរយៈពេលជាច្រើនឆ្នាំ និងការកាត់បន្ថយពន្ធដែលមិនសមហេតុផលក្នុងពេលកន្លងមក៕ LA
វីដេអូ៖
