.jpg)
ប្រធានាធិបតីរុស្ស៊ី និងបេឡារុសក្នុងជំនួបកន្លងមក។ AFP
ទីក្រុងឡុងដ៍ៈ ធនាគារអភិវឌ្ឍន៍អឺរ៉ុបបានប្រកាសអំពីការផ្អាកជាបន្ទាន់នូវលទ្ធភាពទទួលបានហិរញ្ញប្បទាន និងជំនាញសម្រាប់ទាំងប្រទេសរុស្ស៊ី និងប្រទេសបេឡារុសដោយសារតែការលុកលុយចូលប្រទេសអ៊ុយក្រែនពីសំណាក់រុស្ស៊ី។
ធនាគារមួយនេះបានឱ្យដឹងនៅក្នុងសេចក្តីប្រកាសព័ត៌មានមួយថា៖ «ធនាគារអឺរ៉ុបសម្រាប់ការកសាងឡើងវិញ និងការអភិវឌ្ឍ (EBRD) កំពុងឆ្ពោះទៅមុខជាមួយនឹងផែនការរបស់ខ្លួន ដើម្បីដកសហព័ន្ធរុស្ស៊ី និងបេឡារុសមិនឱ្យទទួលបានមូលនិធិសម្រាប់គម្រោងនានា»។
ធនាគារនេះបន្តថា៖ «ក្រុមប្រឹក្សាភិបាលធនាគារ EBRD បានយល់ព្រមចាត់វិធានការយ៉ាងម៉ឺងម៉ាត់ប្រឆាំងនឹងសហព័ន្ធរុស្ស៊ី និងប្រទេសបេឡារុស បន្ទាប់ពីមានការលុកលុយចូលប្រទេសអ៊ុយក្រែន»។
«លទ្ធភាពទទួលបានដោយសហព័ន្ធរុស្ស៊ី និងបេឡារុស ចំពោះធនធានរបស់ធនាគារមួយនេះនឹងត្រូវផ្អាកជាផ្លូវការដោយមានប្រសិទ្ធភាពភ្លាម»។ នេះបើយោងតាមសេចក្តីថ្លែងការណ៍ធនាគារមួយនេះ។
ធនាគារ EBRD រក្សាសិទ្ធិក្នុងការផ្អាក ឬលុបចោលរាល់ការទូទាត់បន្ថែមសម្រាប់គម្រោងវិនិយោគដែលមានស្រាប់។
គម្រោងទាំងនោះមានតម្លៃប្រហែល ១,៥ ពាន់លានអឺរ៉ូ (១,៧ ពាន់លានដុល្លារ) នៅក្នុងប្រទេសទាំង ២។ នេះបើយោងតាមប្រភពដែលដឹងពីបញ្ហានេះ។
ស្ថាប័នហិរញ្ញវត្ថុដែលបានថ្កោលទោសម្តងហើយម្តងទៀតចំពោះការលុកលុយរបស់រុស្ស៊ីលើអ៊ុយក្រែនបានប្រកាសរួចហើយកាលពីខែមុនថាខ្លួននឹងបិទការិយាល័យនៅទីក្រុងម៉ូស្គូ និងទីក្រុងមីនស្កិ៍ក្នុងបេឡារុស។
លោក Odile Renaud-Basso ប្រធានធនាគារ EBRD បានថ្លែងថា៖ «វាជារឿងគួរឱ្យសោកស្តាយដែលយើងបានមកដល់ចំណុចនេះ បន្ទាប់ពីកិច្ចសហប្រតិបត្តិការ និងសកម្មភាពជាច្រើនឆ្នាំនៅក្នុងប្រទេសទាំង ២»។
លោកលើកឡើងថា៖ «ទោះជាយ៉ាងណាក៏ដោយ សង្គ្រាមដែលដឹកនាំដោយប្រទេសរុស្ស៊ីលើអ៊ុយក្រែន បានធ្វើឱ្យយើងគ្មានជម្រើសអ្វីក្រៅពីបង្ហាញការថ្កោលទោសរបស់យើង ឱ្យច្រើនជាងការនិយាយ។
លោកថ្លែងថា៖ «វិធានការនានាក៏ត្រូវតម្រូវឱ្យមានផងដែរ ដើម្បីឱ្យប្រទេសទាំង ២ នេះដឹងច្បាស់ថាយើងជឿថាពួកគេបានធ្វើឱ្យខូចតម្លៃដែលមានសារៈសំខាន់សម្រាប់ពួកយើង ដែលជាស្ថាប័នមួយ និងចំពោះសហគមន៍អន្តរជាតិ»។
ធនាគារ EBRD បានព្យាករកាលពីសប្តាហ៍មុនថាសេដ្ឋកិច្ចរបស់ប្រទេសរុស្ស៊ី និងអ៊ុយក្រែននឹងធ្លាក់ចុះ ១០ ភាគរយ និង ២០ ភាគរយនៅឆ្នាំនេះរៀងខ្លួន ដោយសារសង្គ្រាមបណ្តាលឱ្យមាន «វិបត្តិផ្គត់ផ្គង់ខ្លាំងបំផុត» មិនធ្លាប់មានក្នុងរយៈពេល ៥០ ឆ្នាំ។
ស្ថាប័នមួយនេះ កាលពីខែមីនាបានបង្ហាញកញ្ចប់ «ភាពធន់» តម្លៃ ២ ពាន់លានអឺរ៉ូ ដើម្បីជួយប្រជាពលរដ្ឋ ក្រុមហ៊ុន និងបណ្ដាប្រទេសដែលរងផលប៉ះពាល់ដោយសារសង្គ្រាមនៅប្រទេសអ៊ុយក្រែន រួមទាំងបណ្ដាប្រទេសដែលទទួលយកជនភៀសខ្លួនផងដែរ។
ធនាគារដែលមានមូលដ្ឋាននៅទីក្រុងឡុងដ៍ដែលវិនិយោគរួមជាមួយវិស័យឯកជនមិនបានអនុវត្តគម្រោងវិនិយោគថ្មីណាមួយនៅក្នុងប្រទេសរុស្ស៊ីនោះទេចាប់តាំងពីឆ្នាំ ២០១៤ ពេលទីក្រុងម៉ូស្គូបានចូលលុកលុយហើយបន្ទាប់មកបានដាក់បញ្ចូលឧបទ្វីបគ្រីមៀ ក្រោមការគ្រប់គ្រងរបស់ខ្លួន៕ LA
