.jpg)
កន្លែងស្នាក់នៅតាមបណ្តាខេត្តគោលដៅទេសចរណ៍ជាងពាក់កណ្តាល ត្រូវបានភ្ញៀវកក់នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ។ ហុង មិនា
ភ្នំពេញៈ គិតត្រឹមថ្ងៃទី ៧ ខែមេសា ឆ្នាំ ២០២២ សណ្ឋាគារ ផ្ទះសំណាក់ និងកន្លែងស្នាក់នៅតាមបណ្តាខេត្តគោលដៅទេសចរណ៍នានាត្រូវបានភ្ញៀវកក់លើសពី ៥០ ភាគរយសម្រាប់ដំណើរកម្សាន្តរបស់ពួកគេនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរនាថ្ងៃទី ១៤-១៥-១៦ ខែមេសា ឆ្នាំ ២០២២ ខណៈតម្លៃកន្លែងស្នាក់នៅតាមគោលដៅទេសចរណ៍មួយចំនួនបានឡើងថ្លៃរួចទៅហើយ។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានប្រាប់ភ្នំពេញប៉ុស្តិ៍ ក្នុងថ្ងៃទី ៧ ខែមេសា ថា គិតត្រឹមថ្ងៃនេះ (ថ្ងៃទី ៧) ភ្ញៀវទេសចរបានកក់សណ្ឋាគារ និងផ្ទះសំណាក់ក្នុងខេត្តសៀមរាប ចន្លោះពី ៦០-៧០ ភាគរយហើយសម្រាប់ការស្នាក់នៅនាឱកាសពិធីបុណ្យចូលឆ្នាំប្រពៃណីជាតិខាងមុខ ខណៈខេត្តសៀមរាបក៏នឹងមានរៀបចំពិធីសង្ក្រាន្តឆ្នាំថ្មី រួមជាមួយផ្លូវក៏ទើបតែសម្ពោធទាំង ៣៨ ខ្សែផងដែរ។ លោកបន្តថា ក្រៅពីនេះខេត្តក៏មានកម្មវិធីកម្សាន្តជាច្រើនដែលត្រូវបានរៀបចំក្នុងក្រុងសៀមរាប តំបន់អង្គរ និងតំបន់ផ្សេងៗទៀត។ ដូច្នេះបានជាភ្ញៀវចាប់អារម្មណ៍មកកម្សាន្តច្រើន ជាពិសេសតំបន់ផាប់ស្ទ្រីតមានការទាក់ទាញចំណាប់អារម្មណ៍ភ្ញៀវទេសចរច្រើន។
បើតាមលោក សេងកាក់ តម្លៃស្នាក់នៅអាស្រ័យទៅលើភ្ញៀវ ព្រោះធម្មតាថ្ងៃមិនមានបុណ្យទាន ពួកគាត់គេង ២ នាក់ក្នុង ១ បន្ទប់មិនមានការឡើងថ្លៃទេ ប៉ុន្តែនៅពេលបុណ្យទានពួកគាត់គេង ៤ នាក់ក្នុង ១ បន្ទប់ដែលអាចឡើងថ្លៃប្រមាណ ១០ ដុល្លារ ឬច្រើនជាងនេះ។
លោកថ្លែងថា៖ «ជារួមរាល់ពេលបុណ្យទាន សណ្ឋាគារ ផ្ទះសំណាក់យើងមិនបារម្ភទេ ដោយសារនៅសៀមរាបយើងមានបន្ទប់ច្រើនណាស់។ ការឡើងថ្លៃ ឬមិនឡើងថ្លៃអាស្រ័យលើភ្ញៀវចូលទៅស្នាក់នៅ និងការចរចាគ្នា»។
លោក នាង វណ្ណៈ អ្នកនាំពាក្យរដ្ឋបាលខេត្តមណ្ឌលគិរីបានប្រាប់ថា លោកមិនទាន់មានតួលេខភ្ញៀវកក់សណ្ឋាគារ ឬ ផ្ទះសំណាក់ក្នុងខេត្តនៅឡើយទេ ប៉ុន្តែជាបទពិសោធនៅរៀងរាល់ពិធីបុណ្យម្តងៗ ទាំងផ្ទះសំណាក់ និងសណ្ឋាគារត្រូវបានកក់ និងស្នាក់នៅពេញៗ។
លោកបន្តថា ជាមួយគ្នានេះតម្លៃនៃការស្នាក់នៅក៏មានការដំឡើងខ្លះដែរ ដោយអាស្រ័យទៅលើម្ចាស់សណ្ឋាគារ និងផ្ទះសំណាក់ ព្រោះក្នុងខេត្តមានសណ្ឋាគារ និងផ្ទះសំណាក់តិចតួចនៅឡើយ។ ទោះយ៉ាងណា រដ្ឋបាលខេត្តតែងជំរុញឱ្យម្ចាស់សណ្ឋាគារ ឬម្ចាស់ផ្ទះសំណាក់មិនឱ្យដំឡើងថ្លៃ ប៉ុន្តែវាជាទីផ្សារសេរីមិនអាចហាមបានទេ។
លោកនិយាយថា៖ «យើងបានឱ្យមន្ទីរទេសចរណ៍ខេត្តចុះណែនាំដល់មូលដ្ឋានអាជីវកម្មទេសចរណ៍កុំឱ្យឡើងថ្លៃនៅក្នុងពេលបុណ្យទានម្តងៗ ប៉ុន្តែពេលបុណ្យទានវាជាឱកាសពួកគេឡើងថ្លៃ»។
ប្រធានមន្ទីរទេសចរណ៍ខេត្តកែបលោក សោម ចិន្តា បានប្រាប់ដែរថា សណ្ឋាគារ ផ្ទះសំណាក់ និងកន្លែងស្នាក់នៅក្នុងខេត្តរហូតមកទល់ពលនេះ ត្រូវបានកក់អស់ប្រមាណ ៧០ ទៅ ៨០ ភាគរយហើយ ដោយសារឆ្នាំនេះរាជរដ្ឋាភិបាលបានបើកប្រទេសឡើងវិញ និងអនុញ្ញាតឱ្យធ្វើដំណើរកម្សាន្តនៅតាមរមណីយដ្ឋាននានាឡើងវិញ។
ទោះយ៉ាងណា លោកប្រាប់ថា តម្លៃសម្រាប់សណ្ឋាគារ ផ្ទះសំណាក់ និងកន្លែងស្នាក់នៅមួយចំនួនបានឡើងប្រមាណ ១០ ភាគរយ សម្រាប់ពិធីបុណ្យចូលឆ្នាំខ្មែរប្រពៃណីជាតិខាងមុខនេះ។ ប៉ុន្តែអ្វីដែលគួរឱ្យកត់-សម្គាល់ គឺមូលដ្ឋានអាជីវកម្មទេសចរណ៍នៅក្នុងខេត្តទាំងអស់បានបើកដំណើរឡើងវិញ ដើម្បីត្រៀមទទួលភ្ញៀវទេសចរដែលត្រៀមមកលេងកម្សាន្តនៅក្នុងខេត្ត។
លោកថ្លែងថា៖ «និន្នាការនៃការដើរកម្សាន្តរបស់ទេសចរផ្ទៃក្នុង គឺតំបន់ឆ្នេរផ្សារភ្ជាប់កំពត និងខេត្តព្រះសីហនុ។ ដូច្នេះភ្ញៀវគាត់មក ១ ខ្សែតែម្តង»។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុនិយាយថា សម្រាប់កន្លែងស្នាក់នៅលើកោះនានាត្រូវបានកក់ស្ទើរអស់ហើយ។ ចំណែកកន្លែងស្នាក់នៅតាមសណ្ឋាគារ និងផ្ទះសំណាក់នៅក្នុងក្រុងព្រះសីហនុ ទទួលបានការកក់ទុកក្នុងរង្វង់ ៥០ ទៅ ៦០ ភាគរយហើយ។
លោកថ្លែងថា៖ «ជាធម្មតាក្នុងពិធីបុណ្យទានប្រជាពលរដ្ឋ និងមន្ត្រីរាជការឈប់សម្រាក ហើយខេត្តព្រះសីហនុ គឺជាតំបន់ឆ្នេរមួយដ៏សំខាន់ និងទាក់ទាញភ្ញៀវទេសចរច្រើនឱ្យមកលេងកម្សាន្តទាំងនៅលើកោះ ឆ្នេរ ពិសេសទីក្រុងមានហេដ្ឋារចនាសម្ព័ន្ធស្អាត»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានលើកឡើងថា ដោយពិធីបុណ្យចូលឆ្នាំថ្មីជិតចូលមកដល់ ដូច្នេះប្រជាជនក៏បានកក់សណ្ឋាគារ ផ្ទះសំណាក់ និងរមណីយដ្ឋានឯកជនជាបណ្ដើរៗហើយដែរតាមបណ្ដាខេត្តផ្សេងៗដូចជា នៅខេត្តជាប់តំបន់ឆ្នេរក៏មានការកក់សឹងតែពេញហើយនៅប៉ែកឦសាន និងខេត្តសៀមរាប ក៏មានការកក់ច្រើនផងដែរ៕ LA
វីដេអូ៖
