.jpg)
ការលើកដាក់ទំនិញនៅកំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ ពាណិជ្ជកម្មទ្វេភាគីកម្ពុជា និងចក្រភពអង់គ្លេសក្នុងរយៈពេល ២ ខែ ដើមឆ្នាំ ២០២២ មានទឹកប្រាក់ជាង ១៤១ លានដុល្លារកើន ១៤ ភាគរយបើធៀបរយៈពេលដូចគ្នាឆ្នាំ ២០២១។ នេះបើយោងតាមទិន្នន័យអគ្គនាយកដ្ឋានគយ និងរដ្ឋាករកម្ពុជា។
ទិន្នន័យ (បណ្តោះអាសន្ន) របស់អគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា នៅក្នុងខែមករា និងខែកុម្ភៈ ឆ្នាំ ២០២២ ការផ្លាស់ប្តូរទំនិញរវាងកម្ពុជា និងចក្រភពអង់គ្លេសមានទឹកប្រាក់សរុប ១៤១,៧៤ លាន កើន ១៤,៣ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលមានទឹកប្រាក់ចំនួន ១២៣,៩៥ លានដុល្លារ។ ក្នុងនោះការនាំទំនិញចេញពីកម្ពុជាទៅចក្រភពអង់គ្លេសមានទឹកប្រាក់ ១៣១,៥៦ លានដុល្លារ កើនឡើង ១៤,៦ ភាគរយពីចំនួន ១១៤,៨១ លានដុល្លារ និងការនាំចូលទំនិញពីចក្រភពអង់គ្លេស មានទឹកប្រាក់ ១០,១៨ លានដុល្លារ កើនឡើង ១១,៤ ភាគរយពីចំនួន ៩,១៤ លានដុល្លារ។
អ្នកស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍កាលពីថ្ងៃទី ៧ ខែមេសាថា ក្រៅពីកិច្ចសហប្រតិបត្តិការល្អផ្នែកទំនាក់ទំនងការទូតចក្រភពអង់គ្លេសក៏ជាទីផ្សារធំមួយដែលតែងទទួលទិញទំនិញពីកម្ពុជាច្រើនផងដែរ ជាពិសេសផលិតផលវាយនភណ្ឌ កង់ និងផលិតផលកសិកម្មមួយចំនួនទៀត។ លោកបន្តថា ទោះបីពេលនេះចក្រភពអង់គ្លេសចាកចេញពីសហភាព-អឺរ៉ុប ប៉ុន្តែការបញ្ជាទិញទំនិញពីកម្ពុជា គឺនៅតែបន្តមានជាធម្មតា និងមានកំណើនទៀតផង។
លោកបានបន្ថែមថា ខណៈកន្លងមកសហភាពអឺរ៉ុបបានកាត់បន្ថយភាពអនុគ្រោះពន្ធ EBA ពីប្រទេសកម្ពុជា ប៉ុន្តែតាមរយៈទីផ្សារចក្រភពអង់គ្លេស គេក៏អាចនាំចេញផលិតផលមួយចំនួនពីកម្ពុជាទៅអឺរ៉ុប ដោយឆ្លងកាត់តាមចក្រភពអង់គ្លេសផងដែរ។
លោកបញ្ជាក់ថា៖ «នៅពេលមានការនាំចេញកាន់តែច្រើន វានឹងផ្តល់ផលប្រយោជន៍ជាច្រើនដល់កម្ពុជាមានដូចជា កំណើនប្រាក់ចំណូល និងការបង្កើតការងារថ្មី»។
យោងតាមអគ្គនាយកដ្ឋានគយ និងរដ្ឋាករកម្ពុជា ចក្រភពអង់គ្លេស គឺជាទីផ្សារទទួលទិញទំនិញធំជាងគេទី ៨ ពីកម្ពុជាក្នុងរយៈពេលខាងលើ ដោយតាមពីក្រោយ អាមេរិក វៀតណាម ចិន ជប៉ុន ថៃ កាណាដា និងអាល្លឺម៉ង់។
ក្នុងជំនួបជាមួយលោក Jon Lambe ឯកអគ្គរាជទូតចក្រភពអង់គ្លេសប្រចាំអាស៊ាន និងលោកស្រី Tina Redshaw ឯកអគ្គរាជទូតចក្រភពអង់គ្លេសប្រចាំកម្ពុជា នៅទីស្តីការក្រសួងពាណិជ្ជកម្មកាលពីថ្ងៃទី ៥ ខែមេសា ឆ្នាំ ២០២២ លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មបានលើកឡើងថា ភាពល្អប្រសើរនៃទំនាក់ទំនងការទូតបានធ្វើឱ្យទំហំពាណិជ្ជកម្មកម្ពុជា និងចក្រភពអង់គ្លេសកើនឡើងជាបន្តបន្ទាប់។ ជាមួយគ្នានេះ លោករដ្ឋមន្ត្រីក៏បានថ្លែងអំណរគុណដល់រដ្ឋាភិបាលអង់គ្លេស ដែលផ្តល់ប្រព័ន្ធអនុគ្រោះពាណិជ្ជកម្មដល់ក្រុមប្រទេសអភិវឌ្ឍន៍តិចតួច ដែលរួមមានកម្ពុជាផងដែរ។
លោក សូរស័ក្តិ ថ្លែងថា៖ «ខ្ញុំមានជំនឿថា ការឈានទៅរកប្រក្រតីភាពថ្មី គួបផ្សំជាមួយនឹងសមិទ្ធផលចម្បងៗក្នុងវិស័យពាណិជ្ជកម្មដែលរដ្ឋាភិបាលកម្ពុជា និងក្រសួងពាណិជ្ជកម្មសម្រេចបានថ្មីៗនេះនឹងក្លាយជាកាតាលីករថ្មី ដើម្បីពង្រឹងពាណិជ្ជកម្មទ្វេភាគីឱ្យកើនឡើងវិញយ៉ាងឆាប់រហ័ស ហើយភាគីទាំង ២ នឹងបន្តពង្រីកកិច្ចសហប្រតិបត្តិការថ្មីៗបន្ថែមទៀត សំដៅសម្រេចបាននូវកាលានុវត្តភាព និងសក្តានុពលពាណិជ្ជកម្ម ធុរកិច្ច និងវិនិយោគរវាងប្រទេសទាំង ២ នាពេលអនាគត»។
ជាការឆ្លើយតប លោក Jon Lambe បានថ្លែងអំណរគុណ និងកោតសរសើរចំពោះវឌ្ឍនភាពរីកចម្រើន និងកិច្ចខិតខំរបស់រដ្ឋាភិបាលកម្ពុជាតាមរយៈក្រសួងពាណិជ្ជកម្មក្នុងការជំរុញទំនាក់ទំនងពាណិជ្ជកម្មទ្វេភាគីរវាងប្រទេសទាំង ២ ឱ្យកាន់តែប្រសើរ ដោយចក្រពអង់គ្លេសបានសន្យានឹងបង្កើនកិច្ចសហការជាមួយកម្ពុជាឱ្យបានកាន់តែខ្លាំង ដើម្បីសម្រេចបាននូវសមិទ្ធផលអាទិភាពសេដ្ឋកិច្ចដែលរាជរដ្ឋាភិបាលកម្ពុជាបានដាក់ចេញ។
ទំនិញភាគច្រើនដែលកម្ពុជានាំទៅអង់គ្លេសមានដូចជា សម្លៀកបំពាក់ ស្បែកជើង កង់ អង្ករ និងផលិតផលកសិកម្ម។ ចំណែកផលិតផលអង់គ្លេសនាំមកកម្ពុជាមានដូចជា រថយន្ត និងគ្រឿងចក្រជាដើម។
ទិន្នន័យក្រសួងពាណិជ្ជកម្មកម្ពុជាឱ្យដឹងថា កាលពីឆ្នាំ ២០២១ ការធ្វើពាណិជ្ជកម្មរវាងកម្ពុជា និងចក្រភពអង់គ្លេស មានទឹកប្រាក់សរុបជាង ៧៨៥ លានដុល្លារ ធ្លាក់ចុះជាង ១០,៤៨ ភាគរយបើធៀបទៅនឹងរយៈពេលដូចគ្នាឆ្នាំ ២០២០។
ការធ្លាក់ចុះទំហំពាណិជ្ជកម្មនេះត្រូវបានលោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម ប្រាប់ភ្នំពេញ-ប៉ុស្តិ៍ថា គឺដោយសារការរីករាលដាលនៃជំងឺកូវីដ ១៩ នៅគ្រប់ប្រទេសលើពិភពលោក និងឧបសគ្គមួយចំនួនទាក់ទងនឹងការដឹកជញ្ជូន៕ LA
