ភ្នំពេញៈ អូស្ត្រាលី​គ្រោង​នឹង​ផ្តល់​ហិរញ្ញប្បទាន​ឥត​សំណង​ថ្មី​ប្រមាណ​ ១០៧ ​លាន​ដុល្លារ​ដល់​កម្ពុជា​ សម្រាប់​រយៈពេល​ជិត​ ១០​ ឆ្នាំ ដោយ​ជំនួយ​ភាគច្រើន​នឹងត្រូវ​ផ្តោតលើ​ការអភិវឌ្ឍ​លើ​វិស័យ​កសិកម្ម និង​ការកែច្នៃ​កសិផល​។

នៅក្នុង​ជំនួប​ជាមួយ​រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ​កាលពី​ថ្ងៃទី​ ៣១ ខែមីនា លោក Pablo Kang ឯកអគ្គរាជទូត​អូស្ត្រាលី​បាន​ថ្លែងថា អូស្ត្រាលី និង​កម្ពុជា​បានចាប់ផ្តើម​ទំនាក់ទំនង​ការទូត​ជាមួយគ្នា​អស់​រយៈពេល​ ៧០ ឆ្នាំកន្លងមក ហើយ​តាមរយៈ​ទំនាក់ទំនង​ដ៏​យូរអង្វែង​នេះ អូស្ត្រាលី​នឹង​បន្ត​ពង្រឹង និង​ពង្រីក​កិច្ចសហប្រតិបត្តិ​ការ និង​បន្ត​ផ្តល់​ការគាំទ្រ​របស់ខ្លួន​នៅ​កម្ពុជា​បន្ថែមទៀត​។

លោក​បាន​បន្ថែមថា ដើម្បី​ជាការ​អបអរសាទរ​សម្រាប់​ខួប​ទី ៧០ ​ឆ្នាំ​រវាង​ប្រទេស​ទាំង ​២​ ភាគី​អូស្ត្រាលី តាមរយៈ​មូលនិធិ Department of Foreign Affairs and Trade (DFAT) គ្រោង​នឹង​ផ្តល់​កិច្ច​សហប្រតិបត្តិការ​ហិរញ្ញប្បទាន​ឥត​សំណង​ថ្មី ក្រោម​កម្មវិធី​ភាពជា​ដៃគូ​កម្ពុជា​-​អូស្ត្រាលី សម្រាប់​ការអភិវឌ្ឍ​សេដ្ឋកិច្ច​ប្រកបដោយ​ភាពធន់​ (CAP-RED) ដែលមាន​ទឹកប្រាក់​ចំនួន​ប្រមាណ ៦៥​ លាន​ដុល្លារ​សម្រាប់​រយៈពេល​ ៥​ ឆ្នាំ​ដំបូង​គិត​ចាប់ពី​ពាក់​កណ្តាល​ឆ្នាំ ​២០២២ ដល់​ឆ្នាំ​ ២០២៧ និង​អាច​បន្ត​ផ្តល់​បន្ថែម​រហូត ៤២ លាន​ដុល្លារ សម្រាប់​រយៈពេល​បន្ថែម ៣ ​ឆ្នាំ​បន្ទាប់​ទៀត ដោយ​អាច​បន្ត​ទៅដល់​ពាក់កណ្តាល​ឆ្នាំ​ ២០៣០​។

លោក​បាន​បញ្ជាក់ថា​៖ «​កម្មវិធី CAP-RED មាន​គោលបំណង​ធំៗ​ ៣ រួមមាន ទី​ ១.​ ជួយ​ជ្រោមជ្រែង​ដល់​កម្ពុជា​ក្នុងការ​អភិវឌ្ឍ​លើ​ផ្នែក​កសិកម្ម​ដែលមាន​តម្លៃ​ខ្ពស់ និង​ចាប់ផ្តើម​លើ​វិស័យ​កែច្នៃ​កសិផល ទី​ ២.​ សហការ​ជាមួយ​រាជរដ្ឋាភិបាល​កម្ពុជា​លើ​ការងារ​ជុំវិញ​គោលនយោបាយ​ពាណិជ្ជកម្ម និង​វិនិយោគ ព្រមទាំង​អភិវឌ្ឍ​សហគ្រាស ដើម្បី​ជួយ​ជ្រោមជ្រែង​កម្ពុជា​ក្នុង​ការពង្រីក​ទីផ្សារ​របស់ខ្លួន និង​គាំទ្រ​អាជីវកម្ម​កម្ពុជា​ដើម្បី​លើកកម្ពស់​ស្តង់ដា​គុណភាព​របស់ខ្លួន ដើម្បី​អាច​នាំ​ចូលទៅ​ទីផ្សារ​នានា និង​ទី ​៣. ​បន្ត​វិនិយោគ​ដើម្បី​ពង្រីក​វិស័យ​ហេដ្ឋារចនាសម្ព័ន្ធ​ប្រកបដោយ​គុណភាព​នៅ​កម្ពុជា ជាពិសេស​ក្នុង​វិស័យ​ទឹក ថាមពល និង​ភ័ស្តុភារ​»​។

លោក​បញ្ជាក់​បន្ថែមថា អូស្ត្រាលី​នឹង​បន្ត​ខិតខំ​ពង្រឹង និង​ពង្រីក​កិច្ចសហប្រតិបត្តិការ​លើ​គ្រប់​វិស័យ​អាទិភាព​របស់​កម្ពុជា ​ជាពិសេស​នឹង​បន្ត​ជំរុញ​ការអភិវឌ្ឍ​វិស័យ​កសិកម្ម កសិឧស្សាហកម្ម និង​ប្រព័ន្ធ​គ្រប់គ្រង​ធារាសាស្ត្រ​ឱ្យ​កាន់តែ​រីកចម្រើន​បន្ថែមទៀត​។

លោក អូន ព័ន្ធមុនីរ័ត្ន រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ​បាន​លើកឡើងថា អូស្ត្រាលី​តែងតែ​ផ្តល់​ការគាំទ្រ​ដល់​កម្ពុជា​ក្នុង​ការអភិវឌ្ឍ​សង្គម​សេដ្ឋកិច្ច តាមរយៈ​កា​ផ្តល់ជំនួយ​ផ្នែក បច្ចេកទេស និង​ហិរញ្ញវត្ថុ លើ​វិស័យ​សំខាន់ៗ​ជាច្រើន ជាពិសេស វិស័យ​កសិកម្ម ហេដ្ឋារចនាសម្ព័ន្ធ អប់រំ ថាមពល ជាដើម​។

លោក​បញ្ជាក់ថា​៖ «​ហិរញ្ញប្បទាន​ឥត​សំណង​បន្ថែម​សម្រាប់​វិធី​ថ្មី​នេះ​នឹង​ជួយ​ដល់​ការអភិវឌ្ឍ វិស័យ​កសិកម្ម កសិឧស្សាហកម្ម ពាណិជ្ជកម្ម និង​វិនិយោគ​នៅ​កម្ពុជា ទោះបីជា​ពិភពលោក​កំពុងស្ថិត​ក្នុងស្ថានភាព​ប្រឈម​ទៅនឹង​ជំងឺ​កូវីដ ​១៩ ដែល​ប៉ះពាល់​ដល់​សកម្មភាព​សេដ្ឋកិច្ច ពាណិជ្ជកម្ម និង​ជីវភាព​រស់នៅ​ប្រចាំថ្ងៃ​យ៉ាងណាក្តី រាជរដ្ឋាភិបាល​កម្ពុជា​នៅតែ​ខិតខំ និង​ត្រៀមលក្ខណៈ​ជាស្រេច ក្នុងការ​ផ្តល់​កិច្ចសហការ និង​បន្ត​ការគាំទ្រ​ដល់​កិច្ចសហប្រតិបត្តិការ​នានា​បន្ថែមទៀត​រវាង​ប្រទេស​ទាំង​ ២ ដើម្បី​សម្រេច​បាន​នូវ​សមិទ្ធផល​ល្អប្រសើរ​ថ្មីៗ​បន្ថែមទៀត​»​។

លោក សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា​បាន​ប្រាប់​ភ្នំពេញ​ប៉ុស្តិ៍​ថា អូស្ត្រាលី​បាន​ជួយ​លើ​វិស័យ​ស្រូវ​អង្ករ​នេះ​ច្រើន ជាពិសេស​ជួយ​ផ្នែក​ប្រព័ន្ធ​ធារាសាស្ត្រ ការផលិត​ពូជស្រូវ​ដែលមាន​គុណភាព និង​ការអភិវឌ្ឍ​ពូជស្រូវ​។​ល​។

លោក​បាន​បន្តថា ចំពោះ​ការងារ​ជាមួយ​សហព័ន្ធ​ស្រូវ​អង្ករ​កម្ពុជា គឺ​អូស្ត្រាលី​បាន​ជួយ និង​ផ្តល់ជំនួយ​មួយចំនួន​គួរឱ្យកត់សម្គាល់​រួមមាន​ជួយ​លើ​ការងារ​អភិវឌ្ឍន៍ និង​បន្សុទ្ធ​ពូជ​ប្រភេទ​ស្រូវ​សែនក្រអូប​ជួយ​បង្កើត​ម៉ាក​វិញ្ញាតកម្ម អង្ករ «​ម្លិះ​អង្គរ​» និង​កំពុង​ជួយ​ដល់​ការបង្កើត​ម៉ាក​អង្ករ​សមូហភាព សែនក្រអូប និង​អង្ករដំណើប​ស្បៃមង្គល ដែល​នឹង​ដាក់ឱ្យ​ដំណើរការ​ជា​ផ្លូវការ​នៅពេល​ខាងមុខ​ឆាប់ៗ និង​បាន​ជួយ​ដល់​ការនាំយក​ផលិតផល​អង្ករ​ទៅ​ផ្សព្វផ្សាយ​លើ​ឆាក​អន្តរជាតិ ដូចជា​ការចូលរួម​វេទិកា​ស្រូវ​អង្ករ​ពិភពលោក ក៏ដូចជា ការចូលរួម​តាំងពិព័រណ៍​ពិភពលោក​នៅ​ទីក្រុង​ឌូបៃ​ជាដើម​។

លោក​បាន​បញ្ជាក់ថា​៖ «​យើង​បាន​ប្តូរ​ទិសដៅ​នៃ​ការនាំចេញ​របស់​យើង ដោយ​សហព័ន្ធ​បាន​ផ្តោតទៅលើ​ការនាំចេញ​អង្ករ​ដែលមាន​គុណភាព​ល្អប្រណីត​ជា​ប្រភេទ​ក្រអូប​វិញ​។ ដូចនេះ ប្រទេស​អូស្ត្រាលី​តែងតែ​ជួយ​ដល់​យើង រាប់​តាំងពី​ការដាំដុះ​ការរៀបចំ​ដីស្រែ​រហូតដល់​ការស្វែងរក​ទីផ្សារ​។ ជាក់ស្តែង​ការនាំចេញ​អង្ករ​ក្រអូប​របស់​យើង មិន​ត្រឹមតែ​ទៅ​អូស្ត្រាលី​ទេ​មាន​ទៅកាន់​ទីផ្សារ​ដទៃទៀត ដែល​បានធ្វើឱ្យ​ការនាំចេញ​អង្ករ​ក្រអូប​មាន​កំណើន​ច្រើន​»​។

ប្រទេស​អូស្ត្រាលី​ជា​ទីផ្សារ​ធំ​មួយ​ក្នុងចំណោម​ទីផ្សារ​ទាំង​ ១០ ដែល​នាំចូល​អង្ករ​ពី​កម្ពុជា ដែល​រយៈពេល ​៥​ ឆ្នាំ​ចុងក្រោយ (២០១៧-២០២១) អូស្ត្រាលី​បាន​នាំចូល​អង្ករ​ពី​កម្ពុជា​ចំនួន ៧១ ០០៥ ​តោន ប៉ុន្តែ​ឆ្នាំ​ ២០២១ មានតែ​ជាង​ ៩​ ពាន់​តោន​ប៉ុណ្ណោះ ដោយសារ​វិបត្តិ​កូវីដ​ ១៩ ពិបាក​ក្នុង​ការដឹកជញ្ជូន​៕ LA