.jpg)
ភ្ញៀវទេសចរដើរកម្សាន្តក្នុងបរិមាណប្រាសាទអង្គរ ខេត្តសៀមរាប។ ហុង មិនា
ភ្នំពេញៈ ផ្នែកឯកជននៅក្នុងវិស័យទេសចរណ៍ឱ្យដឹងថា ខ្លួនបានត្រៀមរួចហើយដើម្បីទទួលភ្ញៀវទេសចរជាតិ និងអន្តរជាតិ ដែលចេញដើរកម្សាន្តក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរនាសប្តាហ៍នេះ បន្ទាប់ពីស្ងប់ស្ងាត់ ២ ឆ្នាំដែលបណ្តាលមកពីវិបត្តិការរីករាលដាលជំងឺកូវីដ ១៩។
ការលើកឡើងនេះគឺស្របនឹងសេចក្តីជូនដំណឹងរបស់ក្រសួងទេសចរណ៍កាលពីថ្ងៃទី ៧ ខែមេសា ដែលអំពាវនាវឱ្យអ្នកក្នុងវិស័យទេសចរណ៍ចូលរួមផ្សព្វផ្សាយ និងបង្កើនភាពទាក់ទាញភ្ញៀវ ពិសេសទេសចរអន្តរជាតិឱ្យមកទស្សនាកម្ពុជាកាន់តែច្រើន។
លិខិតក្រសួងទេសចរណ៍ស្តីពី «ការអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ព.ស ២៥៦៥ គ.ស ២០២២» បានលើកឡើងថា កម្ពុជានឹងប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរចាប់ពីថ្ងៃទី ១៤-១៦ ខែមេសា ឆ្នាំ ២០២២ នៅទូទាំងប្រទេស។
បន្ថែមពីលើនេះក្រសួងទេសចរណ៍បានសរសេរថា៖ «សូមអំពាវនាវដល់សមាគមទេសចរណ៍ផ្នែករដ្ឋឯកជន និងស្ថាប័នពាក់ព័ន្ធទាំងក្នុង និងក្រៅប្រទេស សារព័ត៌មានជាតិ-អន្តរជាតិចូលរួមផ្សព្វផ្សាយ និងរៀបចំកញ្ចប់ទស្សនកិច្ចថ្មីៗបង្កើនទំនាក់ទំនងល្អ និងកិច្ចសហប្រតិបត្តិការក្នុងភាពជាដៃគូជាមួយភាគីពាក់ព័ន្ធទាំងក្នុង និងក្រៅប្រទេសសំដៅទាក់ទាញភ្ញៀវទេសចរអន្តរជាតិឱ្យមកទស្សនា កម្ពុជា៖ ព្រះរាជាណាចក្រអច្ឆរិយសុវត្ថិភាព និងផ្តល់ភាពកក់ក្តៅកាន់តែច្រើន»។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរបានប្រាប់ ភ្នំពេញ ប៉ុស្តិ៍ ក្នុងថ្ងៃទី ១០ ខែមេសាថា ចំនួនភ្ញៀវទេសចរក្នុងស្រុកចេញដើរកម្សាន្តក្នុងអំឡុងពិធីបុណ្យចូលឆ្នាំខ្មែរឆ្នាំនេះត្រូវរំពឹងថានឹងមានចំនួនច្រើន ប៉ុន្តែសម្រាប់ភ្ញៀវពីក្រៅប្រទេស គឺមិនទាន់មានចំនួនច្រើនទេ។ កំណើនភ្ញៀវចេញដើរកម្សាន្តនេះ គឺដោយសារកម្ពុជាអាចគ្រប់គ្រងការឆ្លងរាលដាលជំងឺកូវីដ ១៩ បានល្អ និងចាក់វ៉ាក់សាំងប្រឆាំងជំងឺកូវីដ ១៩ ក៏មានអត្រាខ្ពស់ផងដែរ។
លោកបន្តថា ជាក់ស្តែងក្នុងខេត្តសៀមរាបភ្ញៀវក្នុងស្រុកបានចាប់ផ្តើមកើនឡើងបណ្តើរៗហើយនាចុងសប្តាហ៍នេះ (ថ្ងៃ ៨-១០ ខែមេសា)។ សម្រាប់អំឡុងពិធីបុណ្យចូលឆ្នាំខ្មែរខាងមុខ គឺគ្រប់ផ្នែកបានត្រៀមរួចហើយជាមួយនឹងក្តីសង្ឃឹមថា គ្រប់សកម្មភាពអាជីវកម្មក្នុងវិស័យទេសចរណ៍នឹងមានភាពល្អប្រសើរឡើងវិញ បន្ទាប់ពីជាប់គាំង ២ ឆ្នាំមកនេះ។
លោកថ្លែងថា៖ «ទោះបីប្រតិបត្តិការអាជីវកម្មក្នុងវិស័យទេសចរណ៍នៅកម្ពុជាបានជាប់គាំងស្ទើរទាំងស្រុងក្នុងរយៈពេលប្រមាណ ២ ឆ្នាំដោយសារតែឥទ្ធិពលនៃជំងឺកូវីដ ១៩ ក៏ការរៀបចំរបស់វិស័យឯកជនដើម្បីងើបឈរឡើងវិញគឺមិនមានបញ្ហាទេទាំងកន្លែងស្នាក់នៅ ភោជនីយដ្ឋាន និងសេវាកម្មចម្រុះផ្សេងទៀត»។
យ៉ាងណា លោក ខៀវ ធី អះអាងថា ភាពវិជ្ជមានទាំងនេះនឹងមិនទាន់កើតមានចំពោះក្រុមហ៊ុន ឬមគ្គុទ្ទេសក៍ភាសាបរទេសនោះទេ ដោយវាត្រូវការពេលបន្ថែមទៀតក្នុងការផ្តល់ទំនុកចិត្តសម្រាប់ការធ្វើដំណើរឆ្លងប្រទេស។
បើតាមលោក ខៀវ ធី បច្ចុប្បន្នក្នុងខេត្តសៀមរាបទទួលបានភ្ញៀវទេសចរអន្តរជាតិក្នុងរង្វង់ជាមធ្យម ២០០ នាក់ក្នុង ១ ថ្ងៃ ជាមួយនឹងជើងហោះហើរប្រចាំថ្ងៃចំនួន ១ មកពីប្រទេសថៃ និង ១ មកពីសិង្ហបុរី។
ប្រធានសមាគមទេសចរណ៍អាស៊ី-ប៉ាស៊ីហ្វិកកម្ពុជា លោក ធួន ស៊ីណាន បាននិយាយថា ផ្នែកឯកជនតែងជួយផ្សព្វផ្សាយ និងចូលរួមជាប្រចាំក្នុងការត្រៀមទទួលស្វាគមន៍ភ្ញៀវទេសចរ ដើម្បីធ្វើឱ្យវិស័យនេះមានដង្ហើមឡើងវិញ។ សម្រាប់ពិធីបុណ្យចូលឆ្នាំខ្មែរខាងមុខ គឺផ្នែកឯកជនបានត្រៀមខ្លួនរួចរាល់ហើយ។ លោកបានបន្តថា ការរៀបចំហេដ្ឋារចនាសម្ព័ន្ធជាបន្តបន្ទាប់នឹងជួយឱ្យខេត្តសៀមរាបទទួលបានកំណើនភ្ញៀវទេសចរច្រើន។
លោកប្រាប់ថា៖ «ការប្រកាសបើកប្រទេស និងសេដ្ឋកិច្ចរបស់កម្ពុជានឹងជួយធ្វើឱ្យដំណើរកម្សាន្តក្នុងអំឡុងពិធីបុណ្យចូលឆ្នាំខាងមុខអាចមានចំនួនច្រើន ប៉ុន្តែចំនួននេះប្រហែលជាមិនលើសពីអំឡុងពិធីបុណ្យភ្ជុំបិណ្ឌ និងអុំទូកកន្លងមកទេ ព្រោះស្ថានភាពនៃវិបត្តិសេដ្ឋកិច្ចពិភពលោក និងការកើនឡើងនៃតម្លៃប្រេងអាចជាឧបសគ្គខ្លះសម្រាប់ការដើរកម្សាន្ត»៕ LA
