ភ្នំពេញៈ ពាណិជ្ជកម្មទ្វេភាគីកម្ពុជា-អាមេរិករយៈពេល ២ ខែដំបូងឆ្នាំ ២០២២ មានទឹកប្រាក់ជាង ១,៧ ពាន់លានដុល្លារកើនជិត ៥០ ភាគរយបើធៀបនឹងរយៈពេលដូចគ្នាឆ្នាំ ២០២១ ដោយក្នុងនោះជញ្ជីងពាណិជ្ជកម្មកម្ពុជាមានឧត្តមភាពជាង ១,៦ ពាន់លានដុល្លារ។
ទិន្នន័យពីការិយាល័យជំរឿនអាមេរិកចេញផ្សាយចុងសប្តាហ៍មុនឱ្យដឹងថាក្នុងខែមករា-កុម្ភៈ ឆ្នាំ ២០២២ ការនាំចេញ-ចូលទំនិញរវាងកម្ពុជា និងអាមេរិកមានទឹកប្រាក់សរុប ១ ៧៨០,៣ លានដុល្លារ កើនពីចំនួន ១ ១៨៧,២ លានដុល្លារ ស្មើ ៤៩,៩៥ ភាគរយបើធៀបនឹងរយៈពេលដូចគ្នាឆ្នាំ ២០២១។
សម្រាប់ទឹកប្រាក់ដែលកម្ពុជានាំចេញទៅអាមេរិកក្នុងរយៈពេលខាងលើ គឺមានចំនួន ១ ៧១៧,៥ លានដុល្លារ កើនឡើង ៥៣,៣៤ ភាគរយពីចំនួន ១ ១២០ លានដុល្លារ និងការនាំទំនិញពីអាមេរិក មានចំនួន ៦៣,៣ លានដុល្លារ ធ្លាក់ចុះ -៥,៨ ភាគរយពីចំនួន ៦៧,២ លានដុល្លារ។
បើយោងតាមតួលេខខាងលើជញ្ជីងពាណិជ្ជកម្មកម្ពុជាគឺមានឧត្តមភាពប្រមាណ ១,៦៥ ពាន់លានដុល្លារ។
អ្នកស្រាវជ្រាវសេដ្ឋកិច្ចអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ថា អាមេរិកគឺជាទីផ្សារធំដែលតែងបញ្ជាទិញទំនិញពីកម្ពុជា ដោយភាគច្រើន គឺជាសម្លៀកបំពាក់ ផលិតផលធ្វើដំណើរ និងស្បែកជើង វត្ថុធាតុដើម និងផលិតផលគ្រឿងបង្គុំមួយចំនួនទៀត។ ទីផ្សារអាមេរិកបានរួមចំណែកយ៉ាងច្រើនក្នុងការទាក់ទាញអ្នកវិនិយោគពីក្រៅប្រទេសឱ្យចូលមកបណ្តាក់ទុននៅកម្ពុជា ខណៈផលិតផលកម្ពុជាក៏ទទួលបានការលើកលែងពន្ធនាំចូលមួយចំនួនតាមរយៈប្រព័ន្ធ GSP ផងដែរ។ លោកបន្តថា កំណើនការនាំចេញនេះក៏បញ្ជាក់ពីទំនាក់ទំនងល្អផ្នែកការទូតរវាងប្រទេសទាំង ២ ផងដែរ។
លោកបានប្រាប់ភ្នំពេញប៉ុស្តិ៍ក្នុងថ្ងៃទី ១១ ខែមេសា ថា៖ «ទោះស្ថានភាពសេដ្ឋកិច្ចពិភពលោក ក៏ដូចជាការដឹកជញ្ជូន (កង្វះកុងតឺន័រ និងតម្លៃខ្ពស់) នៅមានបញ្ហាប្រឈមដែលបណ្តាលមកពីឥទ្ធិពលនៃវិបត្តិកូវីដ ១៩ ក៏ការនាំទំនិញពីកម្ពុជាទៅអាមេរិក នៅតែបង្ហាញសញ្ញាវិជ្ជមានដដែល ហើយថែមទាំងកើនឡើងខ្ពស់ទៀតផង»។
បើតាមលោក វណ្ណៈ ដោយសារតែទំនិញកម្ពុជានាំទៅទីផ្សារអាមេរិកភាគច្រើនជាផលិតផលទាក់ទងនឹងការធ្វើដំណើរ ហេតុនេះនៅពេលគ្រប់ប្រទេសបើកឱ្យមានការធ្វើដំណើរឆ្លងប្រទេសកាន់តែទូលំទូលាយ ការបញ្ជាទិញពីកម្ពុជាក៏នឹងកើនឡើងដែរ។
អនុប្រធានសភាពាណិជ្ជកម្មកម្ពុជាលោក លឹម ហេង បានលើកឡើងថា ទីផ្សារអាមេរិកបានដើរតួយ៉ាងសំខាន់ក្នុងការទទួលទិញផលិតផលពីកម្ពុជា ពិសេសវាយនភណ្ឌ។ កន្លងមកទោះបីក្នុងពេលពិភពលោកជួបនឹងវិបត្តិសេដ្ឋកិច្ចបណ្តាលមកពីជំងឺកូវីដ ១៩ ក៏ទំហំពាណិជ្ជកម្មរវាងប្រទេសទាំង ២ មិនបានធ្លាក់ចុះនោះឡើយ។
លោកបញ្ជាក់ថា៖ «ប្រព័ន្ធអនុគ្រោះ GSP ដែលអាមេរិកផ្តល់មកឱ្យកម្ពុជារួមជាមួយនឹងសមត្ថភាពផលិតដែលបានកើនឡើងជាបន្តបន្ទាប់នៅកម្ពុជា នឹងជំរុញឱ្យជញ្ជីងពាណិជ្ជកម្មរវាងប្រទេសទាំង ២ កើនឡើងខ្ពស់បន្ថែមទៀតក្នុងឆ្នាំ ២០២២ នេះ»។
ផលិតផលដែលកម្ពុជានាំទៅទីផ្សារអាមេរិកភាគច្រើនជាសម្លៀកបំពាក់ ស្បែកជើង ផលិតផលធ្វើដំណើរ កង់ និងគ្រឿងបង្គុំអគ្គិសនី។ ដោយឡែកផលិតផលអាមេរិកនាំមកកម្ពុជាមានដូចជា រថយន្ត គ្រឿងម៉ាស៊ីន ឧបករណ៍អេឡិចត្រូនិក និងឱសថជាដើម។
ឆ្នាំ ២០២១ ពាណិជ្ជកម្មរវាងកម្ពុជាអាមេរិកមានទឹកប្រាក់សរុប ៩ ១៥៩ លានដុល្លារ កើន ៣២,៦១ ភាគរយបើធៀបឆ្នាំ ២០២០។ នេះបើតាមការិយាល័យពាណិជ្ជកម្មអាមេរិក៕ LA