![](https://pppkhmer.sgp1.digitaloceanspaces.com/image/main/field/image/_rp14391.jpg)
បុគ្គលិកជំនាញឡើងតបណ្ដាញអគ្គិសនីនៅបណ្ដោយមហាវិថីសម្ដេច ហ៊ុន សែន នាពេលកន្លងទៅ។ ហេង ជីវ័ន
ភ្នំពេញៈ កម្ពុជាផលិតអគ្គិសនីដោយខ្លួនឯងបានជិត ១ ម៉ឺនលានគីឡូវ៉ាត់ម៉ោង ក្នុងឆ្នាំ ២០២១ កើនជិត ៨ ភាគរយ បើធៀបនឹងរយៈពេលដូចគ្នាឆ្នាំ ២០២០។
សារលិខិតរបស់លោកនាយករដ្ឋមន្ត្រី ហ៊ុន សែន សម្រាប់ឱកាសពិធីបុណ្យចូលឆ្នាំថ្មីប្រពៃណីជាតិឆ្នាំ ២០២២ នេះ បានបង្ហាញថា ក្នុងឆ្នាំ ២០២១ បរិមាណថាមពលនៃប្រភពផ្គត់ផ្គង់អគ្គិសនីក្នុងស្រុកផ្ទាល់របស់កម្ពុជាសម្រេចបានជាង ៩ ៧០៩ លានគីឡូវ៉ាត់ម៉ោងបើធៀបនឹងឆ្នាំ ២០២០ ដែលមានជាង ៨ ៦១៤ លានគីឡូវ៉ាត់ម៉ោងកើនឡើង ៧,៨៦ ភាគរយ។ ការភ្ជាប់ខ្សែបណ្តាញចរន្តឱ្យដល់ពលរដ្ឋជាអ្នកប្រើប្រាស់ថាមពលអគ្គិសនីតាមខ្នងផ្ទះរហូតដល់ឆ្នាំ ២០២១ កើនដល់ប្រមាណ ៣,១២ លានខ្នងផ្ទះ ត្រូវជាប្រមាណ ៨៦,៤៣ ភាគរយនៃចំនួនផ្ទះសរុបប្រមាណ ៣,៦១ លានខ្នងផ្ទះ និងគ្របដណ្តប់ដល់ភូមិប្រមាណ ៩៧,៥ ភាគរយនៃភូមិសរុប ១៤ ១៦៨ ភូមិ នៅទូទាំងប្រទេសកម្ពុជា។
នៅអំឡុងពេលចុះជួបប្រជាពលរដ្ឋនៅស្រុកក្រគរ ខេត្តពោធិ៍សាត់ កាលពីដើមឆ្នាំ ២០២២ លោក កែវ រតនៈ អគ្គនាយកអគ្គិសនីកម្ពុជា បានលើកឡើងថា រាជរដ្ឋាភិបាលបាននិងកំពុងខិតខំប្រឹងប្រែងផលិតអគ្គិសនីផ្គត់ផ្គង់ការប្រើប្រាស់ក្នុងស្រុក ដែលនឹងអាចអនុញ្ញាតឱ្យពលរដ្ឋប្រើប្រាស់អគ្គិសនីនៅក្នុងតម្លៃសមរម្យ។
លោកស្រី កែវ មុំ ម្ចាស់សហគ្រាសផលិតនំស្រួយលីលី បានលើកឡើងថា អគ្គិសនីបានដើរតួនាទីយ៉ាងសំខាន់ និងមិនអាចខ្វះបានសម្រាប់ខ្សែចង្វាក់ផលិតកម្ម។ ស្ថានភាពនៃការផ្គត់ផ្គង់អគ្គិសនីកាន់តែមានភាពល្អប្រសើរជាបន្តបន្ទាប់ ដោយបានជំរុញឱ្យវិស័យ SME មានការរីកចម្រើនផងដែរ។
ទោះជាយ៉ាងណាលោកស្រីអះអាងថា អគ្គិសនីនៅកម្ពុជាមានតម្លៃថ្លៃបើធៀបនឹងប្រទេសជិតខាង ស្របពេលតម្លៃប្រេងឥន្ធនៈក៏ឡើងថ្លៃដែរ។
លោកស្រីបញ្ជាក់ថា៖ «យើងទទួលស្គាល់ថា រដ្ឋាភិបាលបានខិតខំរៀបចំបង្កើតស្ថានីយវារីអគ្គិសនីឱ្យបានច្រើន ដើម្បីជំរុញឱ្យតម្លៃអគ្គិសនីទាប កាត់បន្ថយការចំណាយរបស់រដ្ឋ និងសហគ្រាស ប៉ុន្តែយើងឃើញថា រដ្ឋាភិបាលអាចបន្ធូរបន្ថយតម្លៃអគ្គិសនីសម្រាប់ការប្រើប្រាស់ពេលយប់។ ការធ្វើបែបនេះ ថ្វីដ្បិតតែយើងអាចកាត់បន្ថយការចំណាយសម្រាប់អគ្គិសនីមែន ប៉ុន្តែយើងងាកទៅចំណាយច្រើនទៅលើកម្លាំងពលកម្មវិញ ព្រោះបុគ្គលិកធ្វើការវេនយប់នឹងទទួលបានប្រាក់ឈ្នួលច្រើនជាងវេនថ្ងៃ»។
កាលពីខែមករា ឆ្នាំ ២០២២ អគ្គនាយកអគ្គិសនីកម្ពុជាបានលើកឡើងថា ស្ថានីយផលិតអគ្គិសនីដើរដោយពន្លឺព្រះអាទិត្យ ដែលធំជាងគេនៅកម្ពុជា គ្រោងនឹងពង្រីកទំហំថាមពលពី ៩០ មេហ្គាវ៉ាត់ ដល់ ២៤០ មេហ្គាវ៉ាត់នាពេលឆាប់ៗ ដើម្បីបំពេញតម្រូវការ និងកាត់បន្ថយការចំណាយលើថ្លៃអគ្គិសនីរបស់ពលរដ្ឋ៕ LA