ទីក្រុងហ្សាការតាៈ តម្លៃភាគហ៊ុននៃក្រុមហ៊ុនបច្ចេកវិទ្យាដ៏ធំបំផុតរបស់ឥណ្ឌូនេស៊ីបានកើនឡើងនៅក្នុងការជួញដូរលើកដំបូងនៅទីក្រុងហ្សាការតាកាលពីថ្ងៃចន្ទ បន្ទាប់ពីការបោះផ្សាយជាសាធារណៈលើកដំបូងដែលបានបិទកាលពីសប្តាហ៍មុន។
ក្រុមហ៊ុន GoTo ដែលជាប្រព័ន្ធអេកូស៊ីស្ទែមឌីជីថលដ៏ធំបំផុតនៅក្នុងប្រទេសប្រជុំកោះដែលមានប្រជាជនចំនួន ២៧០ លាននាក់ត្រូវបានបង្កើតឡើងដោយការច្របាច់បញ្ចូលគ្នានៃក្រុមហ៊ុនដឹកជញ្ជូន Gojek និងថ្នាលពាណិជ្ជកម្មអេឡិចត្រូនិក Tokopedia ក្នុងខែឧសភា ឆ្នាំ ២០២១។
ភាគហ៊ុនរបស់ក្រុមហ៊ុននេះបានកើនឡើង ១៧ ភាគរយនៅតម្លៃ ៣៩៦ រូពៀ នៅម៉ោង ៩:១០ ព្រឹក [ម៉ោង ២:១០ ម៉ោងសកល (GMT)]។
ក្រុមហ៊ុនដែលមានមូលដ្ឋាននៅទីក្រុងហ្សាការតាបានប្រមូលប្រាក់បានប្រហែល ១,១ ពាន់លានដុល្លារនៅក្នុង IPO របស់ខ្លួនដែលមានតម្លៃ ៣៣៨ រូពៀក្នុង ១ ហ៊ុន ដែលតំណាងឱ្យតម្លៃទីផ្សារប្រហែល ២៨ ពាន់លានដុល្លារ។
ក្រុមហ៊ុននេះបានលក់ភាគហ៊ុនក្នុងតម្លៃ ៩៥៤,៧ លានដុល្លារ (១៣,៧ ពាន់ពាន់លានរូពៀ) បូកបន្ថែម ១៤៦,៣ លានដុល្លារពីភាគហ៊ុនរតនាគារសម្រាប់គោលបំណងនៃការបែងចែកលើស។
ផ្អែកតាមមូលនិធិសរុបដែលទទួលបានពីការលក់ IPO របស់ GoTo គឺធំជាងគេទី ៣ នៅអាស៊ី និងធំជាងគេទី ៥ ក្នុងពិភពលោកក្នុងឆ្នាំនេះ។
លោក Andre Soelistyo នាយកប្រតិបត្តិក្រុមហ៊ុន បាននិយាយនៅក្នុងសេចក្តី ប្រកាសព័ត៌មានមួយថា៖ «ទោះបីជាមានការប្រែប្រួលទីផ្សារសកលក៏ដោយ ចំណាប់អារម្មណ៍របស់វិនិយោគិនមានភាពរឹងមាំ ដែលឆ្លុះបញ្ចាំងពីតម្រូវការ ដែលកំពុងកើនឡើងយ៉ាងឆាប់រហ័សនៅក្នុងតំបន់អាស៊ីអាគ្នេយ៍សម្រាប់សេវាកម្មតាមតម្រូវការ ពាណិជ្ជកម្មអេឡិចត្រូនិក និងបច្ចេកវិទ្យាហិរញ្ញវត្ថុ ក៏ដូចជាទំនុកចិត្តលើទីតាំងរបស់ GoTo ជាប្រព័ន្ធអេកូស៊ីស្ទែមឌីជីថលដ៏ធំបំផុតនៅក្នុងប្រទេសឥណ្ឌូនេស៊ី»។
ក្រុមហ៊ុនបានប្រកាសកាលពីសប្តាហ៍មុនថា ខ្លួននឹងចែកចាយភាគហ៊ុនដែលមានតម្លៃ ៣១០ពាន់លានរូពៀទៅអ្នកបើកបររាប់សែននាក់។
GoTo ដែលមានដៃគូប្រកួតប្រជែងសំខាន់នៅក្នុងតំបន់គឺ SEA និង Grab បាននិយាយកាលពីមុនថា ខ្លួនក៏កំពុងរៀបចំផែនការចុះបញ្ជីនៅទីផ្សារភាគហ៊ុននៅសហរដ្ឋអាមេរិកផងដែរ។
នៅក្នុងខែវិច្ឆិកា ក្រុមហ៊ុននេះបាននិយាយថា ខ្លួនបានប្រមូលប្រាក់បានចំនួន ១,៣ពាន់លានដុល្លារពីអ្នកវិនិយោគផ្សេងៗ រួមមាន Google ក្រុមហ៊ុន Temasek របស់សិង្ហបុរី និងក្រុមហ៊ុន Tencent របស់ចិន។
កាលពីឆ្នាំមុន ក្រុមហ៊ុន Unicorn Bukalapak របស់ឥណ្ឌូនេស៊ីមួយផ្សេងទៀតបានបោះផ្សាយភាគហ៊ុនដំបូងដ៏ធំបំផុតក្នុងប្រវត្តិសាស្ត្រនៃទីផ្សារភាគហ៊ុនរបស់ប្រទេសនេះ ដោយបង្កើនសាច់ប្រាក់បានជាង ១,៥ ពាន់លានដុល្លារ។
ទោះជាយ៉ាងណា ក៏ដោយ ភាគហ៊ុននៅក្នុងទីផ្សារអន ឡាញបានធ្លាក់ចុះ ប្រហែល ៦០ ភាគរយ ដែលធ្វើឱ្យមានការសង្ស័យនៅក្នុងវិស័យបច្ចេកវិទ្យាអាស៊ីអាគ្នេយ៍៕ RR