.jpg)
អគារស្នាក់ការកណ្តាលធនាគារពិភពលោកនៅទីក្រុងវ៉ាស៊ីនតោន D.C។ AFP
ទីក្រុងវ៉ាស៊ីនតោនៈ ធនាគារពិភពលោកបានចេញការព្យាករដ៏អាក្រក់ សម្រាប់អ៊ុយក្រែន ដោយសារតែការឈ្លានពានរបស់ប្រទេសរុស្ស៊ីប៉ះពាល់ដល់ទាំងប្រទេសនេះ និងប្រទេសជិតខាងរបស់ខ្លួន ដោយបានព្រមានក្នុងរបាយការណ៍មួយ ដែលបានចេញផ្សាយកាលពីថ្ងៃអាទិត្យអំពីចក្ខុវិស័យសេដ្ឋកិច្ចកាន់តែអាក្រក់ប្រសិនបើជម្លោះអូសបន្លាយ។
ធនាគារមួយនេះបានព្យាករថាសេដ្ឋកិច្ចរបស់ប្រទេសអ៊ុយក្រែននឹងធ្លាក់ចុះ ៤៥,១ ភាគរយនៅឆ្នាំនេះ ដែលអាក្រក់ខ្លាំងជាងការធ្លាក់ចុះពី ១០ ទៅ ៣៥ភាគរយដែល IMF បានព្យាករកាលពីខែមុន។
ប្រទេសរុស្ស៊ីនឹងឃើញការធ្លាក់ចុះ ១១,២ ភាគរយនៃផលិតផលក្នុងស្រុកសរុប (GDP) ហើយធនាគារពិភពលោកបានឱ្យដឹងថា តំបន់នេះទាំងមូលកំពុងទទួលរងនូវផលវិបាកផ្នែកសេដ្ឋកិច្ច ដោយសារតែសង្គ្រាមដែលបានចាប់ផ្តើមកាលពីចុងខែកុម្ភៈ ហើយបានបណ្តាលឱ្យប្រជាជនអ៊ុយក្រែនជាង ៤ លាននាក់ភៀសខ្លួនទៅកាន់ប្រទេសប៉ូឡូញ រូម៉ានី និងម៉ុលដូវ៉ា។
ជម្លោះនេះក៏បានបណ្ដាលឱ្យតម្លៃធញ្ញជាតិ និងថាមពលកើនឡើង។
លោកស្រី Anna Bjerde អនុប្រធានធនាគារពិភពលោកប្រចាំតំបន់អឺរ៉ុប និងអាស៊ីកណ្តាល បានថ្លែងថា៖ «លទ្ធផលនៃការវិភាគរបស់យើងមានប្រាកដខ្លាំងណាស់។ ការព្យាកររបស់យើងបង្ហាញថា ការឈ្លានពានរបស់ប្រទេសរុស្ស៊ីលើប្រទេសអ៊ុយក្រែនបានរារាំងការស្ទុះងើបឡើងរបស់តំបន់នេះពីជំងឺកូវីដ ១៩»។
លោកស្រីបានប្រាប់ក្រុមអ្នកយកព័ត៌មានថា៖ «នេះគឺជាវិបត្តិដ៏ធំទី ២ ដែលបានប៉ះពាល់ដល់សេដ្ឋកិច្ចក្នុងតំបន់រយៈពេល ២ ឆ្នាំ ហើយកាន់តែអាក្រក់ខ្លាំងបំផុតសម្រាប់តំបន់នេះ ដោយសារតែបណ្ដាប្រទេសជាច្រើននៅតែជម្នះនឹងការស្ទុះងើបឡើងវិញពីការរីករាលដាលជំងឺកូវីដ ១៩»។
ស្ថាប័នដែលមានមូលដ្ឋាននៅទីក្រុងវ៉ាស៊ីនតោនមួយនេះរំពឹងថា បណ្ដាប្រទេសដែលរីកចម្រើនរហ័ស និងបណ្ដាប្រទេសកំពុងអភិវឌ្ឍន៍នៅក្នុងតំបន់អឺរ៉ុប និងអាស៊ីកណ្តាលនឹងធ្លាក់ចុះ ៤,១ ភាគរយនៅឆ្នាំនេះ ធ្លាក់ចុះយ៉ាងខ្លាំងពីកំណើន ៣ ភាគរយដែលបានព្យាករមុនសង្គ្រាម និងអាក្រក់ខ្លាំងជាង ២ ដង ដូចវិបត្តិការដើរថយក្រោយនៃសេដ្ឋកិច្ចដែលបណ្តាលមកពីការរីករាលដាលជំងឺកូវីដ ១៩ កាលពីឆ្នាំ ២០២០។
ប្រទេសអ៊ុយក្រែនប្រឈមមុខនឹងចក្ខុវិស័យដ៏សំខាន់បំផុត ដោយសេដ្ឋកិច្ចរបស់ខ្លួនស្ថិតនៅក្រោម «សម្ពាធកាន់តែធ្ងន់ធ្ងរ» ដោយសារតែការធ្លាក់ចុះប្រាក់ចំណូលរបស់រដ្ឋាភិបាល ក្រុមហ៊ុនជាច្រើនដែលបានបិទទ្វារ ឬដំណើរការតែផ្នែកខ្លះ និងពាណិជ្ជកម្មលើទំនិញដែលត្រូវបានរំខានយ៉ាងធ្ងន់ធ្ងរ។
លោក Bjerde បានឱ្យដឹងថា ការនាំចេញគ្រាប់ធញ្ញជាតិ និងសកម្មភាពសេដ្ឋកិច្ចផ្សេងទៀត «មិនអាចធ្វើទៅបាននោះទេ នៅក្នុងផ្នែកដ៏ធំនៃប្រទេសនេះ ដោយសារតែការខូចខាតយ៉ាងខ្លាំងដល់ហេដ្ឋារចនាសម្ព័ន្ធ»។
ការព្យាកររបស់ធនាគារបានសន្មតថា សង្គ្រាមនេះនឹងបន្តរយៈពេល ២-៣ ខែទៀត ប៉ុន្តែបានព្រមានថា ពួកគេ «ស្ថិតក្រោមភាពមិនច្បាស់លាស់យ៉ាងខ្លាំង»។
នៅក្នុងសេណារីយោទុទ្ទិដ្ឋិនិយមជាងនេះ ដែលឆ្លុះបញ្ចាំងថា ជម្លោះនេះនឹងការកើនឡើងកាន់តែខ្លាំងនឹងមានផលប៉ះពាល់អវិជ្ជមានកាន់តែធំលើតំបន់ចាយប្រាក់អឺរ៉ូ ការកើនឡើងនៃការដាក់ទណ្ឌកម្មរបស់ប្រទេសលោកខាងលិច និងវិបត្តិហិរញ្ញវត្ថុដោយសារតែការបំផ្លាញទំនុកចិត្ត។
របាយការណ៍បានឱ្យដឹងថា សេដ្ឋកិច្ចក្នុងតំបន់នឹងធ្លាក់ចុះជិត ៩ ភាគរយ ដែលអាក្រក់ជាងវិបត្តិហិរញ្ញវត្ថុពិភពលោកកាលពីឆ្នាំ ២០០៨ ដោយធ្លាក់ចុះ ២០ ភាគរយសម្រាប់ប្រទេសរុស្ស៊ី និងធ្លាក់ចុះ ៧៥ ភាគរយសម្រាប់ប្រទេសអ៊ុយក្រែន។
មូលហេតុមួយទៀត ដែលបង្កក្តីបារម្ភ គឺការកើនឡើងភាពក្រីក្រដែលព្យាករ នៅក្នុងប្រទេសអ៊ុយក្រែន។
សមាមាត្រចំនួនប្រជាជនដែលរស់នៅពឹងផ្អែកលើប្រាក់ ៥,៥០ ដុល្លារក្នុង ១ ថ្ងៃ ត្រូវបានរំពឹងថា នឹងកើនឡើងដល់ ១៩,៨ ភាគរយនៅឆ្នាំនេះពីត្រឹមចំនួន ១,៨ ភាគរយកាលពីឆ្នាំ ២០២១។ នេះបើយោងតាមធនាគារពិភពលោក។
ទោះបីតំបន់នេះ ចៀសផុតពីសេណារីយោករណីដ៏អាក្រក់បំផុតក៏អឺរ៉ុបខាងកើតតែម្នាក់ឯងត្រូវបានរំពឹងថា នឹងមើលឃើញផលិតផលក្នុងស្រុកសរុប (GDP) របស់ខ្លួនធ្លាក់ចុះ ៣០,៧ ភាគរយ មិនមែនកើនឡើង ១,៤ ភាគរយ ដូចដែលបានព្យាករមុនពេលការលុកលុយនោះទេ។
តំបន់នេះក៏បានរងផលប៉ះពាល់ដោយសារតែការដាក់ទណ្ឌកម្មលើសម្ព័ន្ធមិត្តរបស់ប្រទេសរុស្ស៊ី គឺប្រទេសបេឡារុស ដោយសារតែតួនាទីរបស់ខ្លួនក្នុងសង្គ្រាមនេះ។
របាយការណ៍នេះបានព្រមានថា ប្រទេសម៉ុលដាវីទំនងក្លាយជាប្រទេសមួយដែលរងគ្រោះខ្លាំងបំផុតដោយសារតែជម្លោះនេះ មិនត្រឹមតែដោយសារតែភូមិសាស្ត្រនៅជិតសង្គ្រាមប៉ុណ្ណោះទេ ប៉ុន្តែវាក៏ជាភាពងាយរងគ្រោះដែលជាប់ជាមួយរបស់ប្រទេសនេះដែរ ដោយសារសេដ្ឋកិច្ចដ៏តូចនៃប្រទេសនេះមានទំនាក់ទំនងយ៉ាងជិតស្និទ្ធជាមួយប្រទេសអ៊ុយក្រែន និងប្រទេសរុស្ស៊ី។
លើសពីនេះផ្នែកនៃទ្វីបអឺរ៉ុបនេះពឹងផ្អែកលើឧស្ម័នធម្មជាតិ ដើម្បីបំពេញតម្រូវការថាមពលរបស់ខ្លួន៕ LA
