ភ្នំពេញៈ ខេត្តកែបនឹងមានផែនការមេសម្រាប់ចង្អុលបង្ហាញ និងអភិវឌ្ឍន៍វិស័យទេសចរណ៍ក្នុងពេលឆាប់ៗនេះ ដើម្បីស្រូបទាញអ្នកវិនិយោគ និងភ្ញៀវទេសចរជាតិ-អន្តរជាតិ ព្រមទាំងការអភិវឌ្ឍហេដ្ឋារចនាសម្ព័ន្ធកាន់តែសម្បូរបែប។
នៅក្នុងពិធីផ្សព្វផ្សាយ និងដាក់ឱ្យអនុវត្តជាផ្លូវការនូវផែនការមេអភិវឌ្ឍន៍វិស័យទេសចរណ៍ខេត្តមណ្ឌលគិរី (២០២១-២០៣៥) កាលពីថ្ងៃទី ១១ មេសា លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការជាតិអភិវឌ្ឍន៍ទេសចរណ៍បានឱ្យដឹងថា រដ្ឋាភិបាលបានអនុម័តដាក់ឱ្យអនុវត្តនូវឯកសារយុទ្ធសាស្ត្រសម្រាប់អភិវឌ្ឍវិស័យទេសចរណ៍នៅក្នុងក្របខ័ណ្ឌទូទាំងប្រទេស ដែលរួមមានជាអាទិ៍ ផែនទីចង្អុលបង្ហាញផ្លូវស្តីពីផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ ១៩ និងគោលនយោបាយជំរុញចលនាទេសចរណ៍ផ្ទៃក្នុងឆ្នាំ ២០២១-២០២៣។
លោកថ្លែងថា៖ «ក្នុងក្របខ័ណ្ឌថ្នាក់ខេត្ត រាជរដ្ឋាភិបាលបានអនុម័ត និងដាក់ឱ្យអនុវត្តជាផ្លូវការនូវផែនការមេអភិវឌ្ឍន៍វិស័យទេសចរណ៍ខេត្តសៀមរាប(២០២១-២០៣៥) និងផែនការមេអភិវឌ្ឍន៍វិស័យទេសចរណ៍ខេត្ត-មណ្ឌលគិរី(២០២១-២០៣៥)។ ជាមួយគ្នានេះរាជរដ្ឋាភិបាលក៏គ្រោងនឹងអនុម័ត និងដាក់ឱ្យអនុវត្តជាផ្លូវការនូវផែនការមេអភិវឌ្ឍន៍វិស័យទេសចរណ៍ខេត្តកែប(២០២២-២០៣៥) នាពេលឆាប់ៗខាងមុខនេះផងដែរ»។
លោក សោម ពិសិដ្ឋ អភិបាលខេត្តកែបបានប្រាប់ភ្នំពេញប៉ុស្តិ៍នាថ្ងៃទី ១១ ខែមេសាថា គោលបំណងសំខាន់នៃការបង្កើតផែនការមេអភិវឌ្ឍន៍វិស័យទេសចរណ៍ខេត្តកែប (២០២២-២០៣៥) រួមមាន ទី ១ ការស្រូបទាញអ្នកវិនិយោគជាដៃគូអភិវឌ្ឍន៍ខេត្ត ទី ២ ទាក់ទាញភ្ញៀវទេសចរជាតិ និងអន្តរជាតិបន្ថែមដើម្បីជំរុញកំណើនទេសចរពីគ្រប់ទិសទី និងទី ៣ ការអភិវឌ្ឍហេដ្ឋារចនាសម្ព័ន្ធកាន់តែត្រូវបានជំរុញ តាមរយៈការដាក់ចេញនូវផែនការសកម្មភាពរបស់ក្រសួងស្ថាប័នថ្នាក់ជាតិ ដែលពាក់ព័ន្ធ។
លោកបានបន្ថែមថា ផែនការនេះមានសារៈសំខាន់ខ្លាំងណាស់ក្នុងការអភិវឌ្ឍវិស័យទេសចរណ៍ក្នុងខេត្តកែបទាំងមូល ដោយបច្ចុប្បន្ន ផែនការមេនេះនៅសល់ ២ ដំណាក់កាលទៀតនឹងរួចរាល់ ដែលនឹងអាចដាក់ឱ្យអនុវត្តនៅក្នុងពេលឆាប់ៗនេះ។
លោកបញ្ជាក់ថា៖ «ផែនការមេនេះ បានកំណត់តំបន់ដែលត្រូវអភិវឌ្ឍ ដែលរួមមាន ទេសចរណ៍តំបន់ឆ្នេរ, ទេសចរណ៍តំបន់កោះ, ទេសចរណ៍តំបន់ភ្នំ (ភ្នំវល្លិ ជាតំបន់កសិឧស្សាហកម្ម អេកូទេសចរណ៍ និងជាអតីតតំបន់សង្គ្រាមរវាងខ្មែរនិងខ្មែរ) និងទេសចរណ៍នៅតំបន់ទីប្រជុំជនមួយចំនួនទៀត»។
លោក ធួន ស៊ីណាន ប្រធាន ក្រុមប្រឹក្សាភិបាលនៃក្រុមហ៊ុន IMCT Co.ltd និងជាប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ភ្នំពេញ-ប៉ុស្តិ៍ថា ផែនការមេអភិវឌ្ឍន៍វិស័យទេសចរណ៍ពិតជាមានសារៈសំខាន់ខ្លាំងណាស់សម្រាប់ខេត្តនីមួយៗ ជាពិសេសគោលដៅទេសចរណ៍។ ផែនការនេះនឹងជួយជំរុញកំណើនសេដ្ឋកិច្ច និងបង្កើតការងារជាច្រើនផងដែរ។
លោកបញ្ជាក់ថា៖ «សម្រាប់ខ្ញុំផែនការមេនេះ គឺដើរតួនាទីសំខាន់ខ្លាំងណាស់។ កែប គឺជាខេត្តដែលមានសក្តានុពលខ្ពស់នៅក្នុងវិស័យទេសចរណ៍ ដោយរាជរដ្ឋាភិបាលបានកំណត់យកខេត្តកែប ជាខេត្តសម្រាប់ទេសចរកម្រិតខ្ពស់ ឬទេសចរកម្រិតអភិជន។ ផែនការមេសម្រាប់អភិវឌ្ឍវិស័យទេសចរណ៍នេះ គឺនឹងចូលរួមចំណែកយ៉ាងច្រើន នៅក្នុងការតម្រង់ទិស ការទាក់ទាញអ្នកវិនិយោគ វិស័យទេសចរណ៍ និងវិស័យដទៃទៀត ចូលមកក្នុងខេត្តនេះ»។
បើតាមលោកអភិបាលខេត្តកែប ផែនការមេអភិវឌ្ឍន៍វិស័យទេសចរណ៍ខេត្តកែប (២០២២-២០៣៥) មានយុទ្ធសាស្ត្រសំខាន់ៗសរុបចំនួន ៧ ដែលនឹងត្រូវដាក់ឱ្យអនុវត្តដោយរួមមាន ទី ១ យុទ្ធសាស្ត្របង្កើត និងអភិវឌ្ឍន៍ប៉ូលទេសចរណ៍ខេត្តកែប, ទី ២ យុទ្ធសាស្ត្រជំរុញការវិនិយោគ ពង្រឹងគុណភាព និងសុវត្ថិភាពទេសចរណ៍, ទី ៣ យុទ្ធសាស្ត្រទីផ្សារ និងការផ្សព្វផ្សាយទេសចរណ៍ខេត្តកែប, ទី ៤ យុទ្ធសាស្ត្រគ្រប់គ្រង និងអភិវឌ្ឍន៍អន្តរវិស័យពាក់ព័ន្ធគាំទ្រដល់ការអភិវឌ្ឍនៃវិស័យទេសចរណ៍ខេត្តកែប,ទី ៥ យុទ្ធសាស្ត្របង្កើត និងពង្រឹងចង្វាក់ផលិតកម្មក្នុងវិស័យទេសចរណ៍ខេត្តកែប, ទី ៦ យុទ្ធសាស្ត្រគ្រប់គ្រង អភិវឌ្ឍន៍នវានុវត្តនៅក្នុងវិស័យទេសចរណ៍ខេត្តកែប និងទី ៧ យុទ្ធសាស្ត្រពង្រឹងអភិបាលកិច្ចត្រួតពិនិត្យ និងវាយតម្លៃសម្រាប់ការអភិវឌ្ឍវិស័យទេសចរណ៍ខេត្តកែប៕ LA
វីដេអូ៖