.jpg)
អគ្គនាយកដ្ឋានពន្ធដារ។ ហុង មិនា
ភ្នំពេញៈ អគ្គនាយកដ្ឋានពន្ធដារបានឱ្យដឹងថា រហូតមកដល់ពេលនេះមានក្រុមហ៊ុនប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកប្រមាណជាង ២០ ក្រុមហ៊ុនហើយដែលបានមកចុះបញ្ជីជាបន្តបន្ទាប់ ដើម្បីអនុវត្តអាករលើតម្លៃបន្ថែមលើទំនិញ និងសេវាឌីជីថលដែលធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។
លោក អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារ បានប្រាប់ភ្នំពេញប៉ុស្តិ៍កាលពីចុងសប្តាហ៍មុនថា ចាប់តាំងពីមានការផ្សព្វផ្សាយអំពីនីតិវិធីនៃការអនុវត្តអាករលើតម្លៃបន្ថែមចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-commerce) និងបន្ទាប់ពីការជូនដំណឹង និងធ្វើសិក្ខាសាលាជាច្រើនលើករួចមក អគ្គនាយកដ្ឋានពន្ធដារទទួលបានក្រុមហ៊ុនដែលមកចុះបញ្ជីប្រមាណជាង ២០ ហើយ ប៉ុន្តែមិនទាន់មានក្រុមហ៊ុនណាមួយមកបង់ពន្ធនៅឡើយទេ។
លោកបានប្រាប់ថា ក្រុមហ៊ុនទាំង ២០ នេះសុទ្ធតែជាក្រុមហ៊ុនធំៗដូចជាក្រុមហ៊ុន Amazon, Facebook, booking.com, google tiktok ,Microsoft, សូហូ អបផើរេសិន, Master car, និង Tik Tok ជាដើមបានមកចុះបញ្ជីជាបន្តបន្ទាប់ តែមិនទាន់បានបង់ពន្ធ ដោយពន្ធដារបានទុកពេលឱ្យដល់ថ្ងៃទី ២៥ ខែឧសភាខាងមុខ មុននឹងឈានដល់ការផាកពិន័យ។
លោកថ្លែងថា៖ «អគ្គនាយកដ្ឋានពន្ធដារមិនទាន់ទទួលបានការបង់ពន្ធពីក្រុមហ៊ុនដែលបានចុះបញ្ជីនៅឡើយទេ ចាប់តាំងពីដាក់ឱ្យអនុវត្តការបង់ពន្ធអាករលើតម្លៃបន្ថែមលើទំនិញ និងសេវាឌីជីថល ដែលធ្វើពាណិជ្ជកម្មតាមប្រព័ន្ធអេឡិចត្រូនិកនេះ កាលពីថ្ងៃទី ១ មេសាមក។ យើងទុកពេលឱ្យយ៉ាងយូរត្រឹមថ្ងៃទី ២៥ ខែឧសភា ក្នុងករណីក្រុមហ៊ុនទាំងនេះមិនទាន់បានដាក់ប្រកាសបង់ពន្ធទៀត យើងនឹងអនុវត្តការផាកពិន័យតាមច្បាប់ និងបទប្បញ្ញត្តិស្តីពីពន្ធដារជាធរមាន»។
លោកបានបន្តថា ការអនុវត្តអាករលើតម្លៃបន្ថែមលើទំនិញ និងសេវាឌីជីថលដែលធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា គឺជាការអនុវត្តពន្ធថ្មី និងជាលើកដំបូង ដូចនេះត្រូវការប្រើពេលវេលាក្នុងការផ្សព្វផ្សាយបន្តទៀតដល់ប្រតិបត្តិករឱ្យមានការយល់ដឹងពីកាតព្វកិច្ចរបស់ខ្លួន។ លោកបន្តថា ការអនុវត្តពន្ធថ្មីនេះនឹងជំរុញដល់ការប្រមូលចំណូលពន្ធដារឱ្យកើនឡើងថែមទៀត ដើម្បីជំរុញឱ្យសេដ្ឋកិច្ចជាតិមានដំណើរការល្អ។
ទោះជាយ៉ាងណា អគ្គនាយកដ្ឋានពន្ធដារមិនមានតួលេខនៃចំនួនអ្នកជាប់ពន្ធអនិវាសនជន (ក្រុមហ៊ុនបរទេស) ដែលធ្វើការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬធ្វើសកម្មភាពពាណិជ្ជកម្មតាមប្រព័ន្ធអេឡិចត្រូនិកចូលមកកម្ពុជាច្បាស់លាស់នៅឡើយទេ។
ជុំវិញការអនុវត្តអាករលើតម្លៃបន្ថែមលើទំនិញ និងសេវាឌីជីថល ដែលធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា សម្រាប់អ្នកជាប់ពន្ធអនិវាសនជននេះដែរ លោក ម៉ាក ចំរើន អនុប្រធាន និងក្រុមប្រឹក្សាភិបាលរបស់ក្រុមហ៊ុនស្មាលយ៍សប ធ្លាប់និយាយថា ប្រទេសកម្ពុជាមានទីផ្សារតូចសម្រាប់ក្រុមហ៊ុនបរទេសដែលធ្វើការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិកចូលមកកម្ពុជាក៏ពិតមែន ប៉ុន្តែបើក្រុមហ៊ុនទាំងនោះមកបើកប្រតិបត្តិការអាជីវកម្មរបស់ខ្លួនហើយ មិនបង់ពន្ធ ឬចុះបញ្ជីតាមច្បាប់រដ្ឋនោះ គឺរឿងមិនសមស្របទេក្នុងនាមជាពាណិជ្ជករ។
លោកបានស្នើថា៖ «គួរតែមានសិក្សាបន្ថែម ចំពោះប្រតិបត្តិការរបស់ក្រុមហ៊ុនបរទេសធំៗដែលផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិកមកកម្ពុជា ថាអាចនឹងចូលរួមជំរុញឱ្យវិស័យនេះរីកចម្រើនកម្រិតណា និងគួរផ្តល់ការលើកលែងពន្ធដល់ពួកគាត់យ៉ាងម៉េច ដើម្បីអាចទាក់ទាញពួកគាត់ឱ្យមករកស៊ីនៅស្រុកខ្មែរ»៕ LA
