.jpg)
ស្លាកសញ្ញារបស់ក្រុមហ៊ុនហុងដា ដែលគេដាក់តាំងក្នុងពេលសន្និសីទសារព័ត៌មាននៅទីក្រុងតូក្យូ។ AFP
ទីក្រុងតូក្យូៈ ក្រុមហ៊ុនផលិតរថយន្តជប៉ុន Honda បាននិយាយកាលពីថ្ងៃអង្គារថា ខ្លួននឹងវិនិយោគជិត ៤០ ពាន់លានដុល្លារ ទៅក្នុងបច្ចេកវិទ្យារថយន្តអគ្គិសនីក្នុងរយៈពេល ១ ទសវត្សរ៍ខាងមុខ ខណៈដែលខ្លួនធ្វើការឆ្ពោះទៅរកការផ្លាស់ប្តូរការលក់ទាំងអស់ពីរថយន្តប្រេងឥន្ធនៈប្រពៃណី។
ក្រុមហ៊ុនរថយន្តលំដាប់ពិភពលោកកំពុងផ្តល់អាទិភាពកាន់តែខ្លាំងឡើងលើរថយន្តអគ្គិសនី និងរថយន្តកូនកាត់ជាមួយនឹងតម្រូវការកើនឡើងសម្រាប់ម៉ូដែលដែលមិនសូវបំពុលបរិស្ថាន ដោយការព្រួយបារម្ភអំពីការប្រែប្រួលអាកាសធាតុកើនឡើង។
ក្រុមហ៊ុន Honda បាននិយាយនៅក្នុងសេចក្តីថ្លែងការណ៍មួយថា ខ្លួនគ្រោងនឹងបញ្ចេញម៉ូដែលរថយន្តអគ្គិសនីចំនួន ៣០ ប្រភេទ នៅឆ្នាំ ២០៣០ ជាមួយនឹងបរិមាណផលិតកម្មប្រចាំឆ្នាំច្រើនជាង ២ លានគ្រឿង។
ក្រុមហ៊ុនបាននិយាយថា ខ្លួននឹងបែងចែកប្រាក់ប្រហែល ៥ ពាន់ពាន់លានយ៉េន (៣៩,៩ ពាន់លានដុល្លារ) ក្នុងរយៈពេល ១០ ឆ្នាំខាងមុខ «នៅក្នុងផ្នែកនៃបច្ចេកវិទ្យាអគ្គិសនី និងសូហ្វវែរ ដើម្បីបង្កើនល្បឿននៃការប្រើប្រាស់អគ្គិសនីរបស់ខ្លួន»។
ការវិនិយោគនេះគឺជាជំហានចុងក្រោយបង្អស់ក្នុងការជំរុញរបស់ខ្លួន ដើម្បីឱ្យមានរថយន្តអគ្គិសនី និងឥន្ធនៈមានចំនួន ១០០ ភាគរយនៃការលក់ទាំងអស់នៅឆ្នាំ ២០៤០ ដែលជាគោលដៅដែលបានប្រកាសកាលពីឆ្នាំមុន។
ក្រុមហ៊ុន Honda និងក្រុមហ៊ុនបច្ចេកវិទ្យាជប៉ុន Sony បានប្រកាសកាលពីខែមុនថាពួកគេនឹងចាប់ផ្តើមបង្កើតក្រុមហ៊ុនថ្មីមួយដើម្បីអភិវឌ្ឍ និងលក់រថយន្តអគ្គិសនី ដោយការលក់រថយន្ត EV ដំបូងគេរំពឹងថានឹងចាប់ផ្តើមនៅឆ្នាំ ២០២៥។
នាពេលបច្ចុប្បន្ននេះ ប្រហែល ១០ ភាគរយនៃការលក់រថយន្តនៅអឺរ៉ុបគឺជារថយន្ត EV ហើយតួលេខរបស់សហរដ្ឋអាមេរិកគឺត្រឹមតែ ២ ភាគរយប៉ុណ្ណោះ។
ប៉ុន្តែតម្រូវការកំពុងកើនឡើង ហើយក្រុមហ៊ុនផលិតរថយន្តធំៗផ្សេងទៀត រួមទាំងគូប្រជែងជប៉ុនរបស់ Honda កំពុងវិនិយោគប្រាក់ និងធនធានទៅក្នុងរថយន្តអគ្គិសនី។
កាលពីដើមឆ្នាំនេះសម្ព័ន្ធក្រុមហ៊ុនផលិតរថយន្តដែលមានក្រុមហ៊ុន Nissan, Renault, និង Mitsubishi Motors បានសន្យាថានឹងផ្តល់ជូននូវម៉ូដែលរថយន្តអគ្គិសនីថ្មីចំនួន ៣៥ នៅឆ្នាំ ២០៣០ ខណៈដែលខ្លួនបានប្រកាសការវិនិយោគសរុបចំនួន ២៥ ពាន់លានដុល្លារនៅក្នុងវិស័យនេះ។
ក្រុមហ៊ុន Toyota ដែលជាក្រុមហ៊ុនផលិតរថយន្តលក់ដាច់បំផុតរបស់ពិភពលោកថ្មីៗនេះក៏បានបង្កើនគោលដៅលក់រថយន្តអគ្គិសនីនៅឆ្នាំ ២០៣០របស់ខ្លួនចំនួន ៧៥ ភាគរយ ដោយមានបំណងលក់រថយន្ត EV ចំនួន ៣,៥ លានគ្រឿងក្នុង ១ ឆ្នាំចាប់ពីពេលនោះ៕ RR
