ភ្នំពេញៈ ភ្ញៀវទេសចរប្រមាណជាង ៨៦ម៉ឺននាក់ បានចេញដើរកម្សាន្ត នៅក្នុងថ្ងៃទី១ នៃឱកាសពិធីបុណ្យចូលឆ្នាំប្រពៃណីជាតិខ្មែរ ដែលត្រូវនឹងថ្ងៃទី១៤ ខែមេសា ឆ្នាំ២០២២។ នេះបើយោងតាមតួលេខពីក្រសួងទេសចរណ៍។
ក្រសួងទេសចរណ៍ បានបង្ហាញថា ក្នុងថ្ងៃទី១ នៃពិធីបុណ្យចូលឆ្នាំប្រពៃណីជាតិខ្មែរ ដែលត្រូវនឹងថ្ងៃទី១៤ ខែមេសា ឆ្នាំ២០២២ មានភ្ញៀវទេសចរចេញដើរកម្សាន្តសរុប ៨៦២ ៨៩៧នាក់ ក្នុងនោះភ្ញៀវជាតិ មានចំនួន ៨៥៤ ៦៥៤នាក់ និងភ្ញៀវបរទេសផ្ទៃក្នុង មានចំនួន ៨ ២៤៣នាក់។
រាជធានី-ខេត្ត ដែលទទួលបានភ្ញៀវទេសចរច្រើនជាងគេរួមមាន ខេត្តខេត្តកំពង់ឆ្នាំង មានចំនួន ១៦០ ៧៤០នាក់, បាត់ដំបង ១០៧ ២៥៤នាក់, សៀមរាប ១០៧ ០១៤នាក់, ពោធិ៍សាត់ ៨៣ ៨៩៦នាក់, កំពង់ចាម ៥៧ ៤៣០នាក់, ព្រៃវែង ៥៦ ០០២ នាក់, កំពង់ស្ពឺ ៤៩ ២៨៨នាក់, រាជធានីភ្នំពេញ ៣៨ ៩៧២នាក់ និងខេត្តបន្ទាយមានជ័យ ចំនួន ៣៧ ៣១៦នាក់។
សម្រាប់ចំនួនភ្ញៀវដែលចេញដើរកម្សាន្តក្នុងថ្ងៃទី១ នៃពិធីបុណ្យចូលឆ្នាំប្រពៃណីជាតិខ្មែរឆ្នាំ២០២២ នេះគឺមានភាពផុសផុលខ្លាំង និងមានចំនួនច្រើនជាងពេលមិនទាន់មានការកើតឡើងនូវជំងឺកូវីដ ១៩ នៅឆ្នាំ២០១៩ ទៅទៀត។ ជាក់ស្តែង តួលេខខាងលើ គឺកើនឡើងប្រមាណ ៥,៦៨ភាគរយបើធៀបនឹងថ្ងៃចូលឆ្នាំថ្ងៃទី១ កាលពីឆ្នាំ២០១៩ ដែលមានចំនួន ៨១៦ ៤៦៩នាក់។
សម្ទុះនៃកំណើនភ្ញៀវចេញដើរកម្សាន្តពេលនេះ គឺបន្ទាប់ពីការខកខានរយៈពេល ២ឆ្នាំដែលបណ្តាលមកពីការរីករាលដាលជំងឺកូវីដ១៩។ ម្យ៉ាងទៀតនៅតាមបណ្តាខេត្តនីមួយៗសុទ្ធតែមានរៀបចំឱ្យមានកន្លែងកម្សាន្តសម្រាប់ទទួលស្វាគមន៍ភ្ញៀវទេសចរផងដែរ។
រាជរដ្ឋាភិបាលកម្ពុជា កាលពីពេលថ្មីៗនេះក៏ទើបបានប្រកាសដកចេញកាតព្វកិច្ចនៃការពាក់ម៉ាស់ សម្រាប់ប្រជាពលរដ្ឋ ក្នុងខេត្តចំនួន ៤ រួមមាន ខេត្តព្រះវិហារ ស្ទឹងត្រែង រតនគិរី និងមណ្ឌលគិរី ផងដែរ។ ទោះយ៉ាងណានៅតាមកន្លែងកម្សាន្តនីមួយៗ ក៏ត្រូវតែគោរពនូវគោលការណ៍សុវត្ថិភាពអនាម័យ និងការអនុវត្ត SOP ដើម្បីទប់ស្កាត់ការរីករាលដាលជំងឺកូវីដ១៩ ផងដែរ៕
វីដេអូ៖