ទីក្រុងកូឡុំបូៈ ក្រុមហ៊ុនអាកាសចរណ៍ Sri Lankan Airlines ដែលខ្វះសាច់ប្រាក់របស់ប្រទេសស្រីលង្កាបានបង្ហាញផែនការកាលពីថ្ងៃព្រហស្បតិ៍ ដើម្បីជួលយន្តហោះរហូតដល់ ២១ គ្រឿងរយៈពេលត្រឹមតែ ២ ថ្ងៃ បន្ទាប់ពីរដ្ឋាភិបាលបានប្រកាសពីការខកខានសងបំណុលដែលជំពាក់បរទេសចំនួន ៥១ ពាន់លានដុល្លារ។
ប្រទេសដីកោះមួយនេះកំពុងស្ថិតក្នុងការធ្លាក់ចុះសេដ្ឋកិច្ចដែលរងផលប៉ះពាល់ខ្លាំងបំផុតរបស់ខ្លួនចាប់តាំងពីទទួលបានឯករាជ្យកាលពីឆ្នាំ ១៩៤៨ ដោយសារតែការខ្វះខាតធ្ងន់ធ្ងរនៃទំនិញសំខាន់ៗ និងការដាច់ភ្លើងជាប្រចាំដែលបណ្តាលឱ្យភាពរងទុក្ខវេទនារីករាលដាល។
ការតវ៉ាដ៏ធំបានអំពាវនាវឱ្យមានការលាលែងតំណែងពីរដ្ឋាភិបាលមួយនេះ ដែលបានអង្វរដល់ប្រជាជនស្រីលង្កានៅក្រៅប្រទេសឱ្យបញ្ជូនសាច់ប្រាក់ទៅផ្ទះដើម្បីជួយលើការចំណាយសម្រាប់ការនាំចូលសំខាន់។
ទោះបីជាមានវិបត្តិនេះក៏ដោយ ក៏ក្រុមហ៊ុនអាកាសចរណ៍ Sri Lankan Airlines ដែលគ្រប់គ្រងដោយរដ្ឋបានបង្ហាញពីផែនការបង្កើនយន្តហោះរបស់ខ្លួនពី ២៤ ទៅ ៣៥ គ្រឿងក្នុងរយៈពេល ៣ ឆ្នាំខាងមុខ និងដាក់ជំនួសយន្តហោះចាស់ៗមួយចំនួនរបស់ខ្លួន។
ក្រុមហ៊ុននេះបានឱ្យដឹងនៅក្នុងសេចក្ដីប្រកាសព័ត៌មានខ្លីមួយថា៖ «ក្រុមហ៊ុនអាកាសចរណ៍ Sri Lankan Airlines បានដាក់ចេញសំណើចំនួន ៤ សម្រាប់សំណើជួលយន្តហោះរហូតដល់ ២១ គ្រឿងដើម្បីគាំទ្រដល់យុទ្ធសាស្ត្រពាណិជ្ជកម្មរយៈពេលវែងរបស់ខ្លួន»។
សេចក្តីប្រកាសនេះបានធ្វើឡើង បន្ទាប់ពីរដ្ឋាភិបាលបានផ្អាកការសងប្រាក់កម្ចីបរទេសទាំងអស់របស់ខ្លួន មុនពេលការចរចាសម្រាប់ការរៀបចំរចនាសម្ព័ន្ធបំណុលជាមួយមូលនិធិរូបិយវត្ថុអន្តរជាតិនៅសប្តាហ៍ក្រោយ។
ក្រុមហ៊ុនអាកាសចរណ៍ជាតិមួយនេះមិនបានឱ្យដឹងថា ខ្លួនគ្រោងផ្តល់ហិរញ្ញប្បទានដល់ការជួលនេះដោយរបៀបណានោះទេ ដោយតារាងតុល្យការរបស់ខ្លួនបង្ហាញពីបំណុលចំនួន ១,៧ ពាន់លានដុល្លារ និងការខាតបង់ជាបន្តបន្ទាប់ចំនួន ១,៥៦ ពាន់លានដុល្លារ កាលពីខែមីនា ឆ្នាំ ២០២០។
នៅថ្ងៃដដែលនេះ ទីភ្នាក់ងារវាយតម្លៃអន្តរជាតិ Fitch ក៏បានទម្លាក់ចំណាត់ថ្នាក់មូលបត្រដែលមានតម្លៃ ១៧៥ លានដុល្លារដែលចេញដោយក្រុមហ៊ុនអាកាសចរណ៍មួយនេះពីចំណាត់ថ្នាក់ C មកនៅត្រឹម CC ដោយបង្ហាញថាក្រុមហ៊ុនអាកាសចរណ៍មួយនេះ «ជិតដល់ពេលមិនអាចសងបំណុលហើយ»។
ទីភ្នាក់ងារ Fitch បានឱ្យដឹងថាការវាយតម្លៃថ្មីរបស់ក្រុមហ៊ុនអាកាសចរណ៍នេះ លើបំណុលដែលត្រូវបង់នៅខែមិថុនា ឆ្នាំ ២០២៤ ស្របតាមការប្រកាសការខកខានសងបំណុលរបស់ប្រទេសស្រីលង្កា។
IMF បានជំរុញម្តងហើយម្តងទៀតឱ្យប្រទេសស្រីលង្កាធ្វើឯកជនភាវូបនីយកម្មក្រុមហ៊ុនអាកាសចរណ៍មួយនេះ ដោយលើកឡើងថា វាមានតម្លៃខ្ពស់ខ្លាំងពេក ដែលប្រទេសនេះមិនអាចធ្វើបានទេ។
ក្រុមហ៊ុនអាកាសចរណ៍នេះទទួលបានប្រាក់ចំណេញមុនពេលរដ្ឋាភិបាលលុបចោលកិច្ចព្រមព្រៀងគ្រប់គ្រងជាមួយក្រុមហ៊ុនអាកាសចរណ៍ Emirates នៃទីក្រុងឌូបៃកាលពីឆ្នាំ ២០០៨ បន្ទាប់ពីមានជម្លោះផ្ទាល់ខ្លួនជាមួយលោក Mahinda Rajapaksa ជានាយករដ្ឋមន្ត្រីបច្ចុប្បន្ន។
ក្រុមហ៊ុនអាកាសចរណ៍មួយនេះបានបដិសេធចំណាយលើថ្លៃសំបុត្រយន្តហោះរបស់អ្នកដំណើរ និងផ្តល់កន្លែងកៅអីរបស់ពួកគេដល់សមាជិកគ្រួសាររបស់លោក Rajapaksa ដែលវិលពីវិស្សមកាលនៅទីក្រុងឡុងដ៍។
លោក Rajapaksa បានដកនាយកប្រតិបត្តិក្រុមហ៊ុនអាកាសចរណ៍ Sri Lankan Airlines ដែលបានតែងតាំងដោយក្រុមហ៊ុនអាកាសចរណ៍ Emirates ហើយបានតែងតាំងលោក Nishantha Wickremasinghe ជាប្អូនថ្លៃរបស់ខ្លួនធ្វើជាប្រធានក្រុមហ៊ុននេះ។
ផែនការមុនក្នុងការជួលយន្តហោះ Airbus A350 ចំនួន ៨ គ្រឿង ក្នុងពេលកាន់កាប់របស់លោក Rajapaksa គឺស្ថិតនៅក្រោមការស៊ើបអង្កេតឧក្រិដ្ឋកម្មដែលកំពុងបន្តដំណើរការ។
លោក Kapila Chandrasena នាយកប្រតិបត្តិក្រុមហ៊ុនអាកាសចរណ៍នៅពេលនោះ និងភរិយារបស់លោកត្រូវបានចាប់ខ្លួនកាលពី ២ ឆ្នាំមុន បន្ទាប់ពីការស៊ើបអង្កេតអន្តរជាតិមួយបានរកឃើញថា ពួកគេបានទទួលប្រាក់សំណងខុសច្បាប់យ៉ាងហោចណាស់ ២ លានដុល្លារលើការតែងតាំងនេះ៕ LA