.jpg)
ទីក្រុងតែលអាវីវៈ ក្រុមហ៊ុនអាកាសចរណ៍ជាតិអ៊ីស្រាអែល El-Al បានឱ្យដឹងថា ការហោះហើរត្រង់លើកដំបូងរវាងទីក្រុងឆ្នេរសមុទ្រអ៊ីស្រាអែល Tel Aviv និងទីក្រុងរមណីយដ្ឋានសមុទ្រក្រហមរបស់ប្រទេសអេហ្ស៊ីប Sharm el-Sheikh ដ៏ពេញនិយមបំផុតបានចាប់ផ្ដើមកាលពីថ្ងៃអាទិត្យ។
ជើងហោះហើរត្រង់បានដំណើរការជាយូរមកហើយរវាងទីក្រុង Tel Aviv និងគែរចាប់តាំងពីប្រទេសអេហ្ស៊ីបកាលពីឆ្នាំ ១៩៧៩ បានក្លាយជាប្រទេសអារ៉ាប់ដំបូងគេដែលបានចុះហត្ថលេខាលើកិច្ចព្រមព្រៀងសន្តិភាពជាមួយអ៊ីស្រាអែល។
ប្រទេសទាំង ២ បានពង្រឹងទំនាក់ទំនងរបស់ពួកគេនៅពេលថ្មីៗនេះ។
លោក Naftali Bennett នាយករដ្ឋមន្ត្រីអ៊ីស្រាអែលបានទៅបំពេញទស្សនកិច្ច ២ ដងនៅអេហ្ស៊ីប បន្ទាប់ពីឡើងកាន់អំណាចកាលពីខែមិថុនា និងបានជួបលោកប្រធានាធិបតី Abdel Fattah al-Sisi កាលពីខែកញ្ញា។
កាលពីដើមខែតុលា យន្តហោះ ១ គ្រឿង Egyptair ជាក្រុមហ៊ុនអាកាសចរណ៍ដែលមានស្លាកសញ្ញាជាតិរបស់ប្រទេសអេហ្ស៊ីបបានចុះចតនៅអ៊ីស្រាអែលជាលើកដំបូងជាជើងហោះហើរមួយដែលត្រូវបានពិពណ៌នាថាជា «ប្រវត្តិសាស្ត្រ» ដោយអាជ្ញាធរអាកាសយានដ្ឋានអ៊ីស្រាអែល។
មុនពេលនោះ ជើងហោះហើរអេហ្ស៊ីបទៅកាន់ប្រទេសអ៊ីស្រាអែលត្រូវបានប្រតិបត្តិការដោយ Air Sinai ជាក្រុមហ៊ុនបុត្រសម្ព័ន្ធរបស់ក្រុមហ៊ុនអាកាសចរណ៍ Egyptair ដែលបានបង្កើតឡើងផ្តាច់មុខសម្រាប់ផ្លូវហោះហើររបស់អ៊ីស្រាអែល និងមិនចាំបាច់បង្ហាញទង់ជាតិអេហ្ស៊ីបនៅលើផ្នែកខាងក្រៅនៃយន្តហោះរបស់ខ្លួននោះទេ៕ LA
