ទីក្រុងប៉េកាំងៈ ទិន្នន័យតាមដានការហោះហើរបានបង្ហាញថា ក្រុមហ៊ុនអាកាសចរណ៍ China Eastern Airlines បានចាប់ផ្ដើមការហោះហើរយន្តហោះ Boeing 737-800 ឡើងវិញកាលពីថ្ងៃអាទិត្យរយៈពេលជាច្រើនសប្តាហ៍ បន្ទាប់ពីការធ្លាក់កាលពីខែមីនា ដែលបានសម្លាប់មនុស្ស ១៣២ នាក់ និងបានបណ្ដាលឱ្យយន្តហោះ ២២៣ គ្រឿងចតចោល។
ទិន្នន័យពីគេហទំព័រ Flightradar.com បានបង្ហាញថា ជើងហោះហើរ MU5843 របស់ក្រុមហ៊ុន China Eastern បានចាកចេញពីទីក្រុងភាគនិរតីនៃទីក្រុង គុនមីងនៅម៉ោង ៩:៥៨ នាទីព្រឹកម៉ោងក្នុងស្រុក ហើយបានចុះចតនៅទីក្រុង Chengdu នៅម៉ោង ១១:០៣ នាទីព្រឹក។
យន្តហោះប្រភេទ Boeing 737-800 ដែលមានអាយុកាល ៣ ឆ្នាំនេះ ក្រោយមកបានចាកចេញពីទីក្រុង Chengdu ផងដែរនៅភាគនិរតីនៃប្រទេសចិននៅម៉ោង ១:០២ នាទីរសៀលម៉ោងក្នុងស្រុក ហើយត្រឡប់ទៅទីក្រុង គុនមីង វិញដោយមានជើងហោះហើរបន្ថែមទៀតដែលគ្រោងធ្វើនៅថ្ងៃអង្គារ។
ជើងហោះហើរ MU5735 របស់ក្រុមហ៊ុនអាកាសចរណ៍ China Eastern បានធ្វើដំណើរពីទីក្រុងគុនមីងទៅកាន់ទីក្រុងក្វាងចូវកាលពីថ្ងៃទី ២១ ខែមីនា នៅពេលដែលវាបានធ្លាក់នៅជើងភ្នំ ដែលបែកបាក់ជាបំណែកតូចៗ និងបានសម្លាប់មនុស្ស ១៣២ នាក់ដែលជិះយន្តហោះ។
មូលហេតុនៃគ្រោះមហន្តរាយដែលធ្លាក់យន្តហោះស្លាប់ច្រើនបំផុតរបស់ប្រទេសចិនក្នុងរយៈពេលជាង ៣០ ឆ្នាំនេះ នៅមិនទាន់ដឹងនៅឡើយទេ។
ឧបទ្ទវហេតុនេះបានបណ្តាលឱ្យក្រុមហ៊ុនអាកាសចរណ៍ China Eastern បញ្ឈប់យន្តហោះស៊េរី Boeing 737-800 ទាំងអស់របស់ខ្លួន ដើម្បីត្រួតពិនិត្យសុវត្ថិភាព ខណៈដែលអាជ្ញាធរអាកាសចរណ៍បានប្តេជ្ញាត្រួតពិនិត្យរយៈពេល ២ សប្តាហ៍យ៉ាងទូលំទូលាយនៃក្រុមយន្តហោះដឹកអ្នកដំណើរដ៏ធំរបស់ប្រទេសមួយនេះ។
វាគឺជាការថយក្រោយដ៏សំខាន់មួយសម្រាប់ការត្រឡប់មកវិញនៃយន្តហោះ Boeing 737 MAX ទៅកាន់ប្រទេសចិន ដែលជាទីផ្សារធំជាងគេចុងក្រោយរបស់ក្រុមហ៊ុន៕ LA