.jpg)
ក្រុមប្រឹក្សាអភិវឌ្ឍន៍កម្ពុជា។ ហុង មិនា
ភ្នំពេញៈ ភាពធូរស្រាលការឆ្លងរាលដាល និងការគ្រប់គ្រងប្រកបដោយប្រសិទ្ធភាពនៃជំងឺកូវីដ ១៩ នៅកម្ពុជាបានធ្វើឱ្យចំនួនគម្រោងវិនិយោគនៅក្រៅតំបន់សេដ្ឋកិច្ចពិសេសដែលអនុម័តដោយក្រុមប្រឹក្សាអភិវឌ្ឍន៍កម្ពុជា (CDC) រយៈពេល ២ ខែ ដើមឆ្នាំ ២០២២ មានចំនួន ៣៥ គម្រោង ស្មើនឹងទុនវិនិយោគសរុបជាង ២ ពាន់លានដុល្លារ កើនឡើងជាង ២៣៦ ភាគរយបើធៀបនឹងរយៈពេលដូចគ្នាឆ្នាំ ២០២១។ នេះបើតាមក្រសួងសេដ្ឋកិច្ច និងហិរញ្ញវត្ថុ។
របាយការណ៍និន្នាការសេដ្ឋកិច្ច-សង្គម ប្រចាំខែកុម្ភៈ ឆ្នាំ ២០២២ របស់ក្រសួងសេដ្ឋកិច្ច និងហិរញ្ញវត្ថុ ផ្សព្វផ្សាយកាលពីថ្ងៃទី ១៨ ខែមេសា ឱ្យដឹងថា ក្នុងរយៈពេល ២ ខែឆ្នាំ ២០២២ ស្ថានភាពវិនិយោគបានបង្ហាញពីភាពល្អប្រសើរខ្លះៗជាក់ស្តែងគម្រោងវិនិយោគឯកជនក្រៅតំបន់សេដ្ឋកិច្ចពិសេស ដែលទទួលបានការអនុញ្ញាតដោយក្រុមប្រឹក្សាអភិវឌ្ឍន៍កម្ពុជាមានចំនួន ៣៥ គម្រោងកើនឡើង ១៤ គម្រោងដែលមានទុនវិនិយោគសរុបជាង ២ ពាន់លានដុល្លារកើន ២៣៦,៥ ភាគរយបើធៀបនឹងរយៈពេលដូចគ្នាឆ្នាំមុន។ គម្រោងទាំង ៣៥ មានលទ្ធភាពបង្កើតការងារបានប្រមាណ ៣១ ពាន់នាក់ កើនឡើង ៧៥,៣ ភាគរយ។
ក្រសួងសេដ្ឋកិច្ចលើកឡើងថា បើទោះបីមិនទាន់មានភាពល្អប្រសើរដូចនៅមុនពេលមានវិបត្តិជំងឺកូវីដ ១៩ ប៉ុន្តែសេដ្ឋកិច្ចប្រទេសកម្ពុជាចាប់ផ្តើមបង្ហាញភាពវិជ្ជមានឡើងវិញជាបណ្តើរៗហើយ។
ក្រសួងបញ្ជាក់ថា៖ «ជារួមនៅឆ្នាំ ២០២២ សេដ្ឋកិច្ចកម្ពុជារំពឹងថា នឹងបន្តមានកំណើនវិជ្ជមាន ដោយសារការរំពឹងទុកការកើនឡើងនៃតម្រូវការសកល និងទំនុកចិត្តរបស់វិនិយោគិនបរទេស ដែលជាសមិទ្ធផលនៃការគ្រប់គ្រងស្ថានភាពការរីករាលដាលជំងឺកូវីដ ១៩ បានល្អ»។
យោងតាមក្រសួងសេដ្ឋកិច្ច ដើម្បីស្តារសេដ្ឋកិច្ចឡើងវិញពីវិបត្តិដែលបណ្តាលមកពីការរីករាលដាលជំងឺកូវីដ ១៩ រដ្ឋាភិបាលកម្ពុជាបានដាក់ចេញនូវយុទ្ធសាស្ត្រថ្មីៗ ពិសេសទៅលើវិស័យដែលជាចន្ទល់នៃសេដ្ឋកិច្ច មានដូចជា វិស័យកាត់ដេរ មិនមែនកាត់ដេរ ទេសចរណ៍ និងកសិកម្ម ជាដើម។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី ១៩ ខែមេសាថា ការគ្រប់គ្រងការរីករាលដាលជំងឺកូវីដ ១៩ ដោយប្រសិទ្ធភាព, អត្រាភាគរយខ្ពស់នៃចំនួនប្រជាជនកម្ពុជាចាក់វ៉ាក់សាំងប្រឆាំងនឹងជំងឺកូវីដ-១៩, ការចូលជាធរមាននៃកិច្ចព្រមព្រៀងពាណិជ្ជកម្មសេរីជាមួយប្រទេសចិន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ព្រមទាំងការដាក់ចេញជាបន្តបន្ទាប់នូវយុទ្ធសាស្ត្រ និងច្បាប់វិនិយោគថ្មីៗបានធ្វើឱ្យវិនិយោគក្នុងស្រុក និងបរទេសកាន់តែច្រើនបញ្ចេញទុនវិនិយោគនៅកម្ពុជា។ លោកបន្ថែមទៀតថា ក្រៅពីនេះកម្ពុជាក៏កំពុងទទួលបានភាពចំណេញផ្នែកទីផ្សារពីប្រទេសកំពុងមានវិបត្តិមួយចំនួនដូចជា មីយ៉ាន់ម៉ា ផងដែរ។
លោកប្រាប់ថា៖ «តាមស្ថានភាពបច្ចុប្បន្ន ខ្ញុំមើលឃើញថា ចំនួនក្រុមហ៊ុនដែលមកដាក់ពាក្យស្នើសុំវិនិយោគនៅកម្ពុជានឹងមានចំនួនកាន់តែច្រើននៅពេលខាងមុខ ខណៈកម្ពុជាបានត្រៀមរួចហើយក្នុងការទទួលកំណើនការវិនិយោគ»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានលើកឡើងថា កំណើនគម្រោងវិនិយោគដែលមានអនុម័តដោយ CDC បង្ហាញថា ស្ថានភាពការវិនិយោគនៅកម្ពុជាចាប់ផ្តើមងើបចេញពីឥទ្ធិពលនៃវិបត្តិជំងឺកូវីដ ១៩ វិញហើយ ខណៈគ្រប់ការបណ្តាក់ទុនវិនិយោគសុទ្ធតែផ្តល់ផលប្រយោជន៍ច្រើនចំពោះកំណើនសេដ្ឋកិច្ចកម្ពុជា។
លោកបញ្ជាក់ថា៖ «ការវិនិយោគថ្មីៗនឹងជួយបង្កើតការងារបន្ថែម ព្រមទាំងជួយជំរុញឱ្យចរន្តនៃការចំណាយនៅជុំវិញផលិតកម្មផងដែរ»។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន នៅក្នុងពិធីផ្សព្វផ្សាយដាក់ឱ្យអនុវត្តជាផ្លូវការនូវ «ក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣» កាលពីចុងខែធ្នូ ឆ្នាំ ២០២១ បាននិយាយថា វិបត្តិសេដ្ឋកិច្ច និងសង្គមដែលបណ្តាលមកពីឥទ្ធិពលជំងឺកូវីដ ១៩ នារយៈពេល ២ ឆ្នាំកន្លងមក បានធ្វើឱ្យកម្ពុជាទទួលបានបទពិសោធជាច្រើន ជាពិសេសការរៀបចំនូវយុទ្ធសាស្ត្រថ្មីៗ ដើម្បីពង្រីកវិសាលភាពបណ្តាវិស័យដែលជាចន្ទល់នៃកំណើនសេដ្ឋកិច្ច តាមរយៈការកែទម្រង់មុតស្រួចសំដៅបង្កើនការធ្វើពិពិធកម្មសេដ្ឋកិច្ច និងលើកកម្ពស់ភាពប្រកួតប្រជែង ក៏ដូចជាពង្រឹងភាពធន់សម្រាប់ការអភិវឌ្ឍសេដ្ឋកិច្ច ប្រកបដោយចីរភាពសម្រាប់រយៈពេលវែង នៅក្នុងបរិការណ៍ដែលសកលលោកដំណើរការប្រកបដោយអន្តរកម្មខ្ពស់ និងការពឹងផ្អែកគ្នាទៅវិញទៅមកកាន់តែខ្លាំង។
លោកបន្ថែមថា៖ «ភាពខ្លាំងនឹងក្លាយជាកាតាលីករ និងជាកត្តាជំរុញដ៏សំខាន់សម្រាប់ការស្តារ និងជំរុញកំណើនសេដ្ឋកិច្ចកម្ពុជាឡើងវិញ»។
ឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគឯកជននៅក្រៅតំបន់សេដ្ឋកិច្ចសរុប ១០៨ គម្រោង ធ្លាក់ចុះ ៤៦ គម្រោងបើធៀបនឹងឆ្នាំ ២០២០ ដោយមានទុនវិនិយោគ ១ ៧១៩ លានដុល្លារ ធ្លាក់ ៧២,៦ ភាគរយ។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ៕
