.jpg)
បុគ្គលិកធនាគាររបស់ប្រទេសរុស្ស៊ីរៀបចំធនបត្ររូប្លិ៍របស់ប្រទេសរុស្ស៊ី។ AFP
ទីក្រុងប៉ារីសៈ អ្នកសេដ្ឋកិច្ចឈានមុខគេកាលពីថ្ងៃអង្គារបានជំរុញឱ្យមេដឹកនាំប្រទេសមានសេដ្ឋកិច្ចឈានមុខក្នុងពិភពលោក (G20) បង្កើតការចុះបញ្ជីទ្រព្យសម្បត្តិពិភពលោក សម្រាប់ការតាមដានអ្នកគេចពន្ធដែលអាចដាក់សម្ពាធលើប្រទេសរុស្ស៊ីលើការឈ្លានពានអ៊ុយក្រែនដោយការលាតត្រដាងទ្រព្យសម្បត្តិលាក់កំបាំងរបស់ពួកអ្នកមាន។
លោក Joseph Stiglitz សេដ្ឋវិទូដែលល្បីល្បាញនៃសហរដ្ឋអាមេរិក និងលោក Thomas Piketty នៃប្រទេសបារាំងក្នុងចំណោមអ្នកផ្សេងទៀតបានធ្វើការអំពាវនាវនៅក្នុងលិខិតចំហមួយដែលត្រូវបានបោះពុម្ពនៅក្នុងកាសែត The Guardian មុនពេលកិច្ចប្រជុំហិរញ្ញវត្ថុ G20 នៅថ្ងៃពុធ។
លិខិតនោះបាននិយាយថា ការកសាងលើវឌ្ឍនភាពនៃការចែករំលែកព័ត៌មានហិរញ្ញវត្ថុក្នុងរយៈពេលប៉ុន្មានឆ្នាំចុងក្រោយនេះ «វាដល់ពេលហើយសម្រាប់ការចុះបញ្ជីទ្រព្យសម្បត្តិសកល ដើម្បីកំណត់គោលដៅទ្រព្យសម្បត្តិលាក់កំបាំង»។
វាត្រូវបានចុះហត្ថលេខាដោយសមាជិកនៃគណៈកម្មការឯករាជ្យសម្រាប់កំណែទម្រង់ពន្ធសាជីវកម្មអន្តរជាតិដែលជាក្រុមវិភាគ។
មហាអំណាចលោកខាងលិចបានដាក់ចេញទណ្ឌកម្មដ៏តឹងតែងជាបន្តបន្ទាប់ប្រឆាំងនឹងប្រធានាធិបតីរុស្ស៊ី លោក វ្ល៉ាឌីមៀ ពូទីន និងអ្នកជិតស្និទ្ធរបស់លោកចាប់តាំងពីប្រធានាធិបតីរូបនេះបានបើកការឈ្លានពានលើប្រទេសអ៊ុយក្រែនកាលពីចុងខែកុម្ភៈ។
គោលដៅសម្រាប់ការដាក់ទណ្ឌកម្មទាំងនោះរួមមានម្ចាស់ក្លិបបាល់ទាត់ Chelsea នៅចក្រភពអង់គ្លេស គឺលោក Roman Abramovich ដែលគេស្គាល់ថា មានសម្ព័ន្ធភាពស្អិតល្មួតជាមួយប្រធានាធិបតីរុស្ស៊ី លោក ពូទីន។
លិខិតនោះបាននិយាយថា មហាសេដ្ឋីរុស្ស៊ីត្រូវបានគេប៉ាន់ប្រមាណថា មានទ្រព្យសម្បត្តិយ៉ាងហោចណាស់ ១ ពាន់ពាន់លានដុល្លារនៅបរទេស ដែលជារឿយៗត្រូវបានលាក់បាំងនៅក្នុងក្រុមហ៊ុនដែលចុះបញ្ជីនៅតំបន់ឈូងសមុទ្រដែលមានកម្មសិទ្ធិពិតគឺពិបាកកំណត់។
លិខិតចំហនោះបានបន្ថែមថា៖ «នៅលើជញ្ជាំងនៃភាពស្រអាប់នេះ កិច្ចខិតខំប្រឹងប្រែងរបស់ប្រទេសដែលចង់ដាក់ទណ្ឌកម្មទាំងនេះ ឥឡូវនេះកំពុងតែជំពប់ដួល»។
ក្រុមអ្នកសេដ្ឋកិច្ចបានបន្ថែមថា ជាមួយនឹងចំនួនប្រជាជនដែលទទួលរងពីផលប៉ះពាល់នៃជំងឺរាតត្បាតកូវីដ ១៩«ការឈ្លានពានរបស់រុស្ស៊ីលើប្រទេសអ៊ុយក្រែនបានធ្វើឱ្យបរិបទដ៏គួរឱ្យព្រួយបារម្ភនេះកាន់តែធ្ងន់ធ្ងរឡើង» ជាមួយនឹងការកើនឡើងតម្លៃ និងអសន្តិសុខ។
ក្នុងអ្នកសេដ្ឋកិច្ចបានអះអាងថា៖ «ឥឡូវនេះយើងមានឱកាសពិសេសមួយដើម្បីធ្វើវឌ្ឍនភាពលើការអនុវត្តការចុះបញ្ជីទ្រព្យសម្បត្តិសកល» ដើម្បីកាត់តាមរយៈបណ្តាញនៃក្រុមហ៊ុនជួរមុខ និងភ្ជាប់ទ្រព្យសម្បត្តិគ្រប់ប្រភេទរបស់ពួកគេទៅកាន់ម្ចាស់ពិតដែលមានសិទ្ធិកាន់កាប់ពេញលេញ៕ RR
