.jpg)
ប្រជាជនស្រីលង្កាឈរតម្រង់ជួររង់ចាំវេន ដើម្បីទិញប្រេងកាលពីខែមុន។ AFP
ទីក្រុងកូឡុំបូៈ ក្រុមហ៊ុនលក់រាយប្រេងឥន្ធនៈដ៏សំខាន់មួយនៅប្រទេសស្រីលង្កាបានបង្កើនតម្លៃរហូតដល់ ៣៥ ភាគរយកាលពីថ្ងៃចន្ទ ខណៈដែលរដ្ឋាភិបាលដែលខ្វះខាតសាច់ប្រាក់មួយនេះត្រូវបានកំណត់នឹងបើកកិច្ចពិភាក្សាថវិកាសង្គ្រោះដ៏សំខាន់ជាមួយមូលនិធិរូបិយវត្ថុអន្តរជាតិ (IMF)។
ប្រទេសស្រីលង្កាកំពុងស្ថិតក្នុងវិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីការទទួលបានឯករាជ្យពីចក្រភពអង់គ្លេសកាលពីឆ្នាំ ១៩៤៨។ វិបត្តិនេះបានបណ្ដាលឱ្យមានការខ្វះខាតទំនិញសំខាន់ៗ ដូចជា ប្រេងឥន្ធនៈ អាហារ និងថ្នាំពេទ្យ។
Lanka IOC ដែលជាក្រុមហ៊ុនលក់រាយប្រេងឥន្ធនៈមួយ ដែលមានចំណែក ១ ភាគ ៣ នៃទីផ្សារក្នុងស្រុក បានឱ្យដឹងថា ខ្លួនបានបង្កើនតម្លៃប្រេងម៉ាស៊ូតពី ៧៥ រូពៀដល់ ៣២៧ រូពៀក្នុង ១ លីត្រ ខណៈដែលប្រេងសាំងបានកើនឡើងពី ៣៥ រូពៀដល់ ៣៦៧ រូពៀ (១,២០ ដុល្លារ)។
ក្រុមហ៊ុនរដ្ឋ Ceylon Petroleum Corporation ដែលមានចំណែកទីផ្សារ ២ ភាគ ៣ នៃទីផ្សារ និងការដាក់កម្រិតប្រេងឥន្ធនៈកាលពីសប្តាហ៍មុនមិនបានដំឡើងថ្លៃភ្លាមៗទេ ប៉ុន្តែស្ថានីយចាក់សាំងភាគច្រើនរបស់ខ្លួនគឺគ្មានប្រេងឥន្ធនៈនោះទេ។
Lanka IOC ដែលជាក្រុមហ៊ុនបុត្រសម្ព័ន្ធក្នុងស្រុករបស់ក្រុមហ៊ុន Indian Oil Corporation បានឱ្យដឹងថា ការធ្លាក់ចុះតម្លៃយ៉ាងខ្លាំងនៃរូបិយប័ណ្ណក្នុងស្រុកបានបង្ខំឱ្យខ្លួនអនុវត្តការកែប្រែចុងក្រោយនេះ ដែលមានរយៈពេល ៣ សប្តាហ៍បន្ទាប់ពីការបង្កើនតម្លៃ ២០ ភាគរយ។
ចាប់តាំងពីដើមឆ្នាំនេះតម្លៃប្រេងឥន្ធនៈបានកើនឡើង ៩០ ភាគរយ ខណៈដែលប្រេងម៉ាស៊ូតដែលប្រើជាទូទៅសម្រាប់ការដឹកជញ្ជូនសាធារណៈបានកើនឡើង ១៣៨ ភាគរយ។
ក្រុមហ៊ុននេះបានឱ្យដឹងថា៖ «ការធ្លាក់ចុះរូបិយប័ណ្ណរូពៀជាង ៦០ ភាគរយក្នុងអំឡុងពេល ១ ខែចុងក្រោយនេះបានបង្ខំឱ្យក្រុមហ៊ុន Lanka IOC បង្កើនតម្លៃលក់រាយរបស់ខ្លួនម្តងទៀតដោយចាប់ផ្ដើមអនុវត្តចាប់ពីថ្ងៃនេះទៅ»។
ការកើនឡើងនេះបានធ្វើឡើងនៅពេលដែល លោក Ali Sabry រដ្ឋមន្ត្រីក្រសួងហិរញ្ញវត្ថុថ្មីរបស់ប្រទេសស្រីលង្កាបានដឹកនាំគណៈប្រតិភូទៅទីក្រុងវ៉ាស៊ីនតោន ដើម្បីស្វែងរកប្រាក់ពី ៣ ពាន់លានដុល្លារទៅ ៤ ពាន់លានដុល្លារពី IMF ដើម្បីជម្នះនឹងវិបត្តិសមតុល្យការទូទាត់ និងបង្កើនទុនបម្រុងដែលអស់។
រដ្ឋាភិបាលកាលពីសប្តាហ៍មុនបានប្រកាសពីការខកខានសងបំណុល ដោយសារតែបំណុលបរទេសចំនួនច្រើនរបស់ខ្លួន ហើយផ្សារហ៊ុនកូឡុំបូបានប្រកាសថា ការជួញដូរនឹងត្រូវផ្អាករយៈពេល ៥ ថ្ងៃចាប់ពីថ្ងៃចន្ទ ដោយសារតែមានការបារម្ភអំពីការក្ស័យធនទីផ្សារ។
ប្រទេសស្រីលង្កាស្ថិតក្នុងវិបត្តិសេដ្ឋកិច្ចយ៉ាងធ្ងន់ធ្ងរពេលដែលទទួលរងផលប៉ះពាល់ ដោយសារការរីករាលជំងឺកូវីដ ១៩ ដែលកាត់បន្ថយការផ្ញើប្រាក់ពីបរទេសរបស់កម្មករនៅក្រៅប្រទេស និងធ្វើឱ្យជាប់គាំងវិស័យទេសចរណ៍ដែលរកប្រាក់ច្រើនជាប្រភពដ៏សំខាន់នៃប្រាក់ដុល្លារសម្រាប់សេដ្ឋកិច្ច៕ LA
វីដេអូ៖
