ទីផ្សារភាគហ៊ុនបានបន្តធ្លាក់ចុះដោយសារសម្ពាធបញ្ហាភូមិសាស្ត្រនយោបាយរវាងរុស្ស៊ី និងអ៊ុយក្រែន និងភាពមិនច្បាស់លាស់នៃការដំឡើងអត្រាការប្រាក់។ កាលពីថ្ងៃអង្គារ សន្ទស្សន៍ S&P500 ធ្លាក់ចុះ ០.០២% សន្ទស្សន៍ Nasdaq ធ្លាក់ចុះ ០.១៤% និងសន្ទស្សន៍ DJIA ធ្លាក់ចុះ ០.១១%។
កងកម្លាំងរបស់ប្រទេសរុស្ស៊ីបានបើកការវាយលុកម្តងទៀតនៅភាគខាងកើតនៃអ៊ុយក្រែន ដែលត្រូវបានចាត់ទុកថា ជាដំណាក់កាលទី ២ នៃសង្គ្រាម។ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ប្រទេសរុស្ស៊ីបានចាប់ផ្តើមសមរភូមិនៅ Donbas នៅភាគខាងកើតនៃប្រទេសអ៊ុយក្រែនកាលពីថ្ងៃចន្ទ ហើយកងទ័ពរុស្ស៊ីឥឡូវនេះកំពុងផ្តោតលើការវាយលុកនេះ។ ចំណែកអ៊ុយក្រែន លោក Zelenskyy ក៏បានបញ្ជាក់ថា អ៊ុយក្រែននឹងធ្វើការវាយប្រហារវិញ ហើយត្រូវតែការពារទឹកដីរបស់ខ្លួន។
អត្រាអតិផរណាប្រចាំឆ្នាំរបស់សហរដ្ឋអាមេរិកបានកើនដល់ ៨,៥% ដែលបង្ហាញនូវសញ្ញាកាន់តែច្បាស់នៃការដំឡើងអត្រាការប្រាក់ ដែលកន្លងមកមានព័ត៌មាន និងតម្រុយជាច្រើនពីមន្ត្រីធនាគារកណ្ដាលសហរដ្ឋអាមេរិកថា ខ្លួននឹងដំឡើងអត្រាការប្រាក់ចំនួន ០,៥០%។ ម្យ៉ាងទៀត បណ្ណបំណុលរតនាគាររយៈពេល ១០ ឆ្នាំ របស់អាមេរិកមានការកើនឡើង ដោយបច្ចុប្បន្នកំពុងជួញដូរក្នុងតម្លៃ ២.៨៣៨% ដែលកើនពីតម្លៃ ១,៧០៩០% កាលពីថ្ងៃទី ១ ខែមីនា ឆ្នាំ ២០២២។ នេះបង្ហាញថា តម្រូវការនៃបណ្ណបំណុលមានការកើនឡើង ហើយបន្ថែមសម្ពាធទៅលើទីផ្សារភាគហ៊ុន។ សម្រាប់ការវិភាគជួញដូរក្នុងសប្តាហ៍នេះ វិនិយោគិនអាចលក់សន្ទស្សន៍ហ៊ុន Nasdaq (Nas 100) នៅកម្រិត ១៤ ០០០ ក្នុង ១ សន្ទស្សន៍ហ៊ុន ដោយកំណត់មុខងារការពារហានិភ័យនៅកម្រិត ១៤ ១៧០ និងមុខងារទាញយកប្រាក់ចំណេញនៅកម្រិត ១៣ ៦០០។