.jpg)
លោកស្រី Kristalina Georgieva នាយិកាគ្រប់គ្រងនៃមូលនិធិរូបិយវត្ថុអន្តរជាតិ (IMF)។ AFP
ទីក្រុងប៉ារីសៈ IMF បានឱ្យដឹងកាលពីថ្ងៃអង្គារថា សង្គ្រាមនៅក្នុងប្រទេសអ៊ុយក្រែនដាក់សម្ពាធយ៉ាងខ្លាំងលើកំណើនសេដ្ឋកិច្ចក្នុងតំបន់ចាយប្រាក់អឺរ៉ូ ខណៈជម្លោះបង្កការបំផ្លិចបំផ្លាញដល់តម្លៃថាមពល និងវិស័យផលិតកម្ម។
មូលនិធិរូបិយវត្ថុអន្តរជាតិ (IMF) បានកែតម្រូវទម្លាក់ការព្យាករកំណើនសេដ្ឋកិច្ចតំបន់ចាយប្រាក់អឺរ៉ូរបស់ខ្លួនសម្រាប់ឆ្នាំ ២០២២ ពី ៣,៩ ភាគរយ មកនៅត្រឹម ២,៨ ភាគរយក្នុងការប៉ាន់ប្រមាណកាលពីខែមករាក្នុងនោះអាល្លឺម៉ង់ជាប្រទេសដែលមានសេដ្ឋកិច្ចធំជាងគេរបស់តំបន់នេះទទួលរងផលប៉ះពាល់យ៉ាងខ្លាំង។
IMF បានឱ្យដឹងនៅក្នុងរបាយការណ៍ចក្ខុវិស័យសេដ្ឋកិច្ច ពិភពលោករបស់ខ្លួនថា៖ «បណ្តាញដ៏សំខាន់ដែលតាមរយៈសង្គ្រាមនៅអ៊ុយក្រែន និងការដាក់ទណ្ឌកម្មលើប្រទេសរុស្ស៊ីប៉ះពាល់ដល់សេដ្ឋកិច្ចតំបន់ចាយប្រាក់អឺរ៉ូកំពុងបង្កើនតម្លៃថាមពលសកល និងសន្តិសុខថាមពល»។
IMF បានឱ្យដឹងថា សង្គ្រាមនេះបានធ្វើឱ្យប្រទេសមួយចំនួនដូចជាអ៊ីតាលី និងអាល្លឺម៉ង់រងផលប៉ះពាល់ខ្លាំងជាងបណ្ដាប្រទេសនៅអឺរ៉ុបផ្សេងទៀត ដោយសារតែប្រទេសទាំងនោះមាន «វិស័យផលិតកម្មធំ ហើយពឹងផ្អែកខ្លាំងលើការនាំចូលថាមពលពីប្រទេសរុស្ស៊ី»។
សេដ្ឋកិច្ចរបស់ប្រទេសអាល្លឺម៉ង់ នៅពេលនេះត្រូវបានរំពឹងថានឹងកើនឡើង ២,១ ភាគរយនៅឆ្នាំនេះ ធ្លាក់ចុះពីការព្យាករពីមុន ៣,៨ ភាគរយ។ ប្រទេសអ៊ីតាលីក៏នឹងធ្លាក់ចុះផងដែរជាមួយនឹងកំណើន ២,៣ ភាគរយធៀបការព្យាករពីមុន ៣,៨ ភាគរយ។
បន្ទាប់ពីការលុកលុយរបស់ទីក្រុងម៉ូស្គូកាលពីខែកុម្ភៈ បណ្ដាប្រទេសលោកខាងលិចរួមទាំងបណ្ដាប្រទេសចាយប្រាក់អឺរ៉ូ បានដាក់ទណ្ឌកម្មលើប្រព័ន្ធហិរញ្ញវត្ថុ វិស័យអាកាសចរណ៍ និងផ្នែកសំខាន់ៗផ្សេងទៀតនៃសេដ្ឋកិច្ចរបស់រុស្ស៊ី។
ជិតពីរខែក្រោយមកតម្លៃកើនឡើង។ តម្លៃប្រេងនៅតែលើសពី ១០០ ដុល្លារក្នុង ១ បារ៉ែល បន្ទាប់ពីកើនឡើងដល់កម្រិតខ្ពស់ជាប្រវត្តិសាស្ត្រកាលពីខែមីនា ខណៈតម្លៃឧស្ម័ន ស្រូវសាលី អាលុយមីញ៉ូម រ៉ែនីកែល និងវត្ថុធាតុដើមផ្សេងទៀតបានកើនឡើង។
ជាលទ្ធផល អតិផរណាតម្លៃទំនិញប្រើប្រាស់ក្នុងតំបន់ចាយប្រាក់អឺរ៉ូបានកើនឡើងដល់ ៧,៥ ភាគរយដែលជាកម្រិតខ្ពស់បំផុតមិនធ្លាប់មាន។
លោក Pierre-Olivier Gourinchas ប្រធានសេដ្ឋវិទូរបស់ IMF បានឱ្យដឹងថា ការព្យាករនេះបង្ហាញការធ្លាក់ចុះ ប៉ុន្តែមិនមានការដើរថយក្រោយនៃសេដ្ឋកិច្ច នៅក្នុងតំបន់អឺរ៉ូនោះទេ។
លោក Gourinchas បានប្រាប់ទីភ្នាក់ងារព័ត៌មាន AFP ក្នុងបទសម្ភាសមួយនៅទីក្រុងវ៉ាស៊ីនតោនថា ហានិភ័យសំខាន់ចំពោះចក្ខុវិស័យនេះ គឺការបង្កើនល្បឿនការដាក់ទណ្ឌកម្ម ជាពិសេសការដាក់ទណ្ឌកម្មសេដ្ឋកិច្ចលើឧស្ម័នរបស់ប្រទេសរុស្ស៊ី ដែលនឹងបណ្តាលឱ្យមានការធ្លាក់ចុះ «ធ្ងន់ធ្ងរ» ក្នុងរយៈពេលខ្លីនៅក្នុងបណ្ដាប្រទេសជាច្រើន ដូចជាប្រទេសអាល្លឺម៉ង់ ដែលពឹងផ្អែកខ្លាំងលើការនាំចូលទាំងនោះ។
ជាលទ្ធផល «យើងនឹងមានការពិនិត្យឡើងវិញនូវការធ្លាក់ចុះគួរឱ្យកត់សម្គាល់នៃការព្យាករសេដ្ឋកិច្ចនេះ សម្រាប់តំបន់ចាយប្រាក់អឺរ៉ូ»។
ប្រសិនបើការប្រើប្រាស់ក្នុងស្រុក និងទំនុកចិត្តធ្លាក់ចុះនោះក៏អាចបន្ថយល្បឿនកំណើនផងដែរ ដែលនឹងធ្វើឱ្យធនាគារកណ្តាលអឺរ៉ុប (ECB) ស្ថិតក្នុង «ស្ថានភាពដ៏លំបាក»។
ECB កាលពីខែមុនបានកាត់បន្ថយការព្យាករកំណើនរបស់ខ្លួនផងដែរ ហើយបានព្រមានថា អតិផរណានឹងកើនឡើងនៅក្នុងតំបន់ចាយប្រាក់អឺរ៉ូ ប៉ុន្តែវាមិនទាន់អនុវត្តតាម ធនាគារកណ្តាលអាមេរិកក្នុងការបង្កើនអត្រាការប្រាក់ដើម្បីគ្រប់គ្រងតម្លៃនោះទេ។
លោក Gourinchas បានថ្លែងថា៖ «នៅពេលនេះ ដោយសារការធ្លាក់ចុះ និងការពិតដែលថាអតិផរណាត្រូវបានប្រមូលផ្តុំនៅក្នុងវិស័យមួយចំនួន... វាមិនចាំបាច់ក្នុងការចាប់ផ្តើមរឹតបន្តឹងគោលនយោបាយរូបិយវត្ថុឱ្យបានលឿននោះទេ»។
ការអូសបន្លាយ សង្គ្រាមក្នុងប្រទេសអ៊ុយក្រែនធ្វើឡើងនៅពេលដែលសេដ្ឋកិច្ចតំបន់ចាយប្រាក់អឺរ៉ូត្រូវបានកំណត់ឱ្យស្ទុះងើបឡើងវិញទាំងស្រុងពីការធ្លាក់ចុះដែលបានទទួលរងផលប៉ះពាល់ដោយសារតែការរីករាលដាលជំងឺកូវីដ ១៩ កាលពីឆ្នាំ ២០២០។
IMF បានព្យាករកាលពីខែតុលាឆ្នាំមុនថាកំណើនសេដ្ឋកិច្ចនៅតំបន់ចាយប្រាក់អឺរ៉ូនឹងមានចំនួន ៤,៣ ភាគរយក្នុងឆ្នាំ ២០២២ មុនពេលបន្ទាបការព្យាករកាលពីខែមករាដោយសារតែវិបត្តិខ្សែចង្វាក់ផ្គត់ផ្គង់សកល និងការរីករាលដាលការឆ្លងវីរុសបំប្លែងថ្មីអូមីក្រុង។
របាយការណ៍ចុងក្រោយរបស់ IMF ក៏បានទម្លាក់ចក្ខុវិស័យកំណើនសេដ្ឋកិច្ចរបស់តំបន់ចាយប្រាក់អឺរ៉ូសម្រាប់ឆ្នាំ ២០២៣ មកនៅត្រឹម ២,៣ ភាគរយ ធ្លាក់ចុះពី ២,៥ ភាគរយកាលពីមុន។
ប៉ុន្តែ IMF បានបង្កើនការព្យាកររបស់ខ្លួនបន្តិចសម្រាប់ប្រទេសអាល្លឺម៉ង់ដល់ ២,៧ ភាគរយនៅឆ្នាំក្រោយ។
ទោះជាយ៉ាងណាក៏ដោយ កំណើនសេដ្ឋកិច្ចរបស់ប្រទេសអ៊ីតាលីនឹងធ្លាក់ចុះបន្ថែមទៀតមកនៅត្រឹម ១,៧ ភាគរយប៉ុណ្ណោះ៕ LA
