ភ្នំពេញ៖ ប្រេងសាំងធម្មតា មានតម្លៃ ៥ ១៥០រៀល ក្នុងមួយលីត្រ ខណៈប្រេងម៉ាស៊ូត បានហក់ឡើងជាង ៥៥០០រៀលក្នុងមួយលីត្រ ចាប់ពីថ្ងៃទី២១ ដល់ថ្ងៃទី៣០ ខែមេសា ឆ្នាំ២០២២ សម្រាប់ទីផ្សារលក់រាយនៅកម្ពុជា ។
តម្លៃប្រេងឥន្ធនៈ បានឡើងថ្លៃមកវិញ បន្ទាប់ចុះថ្លៃកាលពី១០ថ្ងៃមុន ដោយប្រេងសាំងធម្មតា បានឡើង១០០រៀល ពី៥០៥០រៀល ដល់៥១៥០រៀល ក្នុងមួយលីត្រ និងប្រេងម៉ាស៊ូត បានឡើង៤០០រៀល ពីតម្លៃ៥១០០រៀល ដល់៥៥០០រៀល ក្នុងមួយលីត្រ។ នេះបើតាមការជូនដំណឹងពីក្រសួងពាណិជ្ជកម្មនៅថ្ងៃទី២១ ខែមេសាឆ្នាំ ២០២១នេះ។
ការឡើងថ្លៃនៃប្រេងឥន្ធនៈ បានធ្វើឱ្យប៉ះពាល់យ៉ាងច្រើន រាប់ចាប់ពីប្រជាពលរដ្ឋ ដែលមានអាជីវកម្មតូចតាច រហូតដល់សហគ្រាសធំៗស្ទើរគ្រប់វិស័យ ដោយសារចំណាយថ្លៃដើមកាន់តែច្រើន ប្រាក់ចំណេញកាន់តែតិច ខណៈទំនិញសព្វសារពើសុទ្ធតែមានការឡើងថ្លៃដូចគ្នា។
កាលពីចុងខែមីនា អន្តរក្រសួងរួមមាន ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងរ៉ែ និងថាមពល បានសម្រេចចេញប្រកាសស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា ដើម្បីឱ្យថ្លៃប្រេងឥន្ធនៈឡើងចុះតាមតម្លៃប្រេងនៅលើទីផ្សារអន្តរជាតិ ដោយឱ្យអនុវត្តតែទៅលើការលក់រាយប្រេងឥន្ធនៈប៉ុណ្ណោះ។ ការចេញប្រកាសអន្តរក្រសួង ដែលមាន១២ប្រការ ដោយខ្លឹមសារសំខាន់នៃប្រកាសនេះ គឺការកំណត់យករយៈពេលដាក់តម្លៃប្រេងឥន្ធនៈពី១៥ថ្ងៃ មកត្រឹម១០ថ្ងៃវិញ។ នៅក្នុងនោះដែរនៅប្រការ៤នៃប្រកាសនេះ បានបញ្ជាក់ថា នាយកដ្ឋានអភិវឌ្ឍវិស័យឯនជន នៃក្រសួងពាណិជ្ជកម្ម ត្រូវគណនាថ្លៃលក់រាយប្រេងឥន្ធនៈនៅកម្ពុជា និងចេញថ្លៃលក់រាយជូនក្រុមហ៊ុនប្រេងឥន្ធនៈនៅរៀងរាល់ថ្ងៃទី០១ ទី១១ និងទី២១ នៃខែនីមួយៗ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់បានបញ្ជាក់ថា៖"ការអនុវត្តតាមរូបមន្តថ្មីនេះ នឹងចាប់ពីដើមខែមេសា តទៅ ដោយការកំណត់រូបមន្តថ្មីនេះ នឹងធ្វើឱ្យតម្លៃ ដែលបានកំណត់ អាចប្រែប្រួលទាន់សភាពការណ៍នៃតម្លៃប្រេងអន្តរជាតិ"៕