គ្រាប់ស្វាយចន្ទី គឺជាដំណាំដែលមានតម្រូវការខ្ពស់ឥតឈប់ឈរទាំងក្នុង និងក្រៅប្រទេស។ បើយោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទក្នុងរយៈពេល ៥ ខែដំបូងនៃឆ្នាំ ២០២១ នេះកម្ពុជាបាននាំចេញគ្រាប់ស្វាយចន្ទីចំនួន ៨០១,៧៣២ តោនទៅកាន់ទីផ្សារបរទេស ដូចជាប្រទេសវៀតណាម ថៃ ចិន ឥណ្ឌា ជប៉ុន និងអារ៉ាប់រួម។
ដោយមើលឃើញពីឱកាសក៏ដូចជាតម្រូវការកើនឡើងឥតឈប់ឈរ បងស្រី ហ៊ឹម ស៊ីឌឿន អាយុ ២៨ ឆ្នាំ ម្ចាស់ចម្ការស្វាយចន្ទីក្នុងខេត្តកំពង់ធំបានចែករំលែកបទពិសោធន៍អំពីការគ្រប់គ្រងអាជីវកម្មគ្រាប់ស្វាយចន្ទីរបស់គាត់។
សូមបងស្រីរៀបរាប់ត្រួសៗអំពីខ្លួនបង និងពណ៌នាអំពីអាជីវកម្មរបស់បង?
ខ្ញុំមានមហិច្ឆតាចង់ក្លាយជាសហគ្រិនជោគជ័យម្នាក់លើវិស័យកសិកម្ម ហើយខ្ញុំ និងស្វាមី បានឈានចូលក្នុងវិស័យកសិកម្មដំបូងដោយប្រកបរបរធ្វើស្រែប្រាំង នៅលើផ្ទៃដីត្រឹមតែ ១ ហិកតាប៉ុណ្ណោះ ។
អាជីវកម្មរបស់ខ្ញុំ ដំណើរការបានយ៉ាងល្អ ហើយពួកយើងក៏បានពង្រីកដីរហូតដល់ ១០ ហិកតា ប៉ុន្តែដោយសារកង្វះទឹកប្រើប្រាស់ ធ្វើឱ្យយើងជួបការលំបាកខ្លះៗ ហើយក៏សម្រេចចិត្តផ្អាកអាជីវកម្មស្រូវប្រាំងនេះមួយរយៈ។ បន្ទាប់ពីនេះនៅក្នុងឆ្នាំ ២០១៧ ខ្ញុំសង្កេតឃើញមានតម្រូវការគ្រាប់ស្វាយចន្ទីនៅក្នុងខេត្តកំពង់ធំមានការកើនឡើង ជាហេតុធ្វើឱ្យខ្ញុំមានការចាប់អារម្មណ៍ ហើយក៏សម្រេចចិត្តសាកល្បងទៅលើអាជីវកម្មគ្រាប់ស្វាយចន្ទីនេះតែម្តង។
តើកត្តាចម្បងអ្វីខ្លះដែលបង្វែរការចាប់អារម្មណ៍របស់បងមកលើអាជីវកម្មគ្រាប់ស្វាយចន្ទី?
ជាការពិតណាស់ យើងបានឈានជើងចូលក្នុងវិស័យអាជីវកម្មគ្រាប់ស្វាយចន្ទីដំបូងដោយសារសង្កេតឃើញពីឱកាសនៃតម្រូវការផ្គត់ផ្គង់ខ្ពស់ក្នុងទីផ្សារទាំងក្នុង និងក្រៅស្រុក។ បន្ទាប់ពីវគ្គចែករំលែកពីសមាគមស្វាយចន្ទីកម្ពុជា យើងក៏ចាប់ផ្តើមមានចំណាប់អារម្មណ៍ និងបន្តស្វែងយល់បន្ថែមអំពីអាជីវកម្មគ្រាប់ស្វាយចន្ទីនេះ។
គ្រាប់ស្វាយចន្ទីមិនតម្រូវឱ្យយើង យកចិត្តទុកដាក់ច្រើនដូចរុក្ខជាតិ ឬដំណាំផ្សេងទៀតឡើយ វាទាមទារឱ្យយើងធ្វើការថែទាំក្នុងដំណាក់កាលដំបូង ដូចជាស្រោចទឹក និងដាក់ជីឱ្យបានទៀងទាត់។ បន្ទាប់ពីដើមធំល្មម យើងត្រូវថែទាំ ក៏ដូចជាយកចិត្តទុកដាក់លើ ៣ ដំណាក់កាលប៉ុណ្ណោះក្នុងមួយរដូវកាលនៃការដាំដុះរបស់វា។
ប៉ុន្មានឆ្នាំក្រោយមកនេះ គ្រាប់ស្វាយចន្ទីរបស់ខ្ញុំបានផ្តល់ទិន្នផលពី ៤ តោន រហូតដល់ ២០ តោននៅលើផ្ទៃដីដាំដុះប្រមាណជា ១០ ហិកតា ដែលក្នុងនោះគ្រាប់ស្វាយចន្ទីជាមធ្យមទទួលបាន ៥ ពាន់រៀលក្នុងមួយគីឡូក្រាម អាស្រ័យទៅតាមរដូវកាលនៃការបញ្ជាទិញ។
ដោយសារតែមានតម្រូវការខ្ពស់ក្នុងទីផ្សារ ដូចនេះគ្រាប់ស្វាយចន្ទីដែលខ្ញុំប្រមូលផលបាននឹងមានឈ្មួញចុះមកទិញដោយផ្ទាល់ ភាគច្រើនមកពីរោងចក្រធំៗសម្រាប់ធ្វើការផ្គត់ផ្គង់នៅក្នុងទីផ្សារក្នុងស្រុក និងក្រៅប្រទេស។ ក្នុងរយៈពេលប៉ុន្មានឆ្នាំចុងក្រោយនៃការដាំដុះស្វាយចន្ទីនេះ យើងបានពង្រីកផ្ទៃដីដាំដុះរហូតដល់ ២០ ហិកតា។
តើបញ្ហាប្រឈមអ្វីខ្លះដែលបងតែងតែជួបប្រទះ?
សត្វល្អិត និងដង្កូវគឺជាបញ្ហាចម្បងដែលយើងតែងតែជួបប្រទះ ហើយយើងជឿថាបញ្ហានេះក៏ជាកង្វល់សម្រាប់កសិករមួយចំនួនផងដែរ។ ដើម្បីដោះស្រាយលើបញ្ហានេះ យើងត្រូវដឹងអំពីដំណើរការនៃការដាំដុះ និងយល់ច្បាស់អំពីដំណាំ ក៏ដូចជាការដាក់ជី និងថ្នាំសម្លាប់សត្វល្អិតជាដើម។ ឧទាហរណ៍៖ ខ្ញុំតែងតែធ្វើការពិសោធជាមួយជីដែលមានប្រភេទផ្សេងៗគ្នា ថាតើជីប្រភេទណាដែលអាចផ្តល់ទិន្នផលកាន់តែប្រសើរដល់ដំណាំរបស់ខ្ញុំ។
បន្ទាប់ពីនោះយើងក៏មានការចំណាយផ្សេងៗទៀតជាច្រើនលើជីលាមកសត្វ និងថ្នាំសម្លាប់សត្វល្អិតជាទៀងទាត់ពេញមួយរដូវកាលនៃការលូតលាស់ផងដែរ។ លំហូរសាច់ប្រាក់ គឺជាកង្វល់មួយក្នុងដំណើរការនេះ ហើយយើងក៏ទទួលការគាំទ្រពីគ្រួសារ ហើយបន្ថែមពីនេះយើងក៏ទទួលបានដើមទុនដែលអាចបត់បែនបាន ដែលផ្តល់ដោយគ្រឹះស្ថានមីក្រូហិរញ្ញវត្ថុ អម្រឹត សម្រាប់តម្រូវការពង្រីកអាជីវកម្មរបស់យើង។ បើគ្មានការគាំទ្រដែលអាចទុកចិត្តបាន និងការគ្រប់គ្រងលំហូរសាច់ប្រាក់ប្រកបដោយប្រសិទ្ធភាពទេនោះវាពិតជាពិបាកក្នុងការរក្សាអាជីវកម្មមួយឱ្យដំណើរការទៅមុខបាន។
ក្នុងនាមជាសហគ្រិនស្ត្រី តើបងមានយោបល់អ្វីខ្លះដល់ស្ត្រីដែលចង់ពង្រីកអាជីវកម្ម?
ការប្រកបអាជីវកម្មមួយទាមទារឱ្យមានការខិតខំប្រឹងប្រែង និងការប្តេជ្ញាចិត្តខ្ពស់។ កុំខ្លាចក្នុងការហត់នឿយ ហើយដើរចេញពីតំបន់ស្រណុករបស់អ្នក ដើម្បីស្វែងយល់បន្ថែមពីវិស័យកសិកម្ម។
តម្រូវការ និងទិន្នផលអាចមានការប្រែប្រួលជារៀងរាល់ឆ្នាំ ក៏ប៉ុន្តែភាពជោគជ័យនៃអាជីវកម្មមិនមែនកើតឡើងត្រឹមតែមួយយប់នោះទេ។ ចូរកុំបោះបង់ក្តីសង្ឃឹម ការប្រឹងប្រែង និងការអត់ធ្មត់ដែលធ្វើឡើងជារៀងរាល់ថ្ងៃអាចនាំអ្នកទៅកាន់អនាគតប្រកបដោយផ្លែផ្កា៕