ភ្នំពេញៈ ក្រសួងទេសចរណ៍កំពុងរៀបចំសេចក្ដីព្រាងក្រមសីលធម៌ និងក្រមប្រតិបត្តិវិជ្ជាជីវៈសម្រាប់សាលាវិជ្ជាជីវៈទេសចរណ៍ទាំងរដ្ឋ និងឯកជន ដើម្បីជំរុញការអប់រំបណ្តុះបណ្តាលផ្នែកវិស័យទេសចរណ៍ឱ្យទទួលបានប្រសិទ្ធភាពខ្ពស់ជាងមុន។
កិច្ចប្រជុំពិភាក្សាស្ដីពីបច្ចុប្បន្នភាពការងារ និងទិសដៅអនុវត្តបន្តរបស់អនុក្រុមការងារទី ៣ នៃក្រុមការងាររាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩ កាលពីថ្ងៃទី ២០ ខែមេសា ឆ្នាំ ២០២២។ លោក ជា បូរ៉ា រដ្ឋលេខាធិការក្រសួងទេសចរណ៍ និងជាប្រធានអនុក្រុមការងារទី ៣ នៃក្រុមការងាររាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ ១៩ បាននិយាយថា កិច្ចប្រជុំបានពិនិត្យសម្រេច និងគាំទ្រលើ «សេចក្ដីព្រាងក្រមសីលធម៌ និងក្រមប្រតិបត្តិវិជ្ជាជីវៈសម្រាប់សាលាវិជ្ជាជីវៈទេសចរណ៍» ដែលនឹងត្រូវដាក់ឆ្លងលោករដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ ១៩ ពិនិត្យ និងសម្រេច។
លោកប្រាប់ភ្នំពេញប៉ុស្តិ៍ថា ក្រមសីលធម៌ និងក្រមប្រតិបត្តិវិជ្ជាជីវៈនេះនឹងផ្តល់ជាជំនួយស្មារតីបន្ថែមទៅដល់សាលាដែលបណ្តុះបណ្តាលផ្នែកទេសចរណ៍ទាំងអស់ ដើម្បីធ្វើឱ្យការបណ្តុះបណ្តាលលើវិស័យទេសចរណ៍កាន់តែមានភាពល្អប្រសើរថែមទៀត ខណៈសាលាទាំងអស់នោះភាគច្រើន មានក្រម ឬបទបញ្ជាផ្ទៃក្នុងរបស់ខ្លួនរួចហើយ។
លោកបញ្ជាក់ថា៖ «សេចក្តីព្រាងនេះជិតបញ្ចប់ហើយនៅតែឆ្លងថ្នាក់ដឹកនាំពិនិត្យ និងសម្រេចតែប៉ុណ្ណោះ។ នៅខែឧសភាខាងមុខនឹងមានកិច្ចប្រជុំម្តងទៀត ដើម្បីសម្រេច ដូច្នេះសេចក្តីព្រាងនេះអាចនឹងរួចរាល់ក្នុងអំឡុងពាក់កណ្តាលឆ្នាំនេះ»។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានប្រាប់ថា ក្រមសីលធម៌ និងក្រមប្រតិបត្តិវិជ្ជាជីវៈពិតជាចាំបាច់សម្រាប់ពង្រឹងបន្ថែមដល់សាលាបណ្តុះបណ្តាលជំនាញទេសចរណ៍ ដើម្បីជំរុញឱ្យការបណ្តុះបណ្តាលធនធានមនុស្សប្រកបដោយគុណភាពពិតប្រាកដ។ លោកបានបន្ថែមថា ក្នុងបរិបទកូវីដ ១៩ ទាំងអ្នកបណ្តុះបណ្តាល និងនិស្សិតផ្នែកទេសចរណ៍ស្ទើរតែបោះបង់អាជីព ឬជំនាញនេះទៅហើយ ប៉ុន្តែក្រោយស្ថានភាពការរាតត្បាតបានធូរស្រាល និងមានការយកចិត្តទុកដាក់ពីរដ្ឋាភិបាលក្នុងការស្តារវិស័យនេះឱ្យបាន ជំរុញ និងលើកទឹកចិត្តដល់អ្នកជំនាញ អ្នកបណ្តុះបណ្តាល និងនិស្សិតឱ្យងាកមកចាប់អារម្មណ៍វិស័យនេះឡើងវិញ។
លោកបញ្ជាក់ថា៖ «ខ្ញុំយល់ថា ក្រមនេះមានភាពចាំបាច់ព្រោះអំឡុងពេលជាង ២ ឆ្នាំនេះធនធានក្នុងវិស័យទេសចរណ៍បានបាត់បង់ច្រើនដែរ ដោយអ្នកខ្លះបានងាកទៅប្រកបកិច្ចការងារផ្សេងពីវិស័យនេះ ជាពិសេសប្រតិបត្តិករទេសចរណ៍កំពុងមានការខ្វះខាតធនធានមនុស្ស»។
បើតាមលោក ជា បូរ៉ា បន្ទាប់ពីការរៀបចំសេចក្តីព្រាងក្រមសីលធម៌ និងក្រមប្រតិបត្តិវិជ្ជាជីវៈសម្រាប់សាលាវិជ្ជាជីវៈទេសចរណ៍នេះរួចរាល់ ក្រសួងទេសចរណ៍គ្រោងនឹងអញ្ជើញគ្រប់ស្ថាប័នបណ្តុះបណ្តាលវិជ្ជាជីវៈរដ្ឋ និងឯកជន ដើម្បីផ្សព្វផ្សាយឱ្យស្ថាប័នទាំងនេះបានជ្រួតជ្រាប បន្ទាប់មកទើបដាក់ឱ្យអនុវត្តជាផ្លូវការ៕ LA