ទីក្រុងប៉ារីសៈ ទិន្នន័យឧស្សាហកម្មបានបង្ហាញកាលពីថ្ងៃពុធថា ការលក់រថយន្តនៅអឺរ៉ុបបានធ្លាក់ចុះក្នុងខែមីនា ខណៈការលុកលុយរបស់រុស្ស៊ីនៅប្រទេសអ៊ុយក្រែនបានបន្ថែមបញ្ហាបន្ថែមទៀតដល់វិស័យដែលកំពុងតស៊ូជាមួយនឹងការខ្វះខាតឧបករណ៍អេឡិចត្រូនិកពាក់កណ្តាលចម្លង (semiconductors)។
ការចុះបញ្ជីរថយន្តដឹកអ្នកដំណើរបានធ្លាក់ចុះ ២០,៥ ភាគរយធៀបនឹងរយៈពេលដូចគ្នាកាលពីឆ្នាំមុន ដែលមានចំនួន ៨៤ ៤១៨៧ គ្រឿងត្រូវបានលក់។ នេះបើយោងតាមសមាគមក្រុមហ៊ុនផលិតរថយន្តអឺរ៉ុប (ACEA)។
ដោយមិនរាប់បញ្ចូលឆ្នាំ ២០២០ នៅពេលដែលការរីករាលដាលវីរុសកូរ៉ូណា បានធ្វើឱ្យសេដ្ឋកិច្ចពិភពលោករាំងស្ទះ វាគឺជាដំណើរការដ៏អាក្រក់បំផុតសម្រាប់ ១ ខែនៃខែមីនាចាប់តាំងពីស្ថិតិបានចាប់ផ្តើមក្នុងឆ្នាំ ១៩៩០ មកនោះ។
ការផលិតរថយន្តត្រូវបានរារាំងនៅទូទាំងពិភពលោកចាប់តាំងពីឆ្នាំមុនដោយកង្វះខាតយ៉ាងធ្ងន់ធ្ងរនៃឧបករណ៍អេឡិចត្រូនិកពាក់កណ្តាលចម្លង ដែលជាសមាសធាតុសំខាន់សម្រាប់រថយន្តទំនើប ខណៈដែលពួកគេផ្តល់ថាមពលគ្រប់យ៉ាងចាប់ពីប្រព័ន្ធចាប់ហ្វ្រាំងរហូតដល់ពោងសុវត្ថិភាព និងដល់បច្ចេកវិទ្យាជំនួយដល់ការចតរថយន្ត។
សង្គ្រាមបាននាំឱ្យមានការខ្វះខាតផ្នែកផ្សេងទៀត ដូចជាខ្សែដែលប្រើក្នុងខ្សែភ្លើងក្នុងរថយន្ត ដែលអ៊ុយក្រែនជាអ្នកផលិត។
រោងចក្រជាច្រើននៅអឺរ៉ុបត្រូវឈប់ដំណើរការដោយសារកង្វះខ្សែ ដោយក្រុមហ៊ុន Volkswagen បានផ្អាកការផលិតជាបណ្ដោះអាសន្ននៅទីតាំងមួយចំនួននៅប្រទេសអាល្លឺម៉ង់។
ក្រុមហ៊ុនផលិតរថយន្តកំពូលរបស់អឺរ៉ុបបានឃើញការលក់ធ្លាក់ចុះជិត ១ ភាគ ៤ នៅក្នុងខែមីនា។ នេះបើយោងតាមតួលេខរបស់ ACEA។
ACEA បាននិយាយថា៖ «ការរំខានដល់ខ្សែចង្វាក់ផ្គត់ផ្គង់ដែលកំពុងបន្តកាន់តែធ្ងន់ធ្ងរឡើងដោយការឈ្លានពានរបស់រុស្ស៊ីលើអ៊ុយក្រែន ប៉ះពាល់អវិជ្ជមានដល់ការផលិតរថយន្ត»។
សមាគមបាននិយាយថាប្រទេសភាគច្រើននៅអឺរ៉ុបមាន ការធ្លាក់ចុះនៃការលក់រថយន្តចំនួន ២ ខ្ទង់ក្នុងខែមីនាជាមួយនឹងការធ្លាក់ចុះចំនួន ១៧,៥ ភាគរយនៅក្នុងប្រទេសអាល្លឺម៉ង់ ដែលជាទីផ្សារដ៏ធំបំផុត។
មានការធ្លាក់ធំជាងនេះប្រហែលជិត ២០ ភាគរយនៅក្នុងប្រទេសបារាំង ប្រហែល ៣០ ភាគរយនៅក្នុងប្រទេសអ៊ីតាលី និងជិត ៤០ ភាគរយនៅអេស្ប៉ាញ។ ក្រៅអឺរ៉ុប ការលក់ធ្លាក់ ១៤,៣ ភាគរយនៅអង់គ្លេស៕ RR