ភ្នំពេញៈ សមាគមជប៉ុន-កម្ពុជា (JCA) បានដឹកនាំក្រុមហ៊ុនជប៉ុនចំនួន ២៤ មកស្វែងរកឱកាសវិនិយោគនៅក្នុងវិស័យចម្រុះនៅកម្ពុជា តាមរយៈធនាគារអេស៊ីលីដា និងសមាគមអតីតនិស្សិតជប៉ុននៅកម្ពុជា។
អតីតឯកអគ្គរាជទូតជប៉ុនប្រចាំកម្ពុជាបានដឹកនាំអ្នកវិនិយោគជប៉ុនប្រមាណជាង ៣០ រូបមកពី ២៤ ក្រុមហ៊ុនដែលមានជំនួញក្នុងវិស័យចម្រុះជាច្រើន ដូចជាផលិតកម្មវាយនភណ្ឌកាត់ដេរសម្លៀកបំពាក់ សុខាភិបាល សេវាកម្ម សំណង់ កសិកម្ម និងផ្នែកផ្សេងៗទៀត មកស្វែងរកឱកាសវិនិយោគនៅកម្ពុជា។
នៅក្នុងជំនួបជាមួយប្រធានសមាគមជប៉ុន-កម្ពុជា និងគណៈប្រតិភូកាលពីថ្ងៃទី ២៥ ខែមេសា លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានប្រាប់ថា នេះជាលើកទី ២ ហើយដែលធនាគារអេស៊ីលីដារៀបចំឱ្យមានជំនួបរវាងសមាគមជប៉ុន-កម្ពុជា ជាមួយវិនិយោគិនខ្មែរ។
លោកបន្ថែមថា កាលពីឆ្នាំ ២០១៩ ភាគីទាំង ២ បានព្រមព្រៀងគ្នាថា នឹងរៀបចំឱ្យមានជំនួបនេះជារៀងរាល់ឆ្នាំ ប៉ុន្តែត្រូវបានខកខានរយៈពេល ២ ឆ្នាំ ដោយសារវិបត្តិជំងឺកូវីដ ១៩។
លោកបញ្ជាក់ថា៖ «កិច្ចពិភាក្សានេះ មានគោលបំណងក្នុងការពង្រីកដៃគូអាជីវកម្មរវាងប្រទេសកម្ពុជា-ជប៉ុន ដោយខាងភាគីជប៉ុន មានចំនួន ២៤ ក្រុមហ៊ុន ចំណែកភាគីកម្ពុជាមាន ២៩ ក្រុមហ៊ុនដែលមកពីគ្រប់វិស័យ។ ការអញ្ជើញពីអ្នកវិនិយោគពីគ្រប់វិស័យនេះ គឺដើម្បីផ្តល់ជម្រើសឱ្យគ្នាទៅវិញ-ទៅមករវាងភាគីទាំង ២ ក្នុងការឈានដល់សហប្រតិបត្តិការនាពេលខាងមុខ។ យើងរីករាយដែលវិនិយោគិនទាំង ២ ប្រទេសមានការចាប់អារម្មណ៍លើអាជីវកម្មទៅវិញទៅមក»។
លោកបន្តថា ជំនួបពិភាក្សាលើកនេះ គឺមានក្រុមហ៊ុនភាគច្រើនមកពីវិស័យកាត់ដេរសម្លៀកបំពាក់ ខណៈគេសង្កេតឃើញថា ថ្វីដ្បិតតែវិស័យកាត់ដេរកម្ពុជាមានការវិនិយោគច្រើនហើយ ប៉ុន្តែពួកគេនៅតែមានការចាប់អារម្មណ៍ច្រើនលើវិស័យនេះ ដោយសារតែពួកគេដឹងអំពីតម្រូវការទីផ្សារនៅក្នុងប្រទេសជប៉ុន និងប្រទេសដែលត្រូវនាំទំនិញទៅ។
ប្រធានសមាគមជប៉ុន-កម្ពុជា និងជាអតីតឯកអគ្គរាជទូតជប៉ុនប្រចាំនៅកម្ពុជា លោក Fumiaki Takahashi បានប្រាប់ភ្នំពេញប៉ុស្តិ៍ថា សមាគម-ជប៉ុន-កម្ពុជា តែងតែផ្សព្វផ្សាយ និងទាក់ទាញក្រុមហ៊ុនជប៉ុនឱ្យមកវិនិយោគនៅកម្ពុជា ដើម្បីរួមចំណែកក្នុងការអភិវឌ្ឍប្រទេសកម្ពុជាផង និងដើម្បីរក្សាចំណងមិត្តភាពរវាងប្រទេសទាំង ២ ផង។ លោកបន្ថែមថា សមាគមបានដឹកនាំវិនិយោគិនជប៉ុនទៅជួបពិភាក្សាជាមួយនឹងស្ថាប័នជាច្រើន ដូចជា ធនាគារអេស៊ីលីដា ក្រសួងការងារ និងសមាគមអតីតនិស្សិតខ្មែរមកពីប្រទេសជប៉ុនជាដើម ដើម្បីស្វែងរកឱកាសវិនិយោគ និងកិច្ចសហការជាមួយក្រុមហ៊ុនឯកជននៅកម្ពុជា។
លោកនិយាយថា៖ «យើងឃើញថា កម្ពុជាបានរៀបចំបរិយាកាសធុរកិច្ចដ៏គួរឱ្យទាក់ទាញ ដូចជាច្បាប់ស្តីពីវិនិយោគថ្មី, កិច្ចព្រមព្រៀងពាណិជ្ជកម្មសេរីជាមួយបណ្តាប្រទេសនានា និងស្របពេលស្ថានភាពជំងឺកូវីដ ១៩ ក៏បានប្រសើរឡើងផងនោះ ទើបយើងជំរុញឱ្យវិនិយោគិនជប៉ុន មកស្វែងរកឱកាសវិនិយោគនៅកម្ពុជា។ ក្រុមហ៊ុនជប៉ុនមួយចំនួនកំពុងស្វែងរកក្រុមហ៊ុននៅកម្ពុជាដែលមានសក្តានុពលក្នុងការសហការ។ យើងសង្ឃឹមថា ជំនួបនេះនឹងផ្តល់អត្ថប្រយោជន៍ដ៏ច្រើនដល់អ្នកវិនិយោគនៃប្រទេសទាំង ២»។
លោក សុង សារ៉ន ប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន Amru Rice បានប្រាប់ថា ក្នុងជំនួបនេះខាងវិស័យស្រូវអង្ករបានស្វែងរកឱកាសវិនិយោគពីខាងជប៉ុនផ្នែកកែច្នៃផលិតផលកសិកម្ម ព្រោះប្រទេសជប៉ុនមានបច្ចេកវិទ្យាខ្ពស់ ក្នុងការកែច្នៃផលិតផលកសិកម្ម ទៅជាផលិតផលសម្រេច។
លោកបន្ថែមថា៖ «ជប៉ុនជាប្រទេសដែលមានបច្ចេកវិទ្យាខ្ពស់ក្នុងវិស័យផលិតកម្មម្ហូបអាហារ។ យើងជឿថា ជប៉ុន នឹងអាចជួយជំរុញបន្ថែមទៀតដល់កម្ពុជាលើវិស័យនេះ»។
លោក ង៉ូវ ប៉េងហ៊ុយ ប្រធានសមាគមអតីតនិស្សិតខ្មែរពីប្រទេសជប៉ុននៅកម្ពុជា (JAC) បានប្រាប់ឱ្យដឹងថា ជំនួបនេះគឺជាការផ្គូផ្គងអាជីវកម្មរវាងក្រុមហ៊ុនមកពីជប៉ុន និងក្រុមហ៊ុននៅកម្ពុជា ដោយភាគីទាំង ២ បានចុះអនុស្សរណៈយោគយល់គ្នា (MOU) សម្រាប់កិច្ចសហប្រតិបត្តិការអភិវឌ្ឍន៍អាជីវកម្មក្នុងប្រទេសកម្ពុជា។
លោកប្រាប់ថា៖ «អនុស្សរណៈយោគយល់គ្នានេះមានគោលដៅជួយសម្រួលដល់វិនិយោគិននៃប្រទេសទាំង ២ ដែលជាសមាជិករបស់សមាគម ដើម្បីជំរុញកិច្ចសហប្រតិបត្តិការលើការធ្វើពាណិជ្ជកម្មរវាងប្រទេសទាំង ២។ សមាគមយើងមានសមាជិកជាង ១ ពាន់នាក់ ដែលមួយចំនួនជាអ្នកដែលមានអាជីវកម្មនៅក្នុងដៃស្រាប់ ដូចនេះ MOU នេះ នឹងជួយសម្រួលដល់ពួកគាត់បន្ថែមក្នុងការស្វែងរកដៃគូវិនិយោគដ៏ល្អមកពីជប៉ុន»។
ទិន្នន័យពីអង្គការពាណិជ្ជកម្មក្រៅប្រទេសជប៉ុន Jetro ឱ្យដឹងថា នៅក្នុងឆ្នាំ ២០២១ ការផ្លាស់ប្តូរពាណិជ្ជកម្មរវាងកម្ពុជា-ជប៉ុន មានតម្លៃសរុប ២ ៣៣៣,០៦ លានដុល្លារកើន ១០,៩៩ ភាគរយបើធៀបឆ្នាំ ២០២០ ដែលមានតម្លៃ ២ ១០១,៩១ លានដុល្លារ។ នៅក្នុងនោះទំនិញកម្ពុជានាំទៅជប៉ុនមានទឹកប្រាក់ ១ ៧៥២,៩៨ លានដុល្លារ កើនឡើង ៨,៣៩ ភាគរយពីចំនួន ១ ៦១៧,២១ លានដុល្លារ និងការនាំទំនិញពីជប៉ុនមកកម្ពុជាមានទឹកប្រាក់ ៥៨០,០៨៤ លានដុល្លារកើនឡើង ១៩,៦៧ ភាគរយពីចំនួន ៤៨៤,៧០ លានដុល្លារ៕ LA