ទីក្រុងហុងកុងៈ ធនាគារ HSBC បានឱ្យដឹងកាលពីថ្ងៃអង្គារថា ប្រាក់ចំណេញត្រីមាសទី ១ បានធ្លាក់ចុះជិត ៣០ ភាគរយ ដោយសារតែការខាតបង់ឥណទាន និងអតិផរណាខ្ពស់ជាងការរំពឹងទុក ប៉ុន្តែធនាគារផ្តល់ប្រាក់កម្ចីឈានមុខគេ ដែលផ្តោតលើតំបន់អាស៊ីមួយនេះ នៅតែមានសុទិដិ្ឋនិយមអំពីចក្ខុវិស័យរបស់ខ្លួន។
ធនាគារដែលមានមូលដ្ឋាននៅទីក្រុងឡុងដ៍មួយនេះ បានប្រកាសប្រាក់ចំណេញមុនបង់ពន្ធចំនួន ៤,២ ពាន់លានដុល្លារសម្រាប់ខែមករាដល់ខែមីនា ធ្លាក់ចុះ ២៨ ភាគរយ ធៀបនឹងឆ្នាំមុន ប៉ុន្តែលើសពីការប៉ាន់ប្រមាណ ខណៈប្រាក់ចំណូលដែលបានរាយការណ៍បានធ្លាក់ចុះ ៤ ភាគរយមកនៅត្រឹម ១២,៥ ពាន់លានដុល្លារ។
លោក Noel Quinn ប្រធានប្រតិបត្តិ HSBC បានឱ្យដឹងនៅក្នុងសេចក្ដីប្រកាសព័ត៌មានមួយថា៖ «ខណៈពេលដែលប្រាក់ចំណេញបានធ្លាក់ចុះកាលពីត្រីមាសទី ១ កាលពីឆ្នាំមុន ដោយសារផលប៉ះពាល់ទីផ្សារលើប្រាក់ចំណូលទ្រព្យសម្បត្តិ និងកម្រិតធម្មតានៃការបាត់បង់ឥណទានដែលរំពឹងទុក (ECL) ការផ្តល់ប្រាក់កម្ចីកាន់តែខ្ពស់នៅទូទាំងអាជីវកម្ម និងតំបន់ទាំងអស់ និងកំណើនអាជីវកម្មដ៏ល្អផ្នែកធនាគារផ្ទាល់ខ្លួន ការធានារ៉ាប់រង និងហិរញ្ញវត្ថុពាណិជ្ជកម្មល្អសម្រាប់ត្រីមាសនៅពេលអនាគត»។
ធនាគារផ្ដល់ប្រាក់កម្ចីមួយនេះបានរាយការណ៍ ECL ចំនួន ៦០០ លានដុល្លារធៀបនឹងការបញ្ចេញទឹកប្រាក់ចំនួន ៤០០ លានដុល្លារធៀបនឹងរយៈពេលដូចគ្នាកាលពីឆ្នាំមុន។
ធនាគារមួយនេះ បានឱ្យដឹងថា ខ្លួនបន្តរំពឹងថានឹងមានកំណើននៅឆ្នាំនេះសម្រាប់ប្រាក់ចំណូល និងការផ្តល់ប្រាក់កម្ចី។
លទ្ធផលកាលពីថ្ងៃអង្គារត្រូវបានចេញផ្សាយក្នុងបរិបទនៃការលុកលុយរបស់ប្រទេសរុស្ស៊ីលើអ៊ុយក្រែន ដែលធនាគារមួយនេះ បានឱ្យដឹងថាកំពុងធ្វើឱ្យសម្ពាធអតិផរណាកាន់តែធ្ងន់ធ្ងរ និងរួមចំណែកដល់ការគិតថ្លៃ ECL កាន់តែខ្ពស់សម្រាប់ត្រីមាសនេះ។
ធនាគារមួយនេះបន្តថា៖ «ផលប៉ះពាល់ដោយសារតែសង្គ្រាមរវាងប្រទេសរុស្ស៊ី និងអ៊ុយក្រែន រួមជាមួយនឹងផលប៉ះពាល់សេដ្ឋកិច្ចដែលបន្តកើតចេញពីការរីករាលដាលជំងឺកូវីដ ១៩ បានជំរុញឱ្យតម្លៃទំនិញជាច្រើនប្រភេទកើនឡើង ដោយសារតែការកើនឡើងអតិផរណាដែលបង្កបញ្ហាប្រឈមបន្ថែមទៀតសម្រាប់អាជ្ញាធររូបិយវត្ថុ និងអតិថិជនរបស់យើង»។
លោក Quinn បានបន្តថាអាជីវកម្មរបស់ធនាគារ HSBC «ភាគច្រើន» នៅក្នុងប្រទេសរុស្ស៊ីបម្រើអតិថិជនសាជីវកម្មអន្តរជាតិ ដែលមានការិយាល័យកណ្ដាលនៅក្នុងប្រទេសជាច្រើនផ្សេងទៀត ហើយធនាគារមួយនេះ កំពុងអនុវត្តទណ្ឌកម្មដែលដាក់ដោយចក្រភពអង់គ្លេស និងរដ្ឋាភិបាលផ្សេងទៀត។
ប៉ុន្តែធនាគារនេះ បានព្យាករថា ប្រតិបត្តិការរបស់ខ្លួននៅក្នុងប្រទេសរុស្ស៊ីអាចនឹង «មិនអាចបន្តទៅមុខបានទេ» បើស្ថិតក្រោមការរឹតបន្តឹងបន្ថែមទៀត។
ធនាគារ HSBC បានចាប់ផ្ដើមចំណុចស្នូលជាយុទ្ធសាស្ត្រជាច្រើនឆ្នាំទៅកាន់តំបន់អាស៊ី និងមជ្ឈិមបូព៌ា ហើយកាលពីថ្ងៃអង្គារ ធនាគារនេះបានកត់សម្គាល់ថា ខណៈពេលដែលការរឹតបន្តឹងលើវីរុសកូរ៉ូណាកំពុងកើនឡើងនៅទូទាំងពិភពលោក ទីផ្សារសំខាន់ៗដូចជាប្រទេសចិន និងហុងកុងនៅតែប្តេជ្ញាចិត្តចំពោះការគ្រប់គ្រងជំងឺកូវីដ ១៩ សូន្យ។
ធនាគារបានឱ្យដឹងថា៖ «ការរឹតបន្តឹងការបិទខ្ទប់ ដែលធ្វើឡើងដោយរដ្ឋាភិបាលរបស់ប្រទេសចិននៅក្នុងទីក្រុងធំៗរបស់ប្រទេសចិនបានប៉ះពាល់ដល់សេដ្ឋកិច្ចរបស់ប្រទេសចិន ទេសចរណ៍អាស៊ី និងខ្សែចង្វាក់ផ្គត់ផ្គង់ពិភពលោកយ៉ាងធ្ងន់ធ្ងរ»។
កិច្ចខិតខំប្រឹងប្រែងរៀបចំរចនាសម្ព័ន្ធឡើងវិញរបស់ធនាគារ HSBC ដើម្បីនាំមុខទីផ្សារក្នុងការគ្រប់គ្រងទ្រព្យសម្បត្តិអាស៊ីកាលពីលើកមុនបានដាក់បញ្ចូលកម្មវិធីមួយ ដើម្បីវិនិយោគជាទឹកប្រាក់ចំនួន ៦ ពាន់លានដុល្លារនៅទីក្រុងហុងកុង ប្រទេសចិន និងសិង្ហបុរី និងជួលទីប្រឹក្សាផ្នែកទ្រព្យសម្បត្តិជាង ៥ ០០០ នាក់៕ LA