.jpg)
ប្រជាជនអូស្ត្រាលីដើរទិញទំនិញនៅផ្សារភាគខាងលិចទីក្រុងស៊ីដនី។ AFP
ទីក្រុងស៊ីដនីៈ អត្រាអតិផរណាប្រចាំឆ្នាំរបស់ប្រទេសអូស្ត្រាលីបានកើនឡើងដល់ ៥,១ ភាគរយនៅក្នុងត្រីមាសដំបូងដែលបញ្ចប់នៅដំណាច់ខែមីនា ដែលជាកំណត់ត្រាខ្ពស់បំផុតចាប់តាំងពីឆ្នាំ ២០០១។ នេះបើយោងតាមទិន្នន័យផ្លូវការដែលបានចេញផ្សាយកាលពីថ្ងៃពុធ។
ការកើនឡើងនៃតម្លៃទំនិញប្រើប្រាស់ ដែលជំរុញដោយថ្លៃប្រេងឥន្ធនៈ និងថ្លៃផ្ទះ គឺខ្ពស់ជាងការរំពឹងទុករបស់អ្នកវិភាគ ហើយបានបង្កើនការព្យាករទុកថា ធនាគារកណ្តាលរបស់ប្រទេសអូស្ត្រាលីអាចនឹងដំឡើងអត្រាការប្រាក់នៅដើមសប្តាហ៍ក្រោយនេះ។
វានឹងក្លាយជាការផ្លាស់ប្តូរដ៏សំខាន់មួយសម្រាប់ធនាគារបម្រុងអូស្ត្រាលី (RBA) ដែលមាននិន្នាការនយោបាយ ដែលមិនចង់ឱ្យគេមើលឃើញថា មានឥទ្ធិពលលើយុទ្ធនាការបោះឆ្នោតបច្ចុប្បន្នរបស់ប្រទេសនេះ។ លើកចុងក្រោយដែល RBA ដំឡើងអត្រាការប្រាក់អំឡុងពេលបោះឆ្នោតគឺក្នុងឆ្នាំ ២០០៧ នោះ។
ទោះជាយ៉ាងណាក៏ដោយ សម្ពាធកំពុងកើនឡើង បន្ទាប់ពីសហរដ្ឋអាមេរិក នូវែលសេឡង់ និងកាណាដាបានបង្កើនអត្រាការប្រាក់របស់ពួកគេគ្រប់គ្នា។
Josh Frydenberg រដ្ឋមន្ត្រីរតនាគារអូស្ត្រាលីបាននិយាយកាលពីថ្ងៃពុធថា ការកើនឡើងអតិផរណាគឺដោយសារតែការព្រួយបារម្ភ តម្លៃកើនលើសពីការគ្រប់គ្រងរបស់រដ្ឋាភិបាល រួមទាំងបញ្ហាខ្សែចង្វាក់ផ្គត់ផ្គង់ដែលបណ្តាលមកពីជំងឺរាតត្បាតកូវីដ ១៩ និងការឈ្លានពានរបស់ប្រទេសរុស្ស៊ីលើប្រទេសអ៊ុយក្រែន។
លោក Frydenberg បាននិយាយថា «អ្វីដែលលេខទាំងនេះមិនបានគិតគូរពីឥទ្ធិពលពេញលេញគឺការកាត់បន្ថយពាក់កណ្តាលនៃពន្ធប្រេង»។
ការកាត់បន្ថយពន្ធលើប្រេងឥន្ធនៈ គឺជាវិធានការសំខាន់មួយដែលធ្វើឡើងដោយរដ្ឋាភិបាលសេរីអភិរក្សនិយមរបស់ប្រទេសនេះ ដើម្បីបន្ធូរបន្ថយសម្ពាធចំណាយលើការរស់នៅរួមជាមួយនឹងការបង់ប្រាក់មួយភាគ ២៥០ ដុល្លារអូស្ត្រាលី (១៧៩ ដុល្លារអាមេរិក) ដល់ប្រជាជនអូស្ត្រាលីរាប់លាននាក់ដែលត្រូវបានបញ្ជូនចេញកាលពីថ្ងៃពុធ។
ការចំណាយនៃការរស់នៅបានក្លាយទៅជាបញ្ហាសំខាន់នៅក្នុងយុទ្ធនាការបោះឆ្នោតសហព័ន្ធអូស្ត្រាលី ដែលនឹងត្រូវធ្វើឡើងនៅថ្ងៃទី ២១ ខែឧសភា ដោយសារអតិផរណាបានលើសពីកំណើនប្រាក់ឈ្នួលស្ទើរដូចដើមរបស់ប្រទេស ដែលមានចំនួន ២,៣ ភាគរយជារៀងរាល់ឆ្នាំនៅក្នុងត្រីមាសខែធ្នូ។
ស្រដៀងគ្នានេះដែរ លទ្ធភាពទិញលំនៅឋានត្រូវបានពិភាក្សាយ៉ាងក្តៅគគុក ដោយតម្លៃផ្ទះជាមធ្យមរបស់ប្រទេសនេះឡើងដល់ ៩២ ម៉ឺនដុល្លារអូស្ត្រាលី (៦៥៩ ពាន់ដុល្លារអាមេរិក) និង ១,២ លានដុល្លារនៅក្នុងរដ្ឋដែលមានប្រជាជនច្រើនបំផុតនៃរដ្ឋ New South Wales។ នេះបើយោងតាមការិយាល័យស្ថិតិ៕ RR
វីដេអូ៖
