ទីក្រុងប្រ៊ុចសែលៈ ប្រទេសប៉ូឡូញ និងប៊ុលហ្គារី នៅពេលនេះកំពុងទទួលបានឧស្ម័នពីប្រទេសជិតខាងសហភាពអឺរ៉ុបរបស់ពួកគេ បន្ទាប់ពី Gazprom ជាក្រុមហ៊ុនថាមពលរដ្ឋឈានមុខគេរបស់ប្រទេសរុស្ស៊ីបានបញ្ឈប់ការផ្គត់ផ្គង់។ នេះបើតាមលោកស្រី Ursula von der Leyen ប្រធានគណៈកម្មការអឺរ៉ុប បានឱ្យដឹងកាលពីថ្ងៃពុធ។
លោកស្រី von der Leyen ថ្លែងថា៖ «យើងនឹងធានាថាការសម្រេចចិត្តរបស់ក្រុមហ៊ុន Gazprom មានផលប៉ះពាល់តិចតួចបំផុតលើអ្នកប្រើប្រាស់នៅអឺរ៉ុប»។
លោកបន្តថា៖ «ថ្ងៃនេះ វិមានក្រឹមឡាំងបានបរាជ័យជាថ្មីម្តងទៀតក្នុងការប៉ុនប៉ងរបស់ខ្លួន ដើម្បីបង្កឱ្យមានការបែងចែកក្នុងចំណោមរដ្ឋជាសមាជិក។ យុគសម័យនៃឥន្ធនៈហ្វូស៊ីលរបស់ប្រទេសរុស្ស៊ីនៅអឺរ៉ុបនឹងដល់ទីបញ្ចប់»។
ថ្លែងនៅប្រទេសស៊ីលី លោក Josep Borrell ប្រធានគោលនយោបាយការបរទេសរបស់សហភាពអឺរ៉ុប បានឱ្យដឹងថា វិធានការរបស់ក្រុមហ៊ុន Gazprom គឺជា «សកម្មភាពរំលោភបំពាន» ហើយនឹង «គ្រាន់តែបង្កើនល្បឿនការផ្លាស់ប្តូររបស់អឺរ៉ុបទៅជាថាមពលបៃតង ដែលមិនបង្កឱ្យមានការពឹងផ្នែកលើប្រទេសផ្សេងនោះទេ»។
ក្រុមហ៊ុន Gazprom បានប្រកាសបញ្ឈប់ការបង្ហូរឧស្ម័នដល់ប្រទេសប៉ូឡូញ និងប្រទេសប៊ុលហ្គារី ដែលពឹងផ្អែកយ៉ាងខ្លាំង បន្ទាប់ពីមិនបានទទួលការទូទាត់ជាប្រាក់រូប្លិ៍ពីសមាជិកសហភាពអឺរ៉ុបទាំង ២ នេះ។
ប្រធានាធិបតី វ្ល៉ាឌីមៀរ ពូទីន បានឱ្យដឹងកាលពីខែមុនថា ប្រទេសរុស្ស៊ីនឹងលែងទទួលយកការទូទាត់ជារូបិយប័ណ្ណផ្សេងក្រៅពីរូបិយប័ណ្ណរូប្លិ៍ទៀតហើយ ដើម្បីជាការសងសឹកចំពោះការដាក់ទណ្ឌកម្មសេដ្ឋកិច្ចរបស់បណ្ដាប្រទេសលោកខាងលិចប្រឆាំងនឹងទីក្រុងម៉ូស្គូ ដោយសារតែការឈ្លានពានបង្ហូរឈាមលើប្រទេសអ៊ុយក្រែន។
លោកស្រី Von der Leyen បានព្រមានក្រុមហ៊ុននាំចូលរបស់សហភាពអឺរ៉ុបថា លុះត្រាតែកិច្ចសន្យាផ្គត់ផ្គង់ត្រូវបានកំណត់ជាប្រាក់រូប្លិ៍ការចុះញ៉មនឹងតម្រូវការរបស់វិមានក្រឹមឡាំង និងការបង់ប្រាក់ជាប្រាក់រូប្លិ៍ នឹងបំពានលើការដាក់ទណ្ឌកម្ម។
លោកស្រីបានបន្តថា៖ «ការណ៍នេះនឹងជាការរំលោភលើការដាក់ទណ្ឌកម្ម ដូច្នេះហានិភ័យខ្ពស់នឹងមានសម្រាប់ក្រុមហ៊ុនទាំងនោះ»។
លោកស្រីបានលើកឡើងថា៖ «ប្រហែល ៩៧ ភាគរយ» នៃកិច្ចព្រមព្រៀងរបស់សហភាពអឺរ៉ុបទាំងអស់បានចែងយ៉ាងច្បាស់អំពីការបង់ប្រាក់ជាប្រាក់អឺរ៉ូ ឬដុល្លារ។
ក្រុមមន្ត្រីបានឱ្យដឹងថា ក្រុមរដ្ឋមន្ត្រីថាមពលមកពីទូទាំងប្លុកនេះនឹងជួបប្រជុំគ្នានៅថ្ងៃចន្ទ ដើម្បីពិភាក្សាអំពីស្ថានភាពនេះ៕ LA