.jpg)
ម៉ាស៊ីនស្ទូចលើកកុងតឺន័រចេញពីរថយន្តត្រៀមដាក់លើកប៉ាល់សម្រាប់នាំចេញ នៅក្នុងកំពង់ផែក្រុងព្រះសីហនុ។ ហេង ជីវ័ន
ភ្នំពេញៈ វិស័យឯកជននៃក្រុមប្រទេសជាសមាជិក RCEP បានសម្រេចបង្កើតក្រុមប្រឹក្សាពិគ្រោះយោបល់ធុរកិច្ចនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ក្នុងគោលបំណងពិនិត្យ និងពង្រឹងលើការអនុវត្តកិច្ចព្រមព្រៀង ក៏ដូចជាដើម្បី ទាញយកផលប្រយោជន៍ជាអតិបរមាពីកិច្ចព្រមព្រៀមនេះ។
លោក លី ឃុនថៃ ប្រធានសមាគមស្បែកជើងកម្ពុជា និងជាអនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍ថា ក្រុមប្រឹក្សាពិគ្រោះយោបល់ធុរកិច្ចនៃកិច្ចព្រមព្រៀង RCEP បានបង្កើតឡើងកាលថ្ងៃទី ២៦ មករា ឆ្នាំ ២០២២ ដោយក្រុមប្រឹក្សានេះបានពង្រីកខ្លួនមកពីក្រុមការងារ RCEP ដែលមានការចូលរួមពីសមាជិកក្រុមប្រឹក្សាធុរកិច្ចអាស៊ីខាងកើត (EABC) ក្រុមការងារឧស្សាហកម្មមកពីអូស្ត្រាលី (AIG) និងវេទិកាធុរកិច្ចអន្តរជាតិប្រទេសនូវែលសេឡង់ (NZIBF)។
លោកបន្តថា សម្រាប់ឆ្នាំ ២០២២ ប្រធានក្រុមប្រឹក្សា គឺប្រទេសកម្ពុជាដែលមានលោក គិត ម៉េង ប្រធានសភាពាណិជ្ជកម្មកម្ពុជាជាប្រធានក្រុមប្រឹក្សាពិគ្រោះយោបល់ធុរកិច្ចនៃកិច្ចព្រមព្រៀង RCEP នេះ ខណៈ RCEP ក៏បានចូលជាធរមានជាផ្លូវការក្នុងឆ្នាំ ២០២២ នេះតែម្តង។ លោកបន្តថា ការបង្កើតក្រុមប្រឹក្សាពិគ្រោះយោបល់ធុរកិច្ចនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ពិតជាមានសារៈសំខាន់ណាស់ក្នុងការផ្តល់ជារបាយការណ៍អនុសាសន៍ដែលជាសំឡេងរួមរបស់វិស័យឯកជនទៅកាន់ថ្នាក់ដឹកនាំអាស៊ានបូក ៣។
លោកបញ្ជាក់ថា៖ «ក្រុមប្រឹក្សានេះបង្កើតឡើងក្នុងគោលបំណងពិនិត្យ និងតាមដានដំណើរការនៃការអនុវត្ត និងប្រតិបត្តិការរបស់ RCEP ដោយពិភាក្សាជាមួយនឹងវិស័យឯកជន ដើម្បីប្រមូលធាតុចូល និងតំណាងឱ្យវិស័យឯកជនដើម្បីពិភាក្សា និងលើកសំណើទៅបណ្ដាថ្នាក់ដឹកនាំ RCEP ក្នុងការនាំផលប្រយោជន៍ឱ្យគ្នាទៅវិញទៅមក និងទាញយកផលប្រយោជន៍ជាអតិបរមាពីកិច្ចព្រមព្រៀងនេះ»។
លោកបន្ថែមថា ក្រុមប្រឹក្សាពិគ្រោះយោបល់ធុរកិច្ចនេះបានបើកកិច្ចប្រជុំលើកដំបូងកាលពីថ្ងៃទី ២២ ខែមេសា ឆ្នាំ ២០២២ ដើម្បីពិភាក្សាទាក់ទិននឹងដំណើរការនៃការអនុវត្តកិច្ចព្រមព្រៀង RCEP, ការរៀបចំគម្រោងកិច្ចប្រជុំនៅក្នុងឆ្នាំនេះ, ការពិភាក្សាលើធម្មនុញ្ញ (Charter)ក្រុមប្រឹក្សាពិគ្រោះយោបល់ធុរកិច្ចនៃកិច្ចព្រមព្រៀង RCEP និងការស្វាគមន៍សមាជិកថ្មីមកពីខាងអូស្ត្រាលី និងនូវែលសេឡង់ជាដើម។
ចំពោះការបង្កើតក្រុមប្រឹក្សាពិគ្រោះយោបល់ធុរកិច្ចនៃ RCEP នេះដែរ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ថា ក្រសួងគាំទ្រយ៉ាងពេញទំហឹង ដោយសារវិស័យឯកជនត្រូវចូលរួមអនុវត្តផ្ទាល់ក្នុងការងារនេះ។
បើតាមលោក សុវិជាតិ នៅក្នុងរយៈពេល ៣ ខែដើមឆ្នាំ ២០២២ ការនាំចេញទំនិញរបស់កម្ពុជាក្រោមទម្រង់កិច្ចព្រមព្រៀង RCEP មានទឹកប្រាក់ជាង ២ ពាន់លានដុល្លារ។
ទំហំពាណិជ្ជកម្មកម្ពុជា និងប្រទេសជាសមាជិក RCEP ទាំងអស់ដែលកម្ពុជាបាននាំចេញ និងនាំចូលទំនិញ តាមគ្រប់ប្រព័ន្ធអនុគ្រោះទាំងអស់រួមទាំងកិច្ចព្រមព្រៀង RCEP និង CCFTA ផងមានចំនួន ៨ ពាន់លានដុល្លារ ក្នុងនោះការនាំចេញរបស់កម្ពុជា មានចំនួន ១ ៩៥៦ លានដុល្លារ និងនាំចូលចំនួន ៦ ១០៦ លានដុល្លារ។
លោកបញ្ជាក់ថា៖ «យើងសង្កេតឃើញថា កម្ពុជាបានទទួលអត្ថប្រយោជន៍ទៅតាមអ្វីដែលយើងរំពឹងទុក ហើយក៏ជាការឆ្លុះបញ្ចាំងមួយនៃភាពត្រឹមត្រូវដែលការសិក្សានានាបង្ហាញប្រាប់យើងថា កម្ពុជាយើងនឹងទទួលបានផលច្រើន ប៉ុន្តែនៅពេលចំណុចចាប់ផ្តើមនៃការអនុវត្តនេះអ្នកនាំចេញភាគច្រើនគាត់នៅប្រើប្រាស់ប្រព័ន្ធអនុគ្រោះចាស់។ ទាំងប្រព័ន្ធ RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិន គឺជាប្រព័ន្ធមួយដែលបំពេញបន្ថែម និងជាប្រព័ន្ធមួយដែលបង្ការទុកសម្រាប់ផ្តល់អត្ថប្រយោជន៍នៅពេលយើងឈានចេញពីឋានៈជាប្រទេសក្រីក្រ ហើយប្រព័ន្ធអនុគ្រោះផ្សេងៗត្រូវបានផុតរលត់»។
មន្ត្រីជាន់ខ្ពស់ក្រសួងពាណិជ្ជកម្មរូបនេះបានឱ្យដឹងទៀតថា បច្ចុប្បន្នមានក្រុមហ៊ុន ឬអ្នកនាំចេញទំនិញជាច្រើនបានមកដាក់ពាក្យស្នើសុំវិញ្ញាបនបត្របញ្ជាក់ប្រភពដើមទំនិញ (CO) ទម្រង់ RCEP និង CCFTA ដើម្បីនាំចេញក្រោមកិច្ចព្រមព្រៀងទាំង ២ នេះ ដែលភាគច្រើនជាក្រុមហ៊ុននាំចេញផលិតផលកាត់ដេរ និងក្រុមហ៊ុនជាសមាជិករបស់សហព័ន្ធស្រូវអង្ករកម្ពុជា អ្នកនាំចេញបន្លែផ្លែឈើទៅប្រទេសចិន និងប្រទេសកូរ៉េជាដើម៕ LA
