ទីក្រុងប្រ៊ុចសែលៈប្រភពនានាបានឱ្យដឹងថាសហភាពអឺរ៉ុបនឹងស្នើឱ្យមានការបញ្ឈប់ការនាំចូលប្រេងពីប្រទេសរុស្ស៊ីជាដំណាក់កាល ដែលជាផ្នែកមួយនៃការដាក់ទណ្ឌកម្មជុំថ្មីៗប្រឆាំងនឹងប្រទេសរុស្ស៊ី ដោយសារតែការលុកលុយរបស់រុស្ស៊ីទៅលើអ៊ុយក្រែន។
ក្រុមអ្នកការទូតបានឱ្យដឹងថាគណៈកម្មការអឺរ៉ុបដែលបង្កើតការដាក់ទណ្ឌកម្មសម្រាប់ប្លុកនេះ បច្ចុប្បន្នកំពុងរៀបចំអត្ថបទមួយដែលអាចដាក់ជូនបណ្ដារដ្ឋជាសមាជិកទាំង ២៧ នៅព្រឹកថ្ងៃពុធ។
អ្នកការទូតជាច្រើននាក់បានឱ្យដឹងថាការហាមឃាត់ប្រេងត្រូវបានធ្វើឡើង បន្ទាប់ពីមានការផ្លាស់ប្តូរដោយប្រទេសអាល្លឺម៉ង់ ដែលបានឱ្យដឹងថាវិធានការនេះនឹងបង្កគ្រោះថ្នាក់ខ្លាំងពេកដល់សេដ្ឋកិច្ចរបស់ខ្លួន។
លោក JosepBorrell ប្រធានគោលនយោបាយការបរទេសរបស់សហភាពអឺរ៉ុបបានឱ្យដឹងថា ប្រទេសរុស្ស៊ីកំពុងបង្កើនការវាយប្រហាររបស់ខ្លួននៅប្រទេសអ៊ុយក្រែន ដោយធ្វើឱ្យការដាក់ទណ្ឌកម្មថ្មី «ចាំបាច់បំផុត»។
លោកថ្លែងថា៖ «យើងត្រូវតែប្រើប្រាស់សមត្ថភាពសេដ្ឋកិច្ច និងហិរញ្ញវត្ថុរបស់យើង ដើម្បីធ្វើឱ្យប្រទេសរុស្ស៊ីសងថ្លៃសម្រាប់អ្វីដែលខ្លួនកំពុងធ្វើ»។
ប្រភពបានឱ្យដឹងថាគណៈកម្មការនេះនឹងស្នើដាក់ការហាមឃាត់នេះក្នុងរយៈពេលពី ៦ ទៅ ៨ ខែ ដើម្បីផ្តល់ពេលវេលាដល់បណ្ដាប្រទេសនានា ដើម្បីធ្វើពិពិធកម្មការផ្គត់ផ្គង់របស់ពួកគេ។
ការហាមឃាត់នេះតម្រូវឱ្យមានការគាំទ្រជាឯកច្ឆន្ទនិងនៅតែអាចត្រូវបានរារាំងដោយប្រទេសហុងគ្រីរំពឹងថា នឹងមានការប្រឆាំងខ្លាំង ដោយសារតែប្រទេសមួយនេះពឹងផ្អែកលើប្រេងរបស់ប្រទេសរុស្ស៊ី ហើយនៅជិតស្និទ្ធនឹងវិមានក្រឹមឡាំង។
បណ្ដាប្រទេសផ្សេងទៀតមានការបារម្ភថាការហាមឃាត់ប្រេងនឹងបង្កើនតម្លៃនៅប្រេងនៅតាមស្ថានីយ នៅពេលដែលតម្លៃទំនិញប្រើប្រាស់កំពុងកើនឡើងយ៉ាងខ្លាំងរួចហើយ ដោយសារតែសង្គ្រាមនេះ។
មន្ត្រីម្នាក់បានប្រាប់ទីភ្នាក់ងារព័ត៌មាន AFP ក្នុងលក្ខខណ្ឌមិនបញ្ចេញឈ្មោះថា៖ «យើងត្រូវតែប្រុងប្រយ័ត្នបំផុតចំពោះប្រតិកម្មទីផ្សារ»។
ប្រភពនេះបន្តថា៖ «មានដំណោះស្រាយជាច្រើនហើយយើងនឹងសម្រេចទិសដៅនោះ ប៉ុន្តែយើងត្រូវតែធ្វើសកម្មភាព ដោយប្រុងប្រយ័ត្នបំផុត»។
ទោះបីជាប្រទេសរុស្ស៊ីនាំចេញប្រេងចំនួន ២ ភាគ ៣ ទៅកាន់សហភាពអឺរ៉ុបក៏ដោយក៏អាមេរិកបានបង្ហាញការសង្ស័យអំពី ការហាមឃាត់ទាំងស្រុង។
លោកស្រី Janet Yellen រដ្ឋមន្ដ្រីក្រសួងរតនាគារបានព្រមានថាវាអាចមានផលប៉ះពាល់តិចតួចលើប្រទេសរុស្ស៊ី ព្រោះវានឹងបង្កើនតម្លៃសម្រាប់ការនាំចេញ ដែលនៅសល់របស់ខ្លួន។
ក្រុមរដ្ឋមន្ត្រីក្រសួងថាមពលសហភាពអឺរ៉ុបនឹងពិភាក្សាអំពីការហាមឃាត់នេះនៅពេលពិភាក្សានៅថ្ងៃចន្ទនៅទីក្រុងប្រ៊ុចសែល ទោះបីជាពួកគេនឹងមិនចុះហត្ថលេខាលើការសម្រេចចិត្តនេះក៏ដោយ។
ក្រុមអ្នកការទូតទាំងនេះបានឱ្យដឹងថាកញ្ចប់ទី ៦ នៃវិធានការប្រឆាំងប្រទេសរុស្ស៊ីនឹងកំណត់គោលដៅលើ Sberbank ជាធនាគារឈានមុខគេរបស់ប្រទេសនេះដែលនឹងត្រូវបានដកចេញពីប្រព័ន្ធផ្ញើសារ Swift អន្តរជាតិ។
សហភាពអឺរ៉ុបបានហាមឃាត់ការនាំចូលធ្យូងថ្មពីប្រទេសរុស្ស៊ីរួចហើយប៉ុន្តែប្រទេសប៉ូឡូញ និងរដ្ឋបាល់ទិកបានអំពាវនាវឱ្យមានការហាមឃាត់លើប្រេងផងដែរ។
ការនាំចូលឧស្ម័នពីប្រទេសរុស្ស៊ីនឹងនៅតែមិនផ្លាស់ប្តូរឡើយដោយប្រទេសអាល្លឺម៉ង់ដែលពឹងផ្អែកយ៉ាងខ្លាំងសន្យាថានឹងផ្ដាច់ខ្លួនចេញជាបណ្ដើរៗពីឧស្ម័នប្រទេសរុស្ស៊ីត្រឹមពាក់កណ្តាលឆ្នាំ ២០២៤។
ការពឹងផ្អែកលើថាមពលរបស់ប្រទេសរុស្ស៊ីរបស់ប្រទេសដែលមានសេដ្ឋកិច្ចធំជាងគេរបស់អឺរ៉ុបមួយនេះត្រូវបានបង្ហាញថា ជាភាពខ្សោយមួយ ខណៈដែលសម្ព័ន្ធមិត្តរបស់ប្រទេសលោកខាងលិចកំពុងប្រញាប់ប្រញាល់ ក្នុងការដាក់ទណ្ឌកម្មលើលោកវ្ល៉ាឌីមៀរពូទីនប្រធានាធិបតីប្រទេសរុស្ស៊ី ដោយសារតែលោកប្រធានាធិបតីរូបនេះវាយប្រហារលើប្រទេសអ៊ុយក្រែន៕ LA