.jpg)
វិភាគដោយ៖ លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
តម្លៃមាសបានធ្លាក់ចុះកាលពីថ្ងៃអង្គារ ដោយបានខិតជិតដល់កម្រិតទាបបំផុត ចាប់តាំងពីពាក់កណ្តាលខែកុម្ភៈ ដោយសារការរំពឹងទុកនៃការដំឡើងអត្រាការប្រាក់ដោយធនាគារកណ្តាលសហរដ្ឋអាមេរិក និងស្ថានភាពល្អប្រសើរនៃរូបិយប័ណ្ណដែលបានធ្វើឱ្យទីផ្សារមាសធ្លាក់ចុះ។
សប្តាហ៍នេះតម្លៃមាសបានធ្លាក់ចុះយ៉ាងខ្លាំងពី ១ ៩៩៨ ចុះដល់ ១ ៨៦០ ដុល្លារ ក្នុង ១ អោនស៍។ គណៈកម្មាធិការទីផ្សារបើកចំហ ឬ Federal Open Market Committee (FOMC) របស់ធនាគារកណ្តាលអាមេរិក ឬ Federal Reserve (Fed) នឹងចាប់ផ្តើមកិច្ចប្រជុំរបស់ខ្លួនលើអត្រាការប្រាក់ ហើយវាត្រូវបានគេជឿជាក់ថា Fed នឹងដំឡើងអត្រាការប្រាក់សំខាន់ៗចំនួន ០,៥% ចំពេលអតិផរណាមានកម្រិតខ្ពស់បំផុតក្នុងរយៈពេល ៤០ ឆ្នាំ។
លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានលើកឡើងថា អត្រាការប្រាក់កាន់តែខ្ពស់នឹងដាក់សម្ពាធលើតម្លៃមាស។ តម្លៃមាសប្រឈមមុខនឹងហានិភ័យ ដោយបានធ្លាក់ចុះរយៈពេលខ្លីក្នុងចន្លោះពី ១ ៨១០ ទៅ ១ ៧៩០ ដុល្លារ។ ចំណែកប្រាក់ដុល្លារនៅតែស្ថិតនៅជិតកម្រិតខ្ពស់បំផុតក្នុងរយៈពេល ២០ ឆ្នាំចុងក្រោយនេះ ដែលធ្វើឱ្យទីផ្សារមាសមិនសូវទាក់ទាញវិនិយោគិនអន្តរជាតិ ខណៈដែលទិន្នផលរតនាគារគោលរយៈពេល ១០ ឆ្នាំ ស្ថិតក្នុងកម្រិត ៣% ជាលើកដំបូងចាប់តាំងពីខែធ្នូ ឆ្នាំ ២០១៨ ដែលជាកត្ដាចិត្ដសាស្ដ្រទីផ្សារដ៏សំខាន់មួយ។
តាមផ្នែកបច្ចេកទេស តម្លៃមាសកំពុងប្រែប្រួលក្នុងទិសដៅធ្លាក់ចុះនៅលើរបារប្រចាំថ្ងៃ។ ចំណុចតម្លៃខ្ពស់ទី ១ ត្រូវបានគេមើលឃើញនៅតម្លៃ ១ ៨៨៣ ដុល្លារ ហើយបន្ទាប់មកនៅតម្លៃ ១ ៩០០ ដុល្លារ។ សម្រាប់ចំណុចតម្លៃទាបទី ១ គឺនៅតម្លៃ ១ ៨៥៣,៤០ ដុល្លារ និងចំណុចបន្ទាប់នៅតម្លៃ ១ ៨០០ ដុល្លារ៕
