ភ្នំពេញៈ អគ្គនាយកដ្ឋានគយ និងរដ្ឋាករកម្ពុជារកចំណូលបានប្រមាណជិត ៨២០ លានដុល្លារក្នុងរយៈពេល ៤ ខែ ដើមឆ្នាំ ២០២២ ដែលទឹកប្រាក់នេះស្មើនឹងជាង ៣១ ភាគរយនៃផែនការកំណត់ ដោយច្បាប់ថវិកាជាតិឆ្នាំ ២០២២។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។
នៅក្នុងសន្និសីទសារព័ត៌មានដោយផ្ទាល់ និងតាមប្រព័ន្ធវីដេអូអនឡាញស្ដីពីវឌ្ឍនភាពនៃការអនុវត្តការប្រមូលពន្ធលើយានយន្តគ្មានពន្ធ និងអាករនាំចូលដែលមានស្រាប់ក្នុងប្រទេស លើកទី ៥ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានថ្លែងថា ក្នុងត្រីមាសទី ១ ឆ្នាំ ២០២២ អគ្គនាយកដ្ឋានគយ និងរដ្ឋាករកម្ពុជាប្រមូលចំណូលបានចំនួន ២៣,១៧ ភាគរយនៃផែនការកំណត់ដោយច្បាប់ គិតជាទឹកប្រាក់មានចំនួនជិត ៦០០ លានដុល្លារ។ ដោយឡែកក្នុងខែមេសាកន្លងទៅ គយប្រមូលចំណូលបានជាង ២២០ លានដុល្លារ លើសខែមីនាជាង ៥ លានដុល្លារ ដែលស្មើនឹង ៨,៥ ភាគរយនៃផែនការច្បាប់ថវិកា ឆ្នាំ ២០២២។
លោកបានបន្ថែមថា តាមផែនការកំណត់របស់អគ្គនាយកដ្ឋានគយ ការប្រមូលពន្ធត្រូវសម្រេចឱ្យបានជាង ២ ៤០០ លានដុល្លារនៅក្នុងឆ្នាំ ២០២២ នេះ។ លោកបន្តថា ចំណូលតាមផែនការដែលដាក់ចេញក្នុងឆ្នាំ ២០២២ នេះ ទាបជាងចំណូលតាមផែនការក្នុងឆ្នាំ ២០២១ បន្តិច ដោយសារការព្យាកររៀបចំផែនការនៅក្នុងកាលៈទេសៈកូវីដ ១៩ នេះមានការលំបាក។
លោកបញ្ជាក់ថា៖ «ការវិវឌ្ឍ ឬបច្ច័យដែលកើតឡើងដោយសារតែកូវីដ ១៩ នេះមិនអាចប៉ាន់ប្រមាណបាន។ ការរៀបចំផែនការសម្រាប់ឆ្នាំ ២០២៣ រៀបនឹងចេញដោយពឹងលើកត្តាបើកសេដ្ឋកិច្ចឡើងវិញក្រោយឆ្នាំ ២០២១ ដោយយល់ថា ឆ្នាំ ២០២២ នេះនឹងអាចងើបចេញពីកូវីដ ១៩ ប៉ុន្តែស្រាប់តែផ្ទុះសង្គ្រាមនៅអ៊ុយក្រែននាំឱ្យការព្យាករត្រូវប្រែប្រួល»។
ទោះបីយ៉ាងណា លោក គុណ ញឹម អះអាងថា ក្នុងឆ្នាំ ២០២២ នេះ អគ្គនាយកដ្ឋានគយនឹងខិតខំប្រឹងប្រែងអនុវត្តនូវអ្វីដែលមានចែងក្នុងផែនការសកម្មភាពប្រចាំឆ្នាំ និងអនុវត្តនូវយុទ្ធសាស្ដ្រកៀរគរចំណូលរយៈពេលមធ្យមរបស់រាជរដ្ឋាភិបាលផង។ បែបនេះក្ដីលោកថា សេដ្ឋកិច្ចកម្ពុជានឹងត្រូវពឹងផ្អែកលើសេដ្ឋកិច្ចក្នុងតំបន់ និងពិភពលោកផងដែរ។
អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ថា ចំណូលពន្ធគយ គឺជាប្រភពចំណូលមួយដ៏សំខាន់នៃថវិកាជាតិ ដូចនេះនៅក្នុងករណីដែលការប្រមូលចំណូលពន្ធគយមានការថយចុះ នោះច្បាស់ណាស់ វាអាចមានផលប៉ះពាល់ដល់ដំណើរការអភិវឌ្ឍសេដ្ឋកិច្ច ជាពិសេសថវិកាសម្រាប់ដោះស្រាយបញ្ហាចំពោះមុខដែលកើតឡើងដោយវិបត្តិកូវីដ ១៩។
លោកបញ្ជាក់ថា៖ «ចំណូលពន្ធគយនេះបានដើរតួនាទីយ៉ាងសំខាន់ក្នុងការទ្រទ្រង់ការចំណាយជាចរន្តរបស់រដ្ឋ។ ពេលណាចំណូលពន្ធគយមានកំណើននោះបង្ហាញថា ដំណើរការចេញចូលទំនិញចាប់ផ្តើមមានភាពប្រសើរឡើងវិញ។ យើងរំពឹងថា ក្រោយរដ្ឋាភិបាលសម្រេចបើកប្រទេសឡើងវិញ គួបផ្សំនឹងការជំរុញការនាំចេញតាមរយៈកិច្ចព្រមព្រៀងនានានឹងធ្វើឱ្យកំណើននៃការប្រមូលពន្ធគយ អាចគ្រប់គ្រាន់ ឬលើសផែនការនាឆ្នាំនេះ ដើម្បីរដ្ឋមានថវិកាគ្រប់គ្រាន់ សម្រាប់ការចំណាយនាឆ្នាំបន្តបន្ទាប់»។
យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជាក្នុងត្រីមាសទី ១ នៃឆ្នាំ ២០២២ អគ្គនាយកដ្ឋានគយ និងរដ្ឋាករកម្ពុជាប្រមូលចំណូលបាន ៥៩៧,៦ លានដុល្លារអាមេរិកកើនឡើង ២,៥ ភាគរយបើប្រៀបធៀបទៅនឹងរយៈពេលដូចគ្នាក្នុងឆ្នាំ ២០២១៕ LA