.jpg)
ហាងលក់អង្ករ ១ កន្លែង ក្នុងរាជធានីភ្នំពេញ។ ហេង ជីវ័ន
ភ្នំពេញៈ កម្ពុជានាំចេញស្រូវ និងអង្ករសម្រេចបានក្នុងតម្លៃទឹកប្រាក់សរុបជាង ៥១៦ លានដុល្លារទៅកាន់ទីផ្សារអន្តរជាតិគោលដៅសំខាន់ៗក្នុងរយៈពេល ៤ ខែដំបូងក្នុងឆ្នាំ ២០២២។
យោងតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជាបានឱ្យដឹងថា ចាប់ពីខែមករា ដល់មេសា ឆ្នាំ ២០២២ កម្ពុជាបាននាំចេញស្រូវ និងអង្ករមានតម្លៃទឹកប្រាក់សរុប ៥១៦,២១ លានដុល្លារ ដោយទឹកប្រាក់ជាង ១៣៩,៥៧ លានដុល្លារទទួលបានពីបរិមាណនាំចេញអង្ករមានចំនួន ២២១ ១៣៨ តោន កើនឡើង ១៤,៨៨ ភាគរយ និងនាំចេញស្រូវបានចំនួន ១ ៦៤៨ ៤៧៤ តោនដែលមានតម្លៃទឹកប្រាក់ សរុបមានចំនួន ៣៧៦,៦៤ លានដុល្លារ។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្តិ៍ថា ថ្វីដ្បិតតែបរិមាណនាំចេញអង្ករ មានកំណើនគួរសមក៏ពិតមែន ទាំងនៅត្រីមាសទី ១ និងក្នុងរយៈពេល ៤ ខែដើមឆ្នាំនេះ ប៉ុន្តែទឹកប្រាក់ទទួលបានគឺកើនឡើងតិចតួចដោយសារតម្លៃស្រូវធ្លាក់ចុះនៅដើមឆ្នាំ។
លោកបានបន្ថែមថា តម្លៃស្រូវនឹងមានភាពល្អប្រសើរមកវិញនៅត្រីមាសទី ២ ដោយតម្លៃអាចកើនឡើងប្រមាណ ១០ ភាគរយ ឬច្រើនជាងនេះ បើធៀបនឹងតម្លៃស្រូវនៅត្រីមាសទី ១ ដោយសារតែសម្ទុះនៃការបញ្ជាទិញច្រើន ជាពិសេសកំណើនទៅកាន់ប្រទេសចិន និងសហគមន៍អឺរ៉ុប។
លោកបានបញ្ជាក់ថា៖ «កំណើនទៅកាន់ប្រទេសចិន និងសហគមន៍អឺរ៉ុបនឹងហក់ឡើងខ្លាំងនៅក្នុងត្រីមាសទី ២ នេះ ហើយយើងនៅបន្តរក្សាកំណើននេះជាប់រហូត តាមសេចក្តីត្រូវការរបស់អ្នកបញ្ជាទិញ ដោយសារយើងមានស្រូវស្តុកទុក ជាពិសេសប្រភេទស្រូវដែលទីផ្សារមានតម្រូវការ។ ដូចនេះ យើងបន្តការកែច្នៃ នឹងនាំចេញទៅតាមតម្រូវការចិន និងអឺរ៉ុប»។
ទោះជាយ៉ាងណាក៏ដោយ លោកបញ្ជាក់ថា ការនាំចេញទៅទីផ្សារចិនហាក់មានឧបសគ្គខ្លះ ដោយការផ្ទុះរីករាលដាលនៃជំងឺកូវីដ ១៩ នៅក្នុងប្រទេសនេះជាថ្មីម្តងទៀត ដោយរដ្ឋាភិបាលចិនអនុវត្តវិធានការបិទខ្ទប់។
លោកបានអះអាងថា៖ «យើងមានបញ្ហាប្រឈម ដោយសារប្រទេសចិនមានការបិទខ្ទប់ ធ្វើឱ្យធាតុចូលកសិកម្មរួមមានជី និងថ្នាំកសិកម្ម រួមទាំងសម្បកវេចខ្ចប់ និងសម្ភារចាំបាច់ផ្សេងៗទៀតសម្រាប់ផ្គត់ផ្គង់ក្នុងចង្វាក់ផលិតកម្មមានការប៉ះពាល់។ ម្យ៉ាងវិញទៀត អាចប៉ះពាល់ដល់ទីផ្សារមួយចំនួននៅក្នុងតំបន់បិទខ្ទប់របស់ចិន ប៉ុន្តែបញ្ហានេះ មានត្រឹមរយៈពេលខ្លីប៉ុណ្ណោះ ខណៈដែលខាងសហព័ន្ធ នឹងពិភាក្សាជាមួយភាគីចិន ដើម្បីធ្វើយ៉ាងណាឱ្យការនាំចេញទៅទីផ្សារចិន មានភាពរលូន»។
លោក ហេង ផេង អ្នកនាំចេញអង្ករនៅស្រុកថ្មគោល ខេត្តបាត់ដំបងបានប្រាប់ឱ្យដឹងដែរថា ដើមឆ្នាំនេះ រោងម៉ាស៊ីនកិនស្រូវរបស់លោកប្រមូលទិញ និងកិនស្រូវលក់បានច្រើន រីឯតម្លៃក៏បានឡើងពីជាង ១ លានរៀល ដល់ ១,៣ លានរៀល ក្នុង ១ តោន។
លោកបញ្ជាក់ថា៖ «ជាទូទៅស្រូវនៅដើមឆ្នាំបែបនេះ តែងតែលក់បានថ្លៃ ដោយសារមិនមានអ្នកប្រមូលផលច្រើន។ ប៉ុន្តែតម្លៃអាចនឹងធ្លាក់ចុះបន្តិចមកវិញ នៅអំឡុងខែសីហាខាងមុខនេះ នៅពេលដែលកសិករប្រមូលផលបានច្រើនគ្នា»។
ក្រុមហ៊ុនចំនួន ៤៨ បាននាំចេញទៅកាន់គោលដៅចំនួន ៥៤ ប្រទេសក្នុងអំឡុងពេលនេះ។ កម្ពុជាបាននាំចេញអង្ករទៅកាន់ប្រទេសចិន និងតំបន់ស្វយ័តហុងកុង ម៉ាកាវបាន ចំនួន ១១៥ ២៥៥ តោនឈរនៅលេខរៀងទី ១ ឬស្មើនឹង ៥២,១២ ភាគរយ នៃការនាំចេញសរុប ដែលគិតជាទឹកប្រាក់មានចំនួន ៦២,៧៤ លានដុល្លារ ខណៈតំបន់អឺរ៉ុបមានបរិមាណ ៦៨ ៥៥៥ តោន ឬស្មើនឹង ៣១ ភាគរយ ទទួលបានទឹកប្រាក់ចំនួន ៥១,០២ លានដុល្លារ៕LA
វីដេអូ៖
