ភ្នំពេញៈ អាកាសយានដ្ឋានអន្តរជាតិទាំង ៣ របស់កម្ពុជាបានទទួលអ្នកដំណើរឆ្លងកាត់ជាង ១២ ម៉ឺននាក់ នៅក្នុងខែមេសា ឆ្នាំ ២០២២ កើនជាង ៥០០ ភាគរយបើធៀបនឹងរយៈពេលដូចគ្នាក្នុងឆ្នាំ ២០២១។
របាយការណ៍ពីរដ្ឋលេខាធិការដ្ឋានអាកាសចរស៊ីវិលបានបង្ហាញថា នៅក្នុងខែមេសា ឆ្នាំ ២០២២ ចំនួនអ្នកដំណើរឆ្លងកាត់អាកាសយានដ្ឋានអន្តរជាតិទាំង ៣ មានកំណើនខ្លាំងគួរឱ្យកត់សម្គាល់ ដោយបានទទួលអ្នកដំណើរឆ្លងកាត់ជាង ១២,៣ ម៉ឺននាក់កើនឡើងជាង ៥០០ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលមានអ្នកដំណើរត្រឹមតែជាង ១,៩ ម៉ឺននាក់។ ក្នុងនោះដែរ សម្រាប់ខែមេសា ឆ្នាំ ២០២២ មានជើងហោះហើរចំនួន ១ ៧១២ ជើង កើនឡើង ១១២ ភាគរយពីចំនួន ៨០៦ ជើង។
លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិលបានប្រាប់ភ្នំពេញប៉ុស្តិ៍នៅថ្ងៃទី ៩ ខែឧសភាថា ចាប់តាំងពីរដ្ឋាភិបាលប្រកាសបើកប្រទេសឡើងវិញមក ចំនួនជើងហោះហើរនៃអាកាសយានដ្ឋានទាំង ៣ គឺភ្នំពេញ សៀមរាប និងព្រះសីហនុ គិតត្រឹមខែមេសា ឆ្នាំ ២០២២ នេះ មានប្រមាណ ១៥ ភាគរយនៃជើងហោះហើរសរុបក្នុងឆ្នាំ ២០១៩។
លោកបន្តថា សម្រាប់អាកាសយានដ្ឋានអន្តរជាតិភ្នំពេញមានជើងហោះហើរប្រមាណ ២៤ ភាគរយនៃជើងហោះហើរសរុបរបស់អាកាសយានដ្ឋានអន្តរជាតិភ្នំពេញកាលពីឆ្នាំ ២០១៩។
លោកបានថ្លែងថា៖ «ចាប់តាំងពីបើកប្រទេសឡើងវិញមក យើងឃើញមានសញ្ញាណល្អច្រើនសម្រាប់វិស័យអាកាសចរណ៍។ យើងមើលឃើញថាផ្លូវហោះហើរ ដែលមានកំណើនច្រើនជាងគេ គឺភ្នំពេញ-បាងកក និងភ្នំពេញ-សិង្ហបុរី ដោយគិតមកដល់ខែមេសា ភ្នំពេញ-បាងកក មានជើងហោះហើរ ២៥ ជើងក្នុង ១ សប្តាហ៍ ដែលស្មើនឹង ៧០ ភាគរយនៃជើងហោះហើរភ្នំពេញ-បាងកកក្នុងឆ្នាំ ២០១៩។ ចំណែកពីភ្នំពេញ-សិង្ហបុរី កើនពី ៦ ជើងមក ១៩ ជើងក្នុង ១ សប្តាហ៍ ដែលស្មើ ៨០ ភាគរយនៃជើងហោះហើរភ្នំពេញ-សិង្ហបុរី ក្នុងឆ្នាំ ២០១៩។ គិតមកដល់ខែមេសានេះ អាកាសយានដ្ឋានអន្តរជាតិទាំង ៣ មានជើងហោះហើរជាង ២៥០ ជើងក្នុង ១ សប្តាហ៍»។
បើតាមអ្នកនាំពាក្យរូបនេះ បច្ចុប្បន្នមានក្រុមហ៊ុនអាកាសចរណ៍ប្រមាណជាង ២០ ក្រុមហ៊ុនដែលបានចាប់ផ្តើមបើកដំណើរការហោះហើរឡើងវិញ។
លោក ឡុង ឌីម៉ង់ អភិបាលរងខេត្តព្រះសីហនុបានឱ្យដឹងថា ជើងហោះហើរអន្តរជាតិ ដែលចេញចូលអាកាសយានដ្ឋានអន្តរជាតិកងកេងបានកើនឡើងគួរឱ្យកត់សម្គាល់ ខណៈចំនួនអ្នកដំណើរក៏មានកំណើនដូចគ្នា។
លោកបន្ថែមថា សម្រាប់ភ្ញៀវហោះហើរក្នុងស្រុក គឺមិនទាន់កើនឡើងទេ ដោយសារអ្នកដំណើរក្នុងស្រុកភាគច្រើនប្រើរថយន្តជាមធ្យោបាយ។
លោកបានបញ្ជាក់ថា៖ «យើងបានកត់សម្គាល់ឃើញថា ជើងហោះហើរអន្តរជាតិមកកាន់ខេត្តព្រះសីហនុកើនឡើងច្រើន ប៉ុន្តែជើងហោះហើរក្នុងស្រុកនៅមានកម្រិត។ ចំពោះភ្ញៀវទេសចរវិញ មិនថាថ្ងៃបុណ្យ ឬថ្ងៃចុងសប្តាហ៍ទេ ខេត្តព្រះសីហនុមានភ្ញៀវទេសចរទៅកម្សាន្តច្រើន។ ខ្ញុំរំពឹងថា ក្រោយផ្លូវល្បឿនលឿនដាក់ឱ្យដំណើរការនឹងជំរុញកំណើនទេសចរមកបន្ថែមទៀត ទាំងទេសចរលម្ហែកម្សាន្ត និងទេសចរវិនិយោគ»។
យោងតាមរដ្ឋលេខាធិការដ្ឋានអាកាសចរស៊ីវិល ក្នុងឆ្នាំ ២០២១ ចំនួនអ្នកដំណើរឆ្លងកាត់អាកាសយានដ្ឋានអន្តរជាតិទាំង ៣ មានចំនួនជិត ១០ ម៉ឺននាក់ ថយចុះជាង ៨៦ ភាគរយបើធៀបនឹងឆ្នាំ ២០២០៕ LA