The Phnom Penh Post Search

Search form




Logo of Phnom Penh Post newspaper Phnom Penh Post - CCC មានបំណង​ឱ្យ​វិនិយោគិន​អាមេរិក​ធ្វើដំណើរ​មក​កម្ពុជា​ដោយផ្ទាល់

CCC មានបំណង​ឱ្យ​វិនិយោគិន​អាមេរិក​ធ្វើដំណើរ​មក​កម្ពុជា​ដោយផ្ទាល់

Content image - Phnom Penh Post
ជំនួបពាណិជ្ជកម្មរវាងសមាជិកគណៈប្រតិភូសភាពាណិជ្ជកម្មកម្ពុជា និងក្រុមហ៊ុនអាមេរិកនៅទីក្រុងញូយ៉ក កាលពីថ្ងៃទី ៩ ឧសភា៊ រូបថត CCC

CCC មានបំណង​ឱ្យ​វិនិយោគិន​អាមេរិក​ធ្វើដំណើរ​មក​កម្ពុជា​ដោយផ្ទាល់

ភ្នំពេញៈ សភាពាណិជ្ជកម្ម​កម្ពុជា​ (CCC) បាន​លើក​ទឹកចិត្ត និង​ជំរុញ​ឱ្យ​ធុរជន​អាមេរិក​មក​បំពេញ​ទស្សនកិច្ច​ដោយផ្ទាល់​នៅ​កម្ពុជា ដើម្បី​ទាញយក​ប្រយោជន៍​អំពី​កាលានុវត្តភាព​នានា ពិសេស​សិក្សា​លទ្ធភាព​សហការគ្នា​ទៅលើ​វិស័យ​មាន​សក្តានុពល ដូចជា ពាណិជ្ជកម្ម​កសិកម្ម សេវាកម្ម សំណង់ និង​អចលនទ្រព្យ​។

នៅក្នុង​ជំនួប​ពាណិជ្ជកម្ម​រវាង​សមាជិក​គណៈប្រតិភូ​សភា​ពា​ណិជ្ជកម្ម​កម្ពុជា និង​ក្រុមហ៊ុន​អាមេរិក​ជាង​ ១០០ នៅ​ទីក្រុង​ញូវយ៉ក កាលពី​ថ្ងៃទី​ ៩ ឧសភា លោក គិត ម៉េង ប្រធានសភា​ពាណិជ្ជកម្ម​កម្ពុជា​បាន​ថ្លែងថា អាមេរិក គឺជា​ដៃគូ​ពាណិជ្ជកម្ម​ដ៏ធំ​របស់​ប្រទេស​កម្ពុជា ហើយ​ក្រុមហ៊ុន​ធំៗ​ជាច្រើន​របស់​អាមេរិក​ក៏​កំពុង​បណ្តាក់ទុន​នៅ​កម្ពុជា​ដែរ​។ លោក​បញ្ជាក់ថា​៖ «​ឆ្នាំ​ ២០២២ នេះ​កម្ពុជា​គឺជា​ប្រធាន​អាស៊ាន ហើយក៏​ជា​ឆ្នាំ​ដ៏​ប្រសើរ​ក្នុង​ការជំរុញ​ទំនាក់ទំនង​ទ្វេភាគី​រវាង​ប្រទេស​ទាំង​ ២ ​ឱ្យ​កាន់តែ​រឹងមាំ​ថែមទៀត​។ កម្ពុជា​ស្វាគមន៍​ធុរជន​អាមេរិក មក​បំពេញ​ទស្សនកិច្ច​ដោយផ្ទាល់​នៅ​កម្ពុជា​ដើម្បី​ទាញយក​ប្រយោជន៍​ពី​កាលានុវត្តភាព​ និង​សិក្សា​លទ្ធភាព​សហការ​គ្នា​ជាមួយ​ដៃគូ​កម្ពុជា​»​។

ក្នុងឱកាស​នៃ​ជំនួប​នេះ​ក្រុមហ៊ុន​នៃ​ប្រទេស​ទាំង​ ២​ ក៏បាន​ជជែក​ពិភាក្សា​ពី​គោលនយោបាយ​លើកទឹកចិត្ត​ចំពោះ​ការវិនិយោគ ស្ថានភាព​បច្ចុប្បន្ន​ក៏ដូចជា​តម្រូវការ​នានា​ក្នុង​វិស័យ​មួយចំនួន​ដូចជា សំណង់ និង​អចលនទ្រព្យ កសិកម្ម សេវាកម្ម និង​ពាណិជ្ជកម្ម​ជាដើម​។

លោក គី សេរីវឌ្ឍន៍ អ្នក​សេដ្ឋកិច្ច​នៃ​រាជបណ្ឌិត្យ​សភា​កម្ពុជា​បាន​ប្រាប់ថា ទំនាក់ទំនង​សេដ្ឋកិច្ច​រវាង​កម្ពុជា និង​អាមេរិក គឺមាន​ភាពល្អប្រសើរ​។ លោក​បញ្ជាក់ថា​៖ «​យើង​សង្ឃឹមថា​ដំណើរ​ទស្សនកិច្ច​នេះ​នឹង​ជួយ​ឱ្យ​ការធ្វើ​ពាណិជ្ជកម្ម​រវាង​កម្ពុជា និង​អាមេរិក​កាន់តែ​ប្រសើរ​ ១ ​កម្រិត​ទៀត​ដែល​អាច​ឈានដល់​ការចុះ​កិច្ចព្រមព្រៀង​ពាណិជ្ជកម្ម​សេរី​ជាមួយគ្នា​នាពេល​អនាគត​ផងដែរ​»​។

ប្រធាន​សមាគម​ស្បែកជើង​កម្ពុជា លោក លី ឃុនថៃ បានឱ្យដឹងថា ក្នុង​ត្រីមាស​ទី​ ១ ឆ្នាំ​ ២០២២ ការនាំចេញ​ផលិតផល​ស្បែកជើង​ទៅ​អាមេរិក​មាន​ទឹកប្រាក់​ប្រមាណ​ ១៥២ ​លាន​ដុល្លារ កើន​ជាង ៤៤ ​ភាគរយ បើ​ធៀប​នឹង​រយៈពេល​ដូចគ្នា​ឆ្នាំ​ ២០២១​។

លោក​និយាយថា​៖ «​យើង​រំពឹងថា ការនាំចេញ​ផលិតផល​ស្បែកជើង​ទៅ​ទីផ្សារ​អាមេរិក ក្នុងឆ្នាំនេះ និង​ឆ្នាំក្រោយ​នឹងមាន​សម្ទុះ​កើនឡើង​ថែមទៀត ក្រោយពី​ជំនួប​រវាង​ប្រតិភូ​សភាពាណិជ្ជកម្ម​កម្ពុជា និង​ក្រុមហ៊ុន​អាមេរិក​»​។

ក្នុងអំឡុងពេល​ទស្សនកិច្ច​នៅ​សហរដ្ឋអាមេរិក​ចាប់ពី​ថ្ងៃទី​ ៨-១៥ ខែឧសភា គណៈប្រតិភូ​នៃ​សភាពាណិជ្ជកម្ម​កម្ពុជា​នឹងចូលរួម​ព្រឹតិ្តការណ៍​ធុរកិច្ច​នានា​ជាច្រើន​ផងដែរ​។

កាលពី​ឆ្នាំ​ ២០២១ ការធ្វើ​ពាណិជ្ជកម្ម​រវាង​កម្ពុជា​-​អាមេរិក​មានទឹក​ប្រាក់​សរុប ៩ ១៥៩ ​លាន​ដុល្លារ កើនឡើង ៣២,៦១ ​ភាគរយ​ធៀប​នឹង​ឆ្នាំ​ ២០២០ ដែលមាន​ចំនួន ៦ ៩០៦,៣​ លាន​ដុល្លារ​។ ដោយ​ក្នុងនោះ​ការនាំ​ទំនិញ​កម្ពុជា​ទៅ​អាមេរិក មានតម្លៃ ៨ ៧៤៥,៣​ លាន​ដុល្លារ កើន ៣៣,២៦ ​ភាគរយ និង​ការនាំ​ទំនិញ​ពី​អាមេរិក​មក​កម្ពុជា មាន​ទឹកប្រាក់ ៤១៣,៧ ​លាន​ដុល្លារ​កើនឡើង ២០,២៩ ​ភាគរយ​។ នេះ​បើតាម​ការិយាល័យ​ជំរឿន​អាមេរិក​៕ LA

អត្ថបទគួរចាប់អារម្មណ៍