.jpg)
កម្មករលើកជ័រកៅស៊ូកកដាក់ថ្លឹងលក់ទៅឱ្យឈ្មួញនៅខេត្តរតនគិរី។ រូបថត រ៉ាស់ហ៊ីម
ភ្នំពេញៈ កម្ពុជាបាននាំចេញកៅស៊ូ និងផលិតផលធ្វើអំពីកៅស៊ូ ទឹកប្រាក់សរុបជិត ១៥០ លានដុល្លារ នារយៈពេល ៤ ខែដើមឆ្នាំ ២០២២ កើនជាង ១៦ ភាគរយបើធៀបនឹងរយៈពេលដូចគ្នាក្នុងឆ្នាំ ២០២១។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យបានបង្ហាញថា ការនាំចេញកៅស៊ូ និងផលិតផលធ្វើពីកៅស៊ូចាប់ពីខែមករាដល់ដំណាច់ខែមេសា ឆ្នាំ ២០២២ មានទឹកប្រាក់សរុប ១៤៩,៨០ លានដុល្លារ កើនឡើង ១៦,៥ ភាគរយ បើធៀបនឹងរយៈពេលដូចគ្នាឆ្នាំ ២០២១ ដែលមានចំនួន ១២៨,៥៨ លានដុល្លារ។ ចំនួនទឹកប្រាក់នៃការនាំចេញកៅស៊ូ និងផលិតផលធ្វើអំពីកៅស៊ូ គឺស្មើជិត ២ ភាគរយនៃការនាំទំនិញចេញសរុបរបស់កម្ពុជារយៈពេល ៤ ខែ ដែលមាន ៧ ៦០៦,៣ លានដុល្លារ។
ដោយឡែកសម្រាប់ខែមេសា ឆ្នាំ ២០២២ ការនាំចេញកៅស៊ូ និងផលិតផលធ្វើពីកៅស៊ូមានទឹកប្រាក់ ៣២,១១ លានដុល្លារ កើន ៧៣,៥ ភាគរយបើធៀបនឹងរយៈពេលដូចគ្នាឆ្នាំ ២០២១ ដែលមាន ១៨,៥ លានដុល្លារ។
លោក ហ៊ឹម អូន អគ្គនាយកនៃអគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍នៅក្នុងថ្ងៃទី ១២ ខែឧសភាថា ស្ថានភាពទីផ្សារនាំចេញកៅស៊ូ និងផលិតផលធ្វើអំពីកៅស៊ូពីកម្ពុជាទៅទីផ្សារអន្តរជាតិក្នុងរយៈពេល ៤ ខែ ដើមឆ្នាំ ២០២២ បានបង្ហាញពីសញ្ញាវិជ្ជមានគួរឱ្យកត់សម្គាល់។ លោកបន្តថា ជាក់ស្តែងបរិមាណការនាំចេញជ័រកៅស៊ូ និងឈើកៅស៊ូ (មិនគិតផលិតផលធ្វើអំពីកៅស៊ូ) ក្នុងអំឡុងពេល ៤ ខែ គឺមានចំនួន ៧៩ ៣៥៨ តោន កើនឡើង ២ ២២៣ តោន ស្មើនឹង ៣ ភាគរយ ធៀបរយៈពេលដូចគ្នាឆ្នាំ ២០២១។
លោកថ្លែងថា៖ «កត្តាដែលជំរុញឱ្យការនាំចេញកៅស៊ូ និងផលិតផលធ្វើអំពីកៅស៊ូកើនឡើង គឺមានដូចជា កត្តាតម្រូវការទីផ្សារអន្តរជាតិកើនឡើង, ភាពប្រសើរឡើងនៃកំណើនសេដ្ឋកិច្ចសកលនៅប្រទេសមួយចំនួន (ការគ្រប់គ្រងជំងឺកូវីដ ១៩ មានប្រសិទ្ធភាព), និងអាកាសធាតុអំណោយផលល្អដល់ការប្រមូលផល, ព្រមទាំងផ្ទៃដីត្រូវចៀរជ័រនៅកម្ពុជាកើនឡើងជាងឆ្នាំមុន»។
ទោះបីយ៉ាងណា លោក ហ៊ឹម អូន ប្រាប់ថា សម្រាប់តម្លៃជ័រកៅស៊ូគឺមិនកើនឡើងទេ ដោយរយៈពេល ៤ ខែ ដើមឆ្នាំ ២០២២ ជ័រកៅស៊ូ មានតម្លៃជាមធ្យម ១ ៦០៥ ដុល្លារ ក្នុង ១ តោន ថយចុះ ៦១ ដុល្លារបើធៀបនឹងរយៈពេលដូចគ្នាឆ្នាំ ២០២១។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា បញ្ហាទីផ្សារ និងតម្លៃបានធ្វើឱ្យការដាំដុះកៅស៊ូក្នុងរយៈពេលប៉ុន្មានឆ្នាំចុងក្រោយនេះមិនមានវឌ្ឍនភាពអ្វីគួរឱ្យកត់សម្គាល់ទេ។ ទោះជាយ៉ាងណា កំណើននៃការបើកដំណើរការរោងចក្រផលិតកៅស៊ូកង់រថយន្ត និងដំឡើងរថយន្តនៅកម្ពុជានាពេលថ្មីៗនឹងអាចជួយធ្វើឱ្យការដាំដុះ និងទីផ្សារកៅស៊ូមានភាពល្អប្រសើរឡើងវិញជាមិនខាន។
លោកប្រាប់ថា៖ «ដោយសារកន្លងមកផលិតផលកៅស៊ូពឹងផ្អែកតែទៅលើទីផ្សារអន្តរជាតិ ដូច្នេះបញ្ហាតម្លៃវាធ្វើឱ្យអ្នកវិនិយោគជួបបញ្ហាប្រឈមច្រើន។ នៅពេលមានរោងចក្រកែច្នៃក្នុងស្រុក ការដាំដុះ និងតម្លៃនឹងល្អប្រសើរជាងមុន»។
នៅកម្ពុជាបច្ចុប្បន្នមានផ្ទៃដីដាំកៅស៊ូសរុប ៤០៤ ០៤៤ ហិកតា ក្នុងនោះផ្ទៃដីកំពុងចៀរជ័រ ចំនួន ៣១០ ១៩៣ ហិកតា និងផ្ទៃដីថែទាំ ៩៣ ៨៥១ ហិកតា។
កាលពីឆ្នាំ ២០២១ កម្ពុជាប្រមូលផលជ័រកៅស៊ូបានចំនួន ៣៦៨ ០០០ តោន ក្នុងនោះនាំចេញទៅទីផ្សារអន្តរជាតិ ចំនួន ៣៦៦ ០០០ តោន ដោយប្រមូលចំណូលបាន ៦១០,២៥ លានដុល្លារ។ នេះបើតាមទិន្នន័យពីអគ្គនាយកដ្ឋានកៅស៊ូ៕ LA
វីដេអូ៖
