.jpg)
ភ្នំពេញៈ សមាគមទេសចរណ៍របស់ហ្វីលីពីនគ្រោងនឹងមកធ្វើ FAM Trip នៅកម្ពុជា នៅអំឡុងខែសីហាខាងមុខ ដើម្បីទស្សនាតំបន់ទេសចរណ៍សំខាន់ៗរបស់កម្ពុជា និងផ្សព្វផ្សាយទៅកាន់ទីភ្នាក់ងារទេសចរណ៍ និងប្រជាជនហ្វីលីពីន។
លោក សុខ សង្វារ អនុរដ្ឋលេខាធិការក្រសួងទេសចរណ៍ ដែលបានដឹកនាំប្រតិភូទៅរៀបចំកម្មវិធីផ្សព្វផ្សាយដំណើរទេសចរណ៍កម្ពុជាជាគោលដៅទេសចរណ៍ប្រកបដោយភាពកក់ក្តៅ សុវត្ថិភាព ស្អាត និងបៃតង នៅទីក្រុងម៉ានីល ប្រទេសហ្វីលីពីនកាលពីថ្ងៃទី ៣-៧ ខែឧសភា ឆ្នាំ ២០២២ បានប្រាប់ភ្នំពេញប៉ុស្តិ៍ថា កម្មវិធីផ្សព្វផ្សាយនេះទទួលបានការស្វាគមន៍យ៉ាងកក់ក្តៅពីបណ្តាក្រុមហ៊ុនភ្នាក់ងារទេសចរណ៍នៃប្រទេសហ្វីលីពីន ហើយភ្នាក់ងារទេសចរណ៍ហ្វីលីពីន និងក្រុមហ៊ុន Philippines Airlines ក៏បានឯកភាពនឹងជំរុញជើងហោះហើរត្រង់មកកម្ពុជាឡើងវិញនាពេលឆាប់ៗ។
លោកបញ្ជាក់ថា៖ «សមាគមទេសចរណ៍ហ្វីលីពីនគ្រោងនឹងមកធ្វើ FAM Trip នៅកម្ពុជា នៅអំឡុងខែសីហាខាងមុខ ដើម្បីទស្សនាតំបន់ទេសចរណ៍សំខាន់ៗរបស់កម្ពុជា និងផ្សព្វផ្សាយទៅកាន់ទីភ្នាក់ងារទេសចរណ៍ ក៏ដូចជាប្រជាជនហ្វីលីពីនផងដែរ»។
លោកបន្តថា មុនការរីករាលដាលនៃជំងឺកូវីដ ១៩ ក្រុមហ៊ុនអាកាសចរណ៍ហ្វីលីពីនចំនួន ២ ហោះហើរត្រង់មកកម្ពុជារួមមានក្រុមហ៊ុនអាកាសចរណ៍ Cebu Pacific ហោះហើរត្រង់ចេញពីម៉ានីល-សៀមរាប-ម៉ានីល ចំនួន ៥ ជើងក្នុង ១ សប្តាហ៍ និង Philippine Airlines បានបើកជើងហោះហើរត្រង់ទៅមក ម៉ានីល-ភ្នំពេញ-ម៉ានីល ចំនួន ៥ ជើង ក្នុង ១ សប្តាហ៍។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានឱ្យដឹងថា កម្មវិធីផ្សព្វផ្សាយគោលដៅទេសចរណ៍កម្ពុជានៅប្រទេសហ្វីលីពីននេះ មានក្រុមហ៊ុនឯកជនពាក់ព័ន្ធវិស័យទេសចរណ៍ប្រមាណ ១៥០ ក្រុមហ៊ុនបានចូលរួម។
លោកបានបន្ថែមថា ការផ្សព្វផ្សាយពីគោលដៅទេសចរណ៍កម្ពុជានៅក្នុងប្រទេសហ្វីលីពីននេះ ដោយសារ ហ្វីលីពីន ជាប្រទេសសមាជិកអាស៊ាន និងម្យ៉ាងទៀតក្នុងបរិបទនេះមានតែទីផ្សារទេសចរណ៍ក្នុងតំបន់អាស៊ានប៉ុណ្ណោះ ដែលអាចជួយស្តារឡើងវិញនូវផលប៉ះពាល់ពីវិបត្តិកូវីដ។
លោកប្រាប់ថា៖ «គណៈប្រតិភូរបស់ក្រសួងទេសចរណ៍ដែលទៅប្រទេសហ្វីលីពីនមានគោលដៅផ្សព្វផ្សាយពីទេសចរណ៍របស់កម្ពុជា។ បន្ទាប់ពីការផ្សព្វផ្សាយនេះ ក្រុមហ៊ុនទេសចរណ៍របស់ហ្វីលីពីននឹងរៀបចំកញ្ចប់ទស្សនកិច្ចមកកាន់កម្ពុជានៅក្នុងខែកក្កដា ឬសីហាខាងមុខនេះ»។
បើតាមលោក ស៊ីណាន ថ្វីដ្បិតតែកន្លងមក ទេសចរហ្វីលីពីនមកកម្ពុជាមិនមានច្រើនដូចថៃ ឬវៀតណាម ប៉ុន្តែប្រទេសនេះមានប្រជាជនច្រើន និងជាប្រទេសមានសក្តានុពលសម្រាប់ការទាក់ទាញទេសចរមកកម្ពុជា។
លោក ស៊ីន ចាន់សិរីវុត្ថា អ្នកនាំពាក្យអាកាសចរស៊ីវិលបានប្រាប់ថា លោកបានចូលរួមក្នុងកម្មវិធីផ្សព្វផ្សាយគោលដៅទេសចរណ៍កម្ពុជានៅប្រទេសហ្វីលីពីននេះ តាមរយៈប្រព័ន្ធវីដេអូ ដោយបានធ្វើបទបង្ហាញពីការតភ្ជាប់ជើងហោះហើររបស់កម្ពុជាជាមួយបណ្តាប្រទេសក្នុងតំបន់អាស៊ាន និងការវិវឌ្ឍថ្មីៗនៃចំនួនអ្នកដំណើរចូលមកកម្ពុជា។
លោកថ្លែងថា៖ «ដូចដែលយើងដឹងហើយថា រាជរដ្ឋាភិបាលកម្ពុជាបានបន្ធូរបន្ថយលក្ខខណ្ឌជាច្រើនដល់អ្នកដំណើរ ដែលមកកម្ពុជា ដូចជាការកាត់បន្ថយពេលនៃការធ្វើចត្តាឡីស័ក និងបានផ្សព្វផ្សាយពីកម្ពុជាជាគោលដៅទេសចរណ៍សុវត្ថិភាពផងដែរ ដើម្បីជំរុញទេសចរពីប្រទេសជាសមាជិកអាស៊ានមួយនេះបន្ថែមទៀត»។
លោកបន្ថែមថា កាលពីឆ្នាំ ២០២១ ប្រទេសហ្វីលីពីនមិនស្ថិតក្នុងចំណោមប្រទេសទាំង ១០ ដែលបានធ្វើដំណើរមកកម្ពុជាច្រើននោះទេ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ថា ហ្វីលីពីន ជាទីផ្សារធំដែរ សម្រាប់ទេសចរណ៍ក្នុងតំបន់អាស៊ាន ហើយកម្ពុជា និងហ្វីលីពីនក៏មានជើងហោះហើរត្រង់ជាមួយគ្នាដែរ។
លោកស្រីនិយាយថា៖ «បច្ចុប្បន្ន យើងមានជើងហោះហើរត្រង់ជាមួយខាងហ្វីលីពីន តែ ២ ដងក្នុង ១ សប្តាហ៍ មិនមានច្រើនដូចនៅអំឡុងមុនពេលកូវីដ ១៩ ឡើយ។ ដូចនេះ ការផ្សព្វផ្សាយគោលដៅទេសចរណ៍កម្ពុជានៅប្រទេសហ្វីលីពីន គឺជារឿងដ៏ល្អ ស្របពេលប្រទេសនេះកំពុងរៀបចំបើកប្រទេសខ្លួនពេញលេញឡើងវិញ»។
របាយការណ៍ពីក្រសួងទេសចរណ៍បង្ហាញថា ទេសចរហ្វីលីពីនមកកម្ពុជា នៅក្នុងឆ្នាំ ២០១៨ ចំនួន ៩២ ៤៥១ នាក់, ឆ្នាំ ២០១៩ ចំនួន ១០៥ ០១៧ នាក់, ឆ្នាំ២០២០ ចំនួន ១៤ ៧៦០ នាក់, ឆ្នាំ ២០២១ មាន ១ ៤៦២ នាក់។ ដោយឡែកទេសចរកម្ពុជាទៅប្រទេសហ្វីលីពីនកាលពីឆ្នាំ ២០១៨ មានចំនួន ៤ ១៥៤ នាក់, ឆ្នាំ ២០១៩ ចំនួន ៥ ៩៨៨ នាក់ (កើន ៤៤,១៥ ភាគរយបើ ធៀបនឹងឆ្នាំ ២០១៨)៕ LA
