.jpg)
រតនគិរីៈ ក្រសួងទេសចរណ៍ ជំរុញឱ្យមន្ទីរទេសចរណ៍រាជធានី-ខេត្ត អនុវត្តផែនការអភិវឌ្ឍន៍ទេសចរណ៍ឱ្យមានប្រសិទ្ធភាពខ្ពស់ ដើម្បីអភិវឌ្ឍន៍វិស័យទេសចរណ៍ក្នុងខេត្តប្រកបដោយនិរន្តរភាព ការទទួលខុសត្រូវ ការបែងចែកផលប្រយោជន៍ប្រកបដោយសមធម៌ និងលើកកម្ពស់ជីវភាពរស់នៅរបស់ប្រជាពលរដ្ឋ។
កាលពីថ្ងៃទី១២-១៣ ខែឧសភា ឆ្នាំ២០២២ ក្រសួងទេសចរណ៍បានធ្វើសិក្ខាសាលាផ្សព្វផ្សាយ ស្តីពី “លទ្ធផលការរៀបចំផែនការអភិវឌ្ឍន៍ទេសចរណ៍បច្ចុប្បន្នកម្ម ២០២១-២០២៥ រាជធានី-ខេត្ត” នៅខេត្តរតនគិរី ដើម្បីចែករំលែកបទពិសោធ និងយុទ្ធសាស្ត្រអភិវឌ្ឍន៍ទេសចរណ៍ថ្នាក់ក្រោមជាតិ ដល់មន្ត្រីនៃក្រសួងទេសចរណ៍ និងមន្ត្រីនៃមន្ទីរទេសចរណ៍រាជធានី-ខេត្ត ប្រមាណ១៥០នាក់។
លោក ម៉ែន ភារម្យ អគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានលើកឡើងថា សិក្ខាសាលានេះ នឹងរំលេចពីវិធីសាស្ត្រនៃការរៀបចំផែនការអភិវឌ្ឍន៍ទេសចរណ៍ ការដាក់ចុះនូវចក្ខុវិស័យ គោលបំណងនិងគោលដៅ និងសូចនាករអនុវត្តសកម្មភាព ដើម្បីអភិវឌ្ឍន៍វិស័យទេសចរណ៍ក្នុងខេត្តប្រកបដោយនិរន្តរភាព ការទទួលខុសត្រូវ ការបែងចែកផលប្រយោជន៍ប្រកបដោយសមធម៌ និងលើកកម្ពស់ជីវភាពរស់នៅរបស់ប្រជាពលរដ្ឋ ក្រោមកិច្ចសហការជាមួយមន្ទីរអង្គភាពពាក់ព័ន្ធ វិស័យឯកជន និងដៃគូរអភិវឌ្ឍន៍នានា។
លោកបានបញ្ជាក់ថា៖«វាពិតជាមានភាពចាំបាច់ក្នុងការកសាងផែនការអភិវឌ្ឍន៍ទេសចរណ៍ ដែលមានចែងក្នុងច្បាប់ស្តីពីទេសចរណ៍ ហើយការកសាងនេះនឹងក្លាយជាកូនសោ ដ៏សំខាន់ក្នុងការបើកផ្លូវការអភិវឌ្ឍវិស័យទេសចរណ៍ ដោយបង្កើតជាចក្ខុវិស័យច្បាស់លាស់ ភ្ជាប់ជាមួយផែនការ សកម្មភាពអនុវត្ត និងផែនការវិនិយោគទៅតាមសក្តានុពលតំបន់ និងខេត្តនីមួយៗ»។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ បានថ្លែងថា ក្រសួងទេសចរណ៍នឹងបន្តគាំទ្រដល់មន្ទីរទេសចរណ៍រាជធានី-ខេត្ត ក្នុងការអនុវត្តផែនការទាំងនេះ ដោយក្នុងនោះរាជធានី-ខេត្តចំនួន ២២ បានបញ្ចប់ផែនការអភិវឌ្ឍន៍ទេសចរណ៍ ៥ឆ្នាំរបស់ខ្លួន និងខេត្តចំនួន ៣ (សៀមរាប មណ្ឌលគិរី និងកែប) កំពុងអនុវត្តផែនការមេអភិវឌ្ឍន៍វិស័យទេសចរណ៍វិស័យទេសចរណ៍ ឆ្នាំ២០២១-២០៣៥។
លោកបានបញ្ជាក់ថា៖«ដើម្បីជំរុញការអភិវឌ្ឍវិស័យទេសចរណ៍តាមបណ្តារាជធានី-ខេត្ត នាយកដ្ឋានផែនការអភិវឌ្ឍន៍ទេសចរណ៍ នៃក្រសួងទេសចរណ៍ គ្រោងរៀបចំវគ្គបណ្តុះបណ្តាលពង្រឹងសមត្ថភាពមន្ត្រីមន្ទីរទេសចរណ៍នូវបច្ចេកទេសកសាងផែនការអភិវឌ្ឍន៍ទេសចរណ៍ និងយន្តការវាយតម្លៃសមិទ្ធកម្មពាក់កណ្តាលអាណត្តិ និងការវាយតម្លៃចុងក្រោយ»។
សិក្ខាសាលារយៈពេល២ថ្ងៃនេះ បានបែងចែកជា២ផ្នែករួមមាន៖ (១) បទពិសោធនៃការរៀបចំអភិវឌ្ឍន៍ទេសចរណ៍បច្ចុប្បន្នកម្ម២០២១-២០២៥ ធ្វើបទបង្ហាញដោយប្រធានមន្ទីរទេសចរណ៍ខេត្តរតនគិរី ស្ទឹងត្រែង កំពត និងបន្ទាយមានជ័យ ដោយចែករំលែកបទពិសោធពីនីតិវិធី និងដំណើរការនៃការរៀបចំនិងអនុម័តផែនការអភិវឌ្ឍន៍ទេសចរណ៍ និង(២) យន្តការគាំទ្រការរៀបចំផែនការអភិវឌ្ឍន៍ទេសចរណ៍ ធ្វើបទបង្ហាញដោយឯកឧត្តមប្រធាននាយកដ្ឋានស្ថិតិទេសចរណ៍ ប្រធាននាយកដ្ឋាននីតិកម្ម ក្រុមការងារបណ្តាញសង្គមក្រសួងទេសចរណ៍ និងបទបង្ហាញពីគោលការណែនាំស្តីពីការកសាងផែនការអភិវឌ្ឍន៍ទេសចរណ៍ ដោយមន្ត្រីជំនាញនាយកដ្ឋានផែនការអភិវឌ្ឍន៍ទេសចរណ៍ នៃក្រសួងទេសចរណ៍៕
