​រោងចក្រ​ផលិត​ចំណីអាហារ​របស់​ក្រុមហ៊ុន ស៊ី.ភី នៅក្នុង​ខេត្តកំពត​ឆ្លុះបញ្ចាំង​អំពី​ការប្តេជ្ញាចិត្ត​របស់ខ្លួន​ចំពោះ​ព្រះរាជាណាចក្រ​កម្ពុជា​

សម្តេចក្រឡាហោម ស ខេង អញ្ជើញកាត់ខ្សែបូក្នុងពិធីសម្ពោធរោងចក្រកែច្នៃអាហាររបស់ក្រុមហ៊ុនស៊ី.ភី។ រូបsupplied

ក្រុមហ៊ុន ស៊ី.ភី ខេមបូឌា ចំកាត់ នៅថ្ងៃព្រហស្បតិ៍ ទី ១២ ខែឧសភា បានបើកសម្ពោធរោងចក្រកែច្នៃចំណីអាហារថ្មីដ៏ទំនើបមួយនៅក្នុងខេត្តកំពត ខណៈក្រុមហ៊ុនកសិឧស្សាហកម្ម និងអាហារឈានមុខគេមួយនេះបានលើកកម្ពស់ស្តង់ដាផលិតកម្មម្ហូបអាហារនៅកម្ពុជា។

សម្ដេចក្រឡាហោម ស ខេង នាយករដ្ឋមន្ត្រីស្តីទីនៃរាជរដ្ឋាភិបាលកម្ពុជាបានអញ្ជើញជាអធិបតីក្នុងពិធីបើកសម្ពោធជាផ្លូវការនោះ រួមជាមួយវត្តមានរបស់ឯកឧត្តម ម៉ៅ ធនិន អភិបាលខេត្តកំពត និងគណៈគ្រប់គ្រងរបស់ក្រុមហ៊ុន ស៊ី.ភី ដែលដឹកនាំដោយលោក Preeda Chunwong អនុប្រធានក្រុមប្រឹក្សាភិបាល លោក Wittaya Kreangkriwit ក្រុមប្រឹក្សាភិបាលរងជាន់ខ្ពស់នៃក្រុមហ៊ុន ស៊ី.ភី ខេមបូឌា ចំកាត់ ឯកឧត្តម Panyarak Poolthup ឯកអគ្គរាជទូតនៃព្រះរាជាណាចក្រថៃប្រចាំនៅកម្ពុជា និងភ្ញៀវកិត្តិយសជាច្រើនរូបទៀត។

សម្ដេចក្រឡាហោម ស ខេង បានកោតសរសើរចំពោះការបង្កើតរោងចក្រថ្មី ដែលមានតម្លៃ ៥ លានដុល្លារ ទំហំ ៥ ហិកតា ស្ថិតនៅក្នុងស្រុកជុំគិរីនៃខេត្តកំពតនេះ និងមានបុគ្គលិកប្រហែល ១០០ នាក់ ដើម្បីផ្គត់ផ្គង់អាហារមានអនាម័យដល់ទីផ្សារកម្ពុជា បង្កើតការងារក៏ដូចគាំទ្រដល់សន្តិសុខស្បៀង។

«វត្តមានរបស់ ស៊ី.ភី ខេមបូឌា នៅកម្ពុជា បានរួមចំណែកក្នុងការផ្គត់ផ្គង់ផលិតផលចំណីអាហារក៏ដូចជាផលិតផលអាហារ ដែលមានអនាម័យ និងតម្លៃសមរម្យ។ ស៊ី.ភី កំពុងបង្កើតឱកាសការងារ និងជួយកាត់បន្ថយការធ្វើចំណាកស្រុក ខណៈការបង្កើតរោងចក្រកែច្នៃអាហារនេះកំពុងឆ្លើយតបទៅនឹងកង្វះផលិតកម្មចំណីអាហារ នៅក្នុងព្រះរាជាណាចក្រកម្ពុជា»។

សម្ដេចក្រឡាហោម ស ខេង បានបន្តថា៖ «សូមឱ្យក្រុមហ៊ុនជួយបន្តគាំទ្រ និងបង្កើតរោងចក្រផលិតចំណីអាហារបន្ថែមទូទាំងប្រទេស និងផ្ដល់បច្ចេកទេសចំណេះដឹងដល់ស្ថាប័ន ក្រសួងនានា ព្រមទាំងប្រជាជនផងដែរ»។

ឯកឧត្តម Panyarak Polthup

ក្រុមហ៊ុន ស៊ី.ភី បានឱ្យដឹងថា ការកើនឡើងនៃតម្រូវការម្ហូបអាហារនាពេលបច្ចុប្បន្ន ដោយសារកំណើនប្រជាជនស្របនឹងកំណើនសេដ្ឋកិច្ច បានជំរុញឱ្យក្រុមហ៊ុនកសិឧស្សាហកម្ម និងអាហារឈានមុខគេក្នុងពិភពលោកមួយនេះ បង្កើតរោងចក្រកែច្នៃម្ហូបអាហារនៅកម្ពុជា ជារោងចក្រមួយមានស្តង់ដាអន្តរជាតិខ្ពស់បំផុត។

«វាជាកិត្តិយសរបស់ក្រុមហ៊ុន Charoen Pokphand Food (CPF) ដែលបានបង្កើតរោងចក្រកែច្នៃអាហារនេះនៅខេត្តកំពត។ ដោយបានដំណើរការអាជីវកម្មកសិឧស្សាហកម្ម និងអាហារក្នុងប្រទេសថៃអស់រយៈពេលជាង ១០០ ឆ្នាំមកហើយនោះ ក្រុមហ៊ុន CPF មានចក្ខុវិស័យដើម្បីក្លាយជា «ផ្ទះបាយពិភពលោក»។

«យើងបានប្តេជ្ញាផ្តល់ផលិតផលប្រកបដោយគុណភាព អនាម័យ និងអាហារូបត្ថម្ភខ្ពស់ជាមួយនឹងទំនួលខុសត្រូវសង្គម និងការអភិវឌ្ឍប្រកបដោយចីរភាព។ យើងមានគោលបំណងផ្តល់ម្ហូបអាហារដែលមានស្តង់ដា អនាម័យ គុណភាពនឹងសុវត្តិភាពខ្ពស់ដល់ប្រជាជនកម្ពុជា ដោយផ្អែកលើការទទួលខុសត្រូវសង្គម និងបរិស្ថាន»។

លោក Wittaya ថ្លែងថា៖ «យើងមានទស្សនវិស័យក្នុងការធ្វើអាជីវកម្មដែលហៅថា «គោលការណ៍ប្រយោជន៍ទាំង ៣ ប្រការ ដើម្បីឆ្ពោះទៅកាន់និរន្តរភាព» ដោយចាត់ទុកផលប្រយោជន៍ដល់ប្រទេសជាតិ ជាអាទិភាពទី ១ ផលប្រយោជន៍ប្រជាជន ជាអាទិភាពទី ២ និងផលប្រយោជន៍ដល់ក្រុមហ៊ុន ជាអាទិភាពចុងក្រោយ»។

ក្រុមហ៊ុន ស៊ី.ភី ខេមបូឌា ចំកាត់ បានដំណើរការអាជីវកម្មកសិឧស្សាហកម្ម និងអាហារនៅប្រទេសកម្ពុជាជាង ២៦ ឆ្នាំហើយ ដោយបែងចែកអាជីវកម្មជា ៣ ប្រភេទ គឺអាជីវកម្មផលិតចំណីសត្វ អាជីវកម្មចិញ្ចឹមសត្វ និងអាជីវកម្មចំណីអាហារ។ ក្រុមហ៊ុនក៏បានបើកដំណើរការអាជីវកម្មហាងលក់រាយ និងហាងអាហារជាច្រើនដូចជា CP Fresh Mart, CP Fresh Shop, Five Star, និង Star Coffee ជាដើម។

ឯកឧត្តម Panyarak Poolthup ឯកអគ្គរាជទូតនៃព្រះរាជាណាចក្រថៃប្រចាំនៅរាជធានីភ្នំពេញបានមានប្រសាសន៍ថា ក្រុមហ៊ុន ស៊ី.ភី ខេមបូឌា ចំកាត់ គឺជាក្រុមហ៊ុន កសិឧស្សាហកម្ម និងអាហារឈានមុខគេមួយនៅក្នុងប្រទេស ថៃ ដែលបានសហការជាមួយរដ្ឋាភិបាលថៃរហូតមក។ ក្រុមហ៊ុន ស៊ី.ភី បានផ្តោតលើការអភិវឌ្ឍផលិតផលចំណីអាហាររបស់ប្រទេសថៃ ដែលមានការទទួលស្គាល់ពីអតិថិជនយ៉ាងច្រើន និងមនុស្សជុំវិញពិភពលោក។ នៅថ្ងៃនេះគឺជាឱកាសដ៏ល្អសម្រាប់ក្រុមហ៊ុន ស៊ី.ភី ជាចំណែកមួយនៃការ ជួយជ្រោមជ្រែងប្រទេសកម្ពុជាទាក់ទងនឹងការលើកកម្ពស់ស្តង់ដាឧស្សាហកម្មផលិតចំណីអាហារ និងអភិវឌ្ឍផលិតផលផ្នែកអាហាររបស់កម្ពុជាឱ្យមានការទទួលស្គាល់លើឆាកអន្តរជាតិផងដែរ។ ដូច្នេះរដ្ឋាភិបាលថៃមានឆន្ទៈក្នុងការជួយគាំទ្រក្នុងកិច្ចសហប្រតិបត្តិការពាក់ព័ន្ធផ្សេងៗ ដែលបានជួយពង្រឹងចំណងមិត្តភាពរវាងថៃ និងកម្ពុជាឱ្យកាន់តែមានភាពរឹងមាំយូរអង្វែង។

សម្តេចក្រឡាហោម ស ខេង អញ្ជើញទស្សនារោងចក្រកែច្នៃអាហារស៊ី.ភី។

លោក wittaya ថ្លែងថា៖ «គោលការណ៍សំខាន់ៗដើម្បីផលិតសាច់ឱ្យមានគុណភាពគឺត្រូវផ្តោតលើកត្តាចំនួន ៥ ដូចជា (១) សត្វត្រូវ មានសុខភាពល្អចេញពីកសិដ្ឋាន មានស្តង់ដា (២) គ្រប់គ្រងសត្វ កុំឱ្យមានសម្ពោធផ្លូវអារម្មណ៍ (៣) ទីកន្លែង និងឧបករណ៍ត្រូវស្អាត មានអនាម័យជានិច្ច (៤) ដំណើរការផលិតត្រូវមានស្តង់ដាត្រឹមត្រូវតាមគោលការណ៍សុខុមាលភាពសត្វ និង (៥) សាច់ត្រូវរក្សាទុកនៅក្នុងសីតុណ្ហភាពត្រជាក់។

ការប្ដេជ្ញាចិត្តរបស់ ស៊ី.ភី ក្នុងការផ្តល់អត្ថប្រយោជន៍ដល់ប្រជាជនកម្ពុជាក៏ឆ្លុះបញ្ចាំងតាមរយៈការចុះអនុស្សរណៈយោគយល់គ្នាជាមួយសាកលវិទ្យាល័យ ជា ស៊ីម កំចាយមា ផងដែរ។

លោក Wittaya មានប្រសាសន៍ថា៖ «សម្រាប់កិច្ចសហប្រតិបត្តិការជាមួយសាកលវិទ្យាល័យ ជា ស៊ីម កំចាយមានេះ ស៊ី.ភី ខេមបូឌា នឹងផ្ទេរបច្ចេកវិទ្យា និងចំណេះដឹងដល់និស្សិត និងផ្តល់ឱកាសការងារទាក់ទងនឹងវិស័យកសិឧស្សាហកម្ម និងអាជីវកម្មម្ហូបអាហារដល់ប្រជាជនកម្ពុជា»។

ក្រុមហ៊ុន CPF បានបណ្តាក់ទុនលើអាជីវកម្មផ្សេងៗជាង ១៦ ប្រទេស និងចែកចាយផលិតផលជាង ៤០ ប្រទេស ទូទាំងពិភពលោក។ ការផលិត និងផ្តល់ផលិតផល ព្រមទាំងសេវាកម្មទៅកាន់ ២៥ ខេត្តក្រុងទូទាំងប្រទេសកម្ពុជា និងមានបុគ្គលិកទាំងអស់ជាង ២ ០០០ នាក់ និងអតិថិជនជាង ១ ០០០ នាក់នៅគ្រប់ផ្នែកទាំងអស់។ ក្រុមហ៊ុន ស៊ី.ភី មានគម្រោងពង្រីករោងចក្រផលិតចំណីអាហារនៅកម្ពុជាចំនួន ៣ ទៀត ដែលមានគុណភាព សុវត្ថិភាព អនាម័យ ដើម្បីបំពេញតម្រូវការរបស់ប្រជាជនកម្ពុជានៅគ្រប់ទីកន្លែង។

«ស៊ីភី ខេមបូឌា ទៅថ្ងៃអនាគតនឹងបន្តផ្តោតលើការផ្តល់ផលិតផលអាហារូបត្ថម្ភដែលមានគុណភាពខ្ពស់ និងអនាម័យល្អរួមជាមួយនឹងទំនួលខុសត្រូវសង្គម និងការអភិវឌ្ឍប្រកបដោយចីរភាព»។ «ជាមួយនឹងរោងចក្រកែច្នៃអាហារថ្មីនេះ យើងអាចបង្រួមគម្លាតរវាងកសិករ និងអ្នកប្រើប្រាស់បន្ថែមទៀតជាមួយនឹងស្តង់ដាអន្តរជាតិខ្ពស់បំផុត។ ដំណើរការទាំងអស់នៅទីនេះនឹងបំពេញតាមស្តង់ដា ISO និង HACCP»។

លោក Wittaya មានប្រសាសន៍ទៀតថា៖ «ស៊ី.ភី ខេមបូឌា យកចិត្តទុកដាក់លើប្រជាជនកម្ពុជាទាំងសុខភាព និងអនាម័យ ហើយយើងជឿជាក់ថា អាហារល្អនឹងបំពេញអត្ថរសនៃជីវិត»៕

ព័ត៌មានថ្មីៗ

វីដេអូ