The Phnom Penh Post Search

Search form




Logo of Phnom Penh Post newspaper Phnom Penh Post - ផ្ទៃដី​ដាំ​ស្វាយចន្ទី​បាន​ធ្លាក់ចុះ​ជាង ១០​ ម៉ឺន​ហិកតា​នៅក្នុង​ឆ្នាំនេះ

ផ្ទៃដី​ដាំ​ស្វាយចន្ទី​បាន​ធ្លាក់ចុះ​ជាង ១០​ ម៉ឺន​ហិកតា​នៅក្នុង​ឆ្នាំនេះ

Content image - Phnom Penh Post
គ្រាប់ស្វាយចន្ទី​ដែល​ត្រូវបាន​ប្រជាកសិករ​ដាក់​ហាលថ្ងៃ​ឱ្យ​ស្ងួត​។ រូបថត រ៉ាស់ហ៊ីម

ផ្ទៃដី​ដាំ​ស្វាយចន្ទី​បាន​ធ្លាក់ចុះ​ជាង ១០​ ម៉ឺន​ហិកតា​នៅក្នុង​ឆ្នាំនេះ

ភ្នំពេញៈ ការថយចុះ​បរិមាណ តម្លៃ និង​គុណភាព​នៃ​គ្រាប់ស្វាយចន្ទី​នៅក្នុង​ឆ្នាំនេះ​បាន​ជំរុញ​ឱ្យ​កសិករ​កាប់​ដើម និង​ទុក​ស្វាយចន្ទី​ចោល​នៅលើ​ផ្ទៃដី​ជាង ១០ ​ម៉ឺន​ហិកតា​ក្នុងចំណោម​ផ្ទៃដី​ដាំដុះ​ស្វាយចន្ទី​សរុប ៨០ ​ម៉ឺន​ហិកតា​នៅ​ទូទាំងប្រទេស​កម្ពុជា​។

យោងតាម​ទិន្នន័យ​ដែល​សមាគម​ស្វាយចន្ទី​កម្ពុជា​ (​សសក​) ថត​តាមរយៈ​ផ្កាយរណប​កាលពី​ពេល​ថ្មីៗ​នេះ បង្ហាញថា ប្រទេស​កម្ពុជា​មាន​ផ្ទៃដី​ដាំ​ស្វាយចន្ទី​ប្រមាណ ៨០ ​ម៉ឺន​ហិកតា ប៉ុន្តែ​សម្រាប់​ទិន្នន័យ​ផ្លូវការ​មាន​ប្រមាណ​ត្រឹម ៤៩ ​ម៉ឺន​ហិកតា​ប៉ុណ្ណោះ​។ តាម​ការប៉ាន់ស្មាន​របស់ សសក ផ្ទៃដី​ដាំ​ស្វាយចន្ទី​នៅ​ទូទាំងប្រទេស​បាន​ថយចុះ​ជាង ១០​ ម៉ឺន​ហិកតា គិត​ត្រឹម​ដើមខែ​ឧសភា ឆ្នាំ​ ២០២២ ​នេះ​។

លោក អួន ស៊ីឡុត ប្រធាន​សមាគម​ស្វាយចន្ទី​កម្ពុជា​បាន​ប្រាប់​ភ្នំពេញ​ប៉ុស្តិ៍​ថា ស​សក នៅតែ​បន្ត​រក្សា​ទិន្នន័យ​ផ្លូវការ​ទំហំ​ដី​ដាំ​ស្វាយចន្ទី​ផ្លូវការ ៤៩ ​ម៉ឺន​ហិកតា​ដដែល ខណៈ​ផ្ទៃដី​ដាំ​ដុះ​ប្រហែល ៣០ ​ម៉ឺន​ហិកតា​ទៀត​ជា​ប្រភេទ​ផ្ទៃដី​ចម្ការ​ទ្រនាប់​។ សសក វាយតម្លៃថា ក្នុង​ឆ្នាំ​ ២០២២ នេះ​កម្ពុជា​អាច​នឹង​ផលិត​គ្រាប់ស្វាយចន្ទី​បាន​ចន្លោះ​ពី ៥៧-៦០​ ម៉ឺន​តោន ដោយសារ​តែ​វិបត្តិ​អាកាសធាតុ​។ លោក​បាន​បន្តថា ការវាយតម្លៃ​របស់ សសក កន្លងមក ទាំង​បរិមាណ និង​តម្លៃ ភាគច្រើន​គឺ​ត្រឹមត្រូវ ដោយសារ​សមាគម​ទទួល​ព័ត៌មាន​ពី​ទីផ្សារ​ពិភពលោក និង​ព័ត៌មាន​អាកាសធាតុ និង​បាន​ចុះ​ផ្ទាល់​ដល់​ចម្ការ​ទាំង ១០ ​ខេត្ត​គោលដៅ​។

លោក​បញ្ជាក់ថា​៖ «​កាលពី​ខែមករា ២០២២ យើង​វាយតម្លៃ​ទិន្នផល​ស្វាយចន្ទី​ធ្លាក់ចុះ ១០-៣០​ ភាគរយ ក្រោយមក​បាន​ធ្លាក់​រហូតដល់ ៥០ ​ភាគរយ​។ យើង​ដឹងថា មាន​ការ​ប្រែប្រួល​ខ្លាំងណាស់​លើ​ផ្ទៃដី​ដាំ​ស្វាយចន្ទី ដោយ​កសិករ​បាន​កាប់​ចោល​ច្រើនណាស់ ដូចជា​នៅ​ខាង​ព្រះវិហារ កំពង់ធំ និង​ស្ទឹងត្រែង​ជាដើម​។ ខេត្ត​ទាំងនេះ មាន​តំបន់​ខ្លះ​ដែលមាន​ដើម​នៅ​តូចៗ ហើយ​ត្រូវបាន​កសិករ​ភ្ជួរ​ចោល​ ដោយសារ​តែ​ការបាក់​ទឹកចិត្ត ព្រោះ​តម្លៃ និង​ទិន្នផល​មាន​ការ​ធ្លាក់ចុះ​»​។

បើតាម​ប្រធាន​សមាគម​ស្វាយចន្ទី​កម្ពុជា​រូបនេះ បញ្ហា​នេះ​នឹងធ្វើ​ឱ្យ​ប៉ះពាល់​ដល់​ការដាំដុះ​ស្វាយចន្ទី​នា​ឆ្នាំ​បន្តបន្ទាប់ ប៉ុន្តែ​មិន​ប៉ះពាល់​ខ្លាំងពេក​ទេ ដោយសារ​ស្វាយចន្ទី​ដែល​កាប់ ឬ​ភ្ជួរ​ចោល ភាគច្រើន​ជាដើម​ចាស់ និង​តូចៗ​ដែល​លូតលាស់​មិនសូវ​ល្អ​។

លោក ណុក ប៊ុនថន អ្នក​ដាំ​ស្វាយចន្ទី និង​ជា​ប្រធាន​សមាគម​ស្វាយចន្ទី​ប្រចាំខេត្ត​កំពង់ធំ​បាន​ប្រាប់​ឱ្យដឹងថា កសិករ​ដាំ​ដុះ​ចន្ទី​នៅ​ខេត្តកំពង់ធំ​មួយ​ចំនួន​បានសម្រេច​កាប់​ដើម​ចន្ទី​ចោល​ និង​ងាក​ទៅ​ដាំដុះ​ដំឡូងមី​វិញ​។

លោក​បញ្ជាក់ថា​៖ «​នៅ​ឆ្នាំនេះ​ក្រៅពី​ទិន្នផល​បាន​តិច ដោយសារ​បញ្ហា​អាកាសធាតុ ឈ្មួញកណ្តាល​ក៏បាន​ទម្លាក់​តម្លៃ​ពី​ជាង ៤ ០០០​ រៀល មក​ត្រឹម​ជាង ២០០០ ​រៀល​ក្នុង ​១​ គីឡូក្រាម​។ ចំណែកឯ​ជី​កសិកម្ម កម្លាំង​ពលកម្ម និង​ប្រេងឥន្ធនៈ​សុទ្ធតែ​ឡើងថ្លៃ ទើប​ជំរុញ​ឱ្យ​កសិករ​សម្រេចចិត្ត​កាប់​ដើម​ចោល ព្រោះ​បើ​ទុក​ទៀត​នឹង​ខាត​កាន់តែ​ធ្ងន់ធ្ងរ​។ យើង​បាន​ណែនាំ​ឱ្យ​សហការ​ជាមួយ​សមាគម​ស្វាយចន្ទី​កម្ពុជា​ ដើម្បី​ណែនាំ​ឱ្យ​គាត់​អត់ធ្មត់ និង​ប្រើប្រាស់​វិធីសាស្ត្រ​មួយចំនួន ​ដើម្បី​កាត់បន្ថយ​ការចំណាយ​»​។

ម្ចាស់​សិប្បកម្ម​កែច្នៃ​គ្រាប់ស្វាយចន្ទី ជ័យសំបូរ លោកស្រី អិន ឡៃហួត បាន​ប្រាប់ ភ្នំពេញ​ ប៉ុស្តិ៍​ ដែរ​ថា ការប្រមូលទិញ​គ្រាប់ស្វាយចន្ទី​ពី​កសិករ​បាន​ថយចុះ​នៅ​ឆ្នាំនេះ ដោយសារ​បញ្ហា​អាកាសធាតុ​។

លោកស្រី​បាន​បន្ថែមថា នៅ​ដើមខែ​មិថុនា​នេះ ក្រុមហ៊ុន​ជប៉ុន​នឹង​ចុះមក​ពិនិត្យ​នៅ​ដំណាក់កាល​ចុងក្រោយ ដើម្បី​ផ្តល់​វិញ្ញាបនបត្រ​នាំចេញ​គ្រាប់ស្វាយចន្ទី​ទៅ​ប្រទេស​ជប៉ុន ដោយ​ក្នុងករណី​ជោគជ័យ​អាច​នឹង​នាំទៅ​ចាប់ពី​ខែកក្កដា ឬ​សីហា​ខាងមុខ និង​អាច​ក្នុង​រង្វង់ ១០ ​តោន ក្នុង ​១​ ខែ​។

លោកស្រី​ប្រាប់ថា​៖ «​កន្លងទៅ​យើង​មានការ​បារម្ភ​ខ្លះ​ដែរ ខ្លាច​គ្រាប់​ស្វាយចន្ទី​មិន​គ្រប់​តាម​ការកំណត់​ជាមួយ​ក្រុមហ៊ុន​ជប៉ុន ប៉ុន្តែ​ក្រោយមក​យើង​បាន​ប្រាប់​ពី​ផលវិបាក​ចំពោះ​ការ​ថយចុះ​ទិន្នផល​គ្រាប់ស្វាយចន្ទី​ ដោយសារ​អាកាសធាតុ​ទើប​ខាង​ជប៉ុន​ផ្តល់​ការអនុគ្រោះ​ចំពោះ​បញ្ហា​នេះ​»​។

ទិន្នន័យ​ពី​ក្រសួង​កសិកកម្ម​បង្ហាញថា នៅ​ត្រីមាស​ទី​ ១ ឆ្នាំ​ ២០២២ ការនាំចេញ​គ្រាប់ស្វាយចន្ទី​ឆៅ​មាន​ចំនួន ២៧១ ៩៩៤,៤៨ ​តោន ថយចុះ​ចំនួន -៣៩,៦៧ ​ភាគរយ និង​គ្រាប់ស្វាយចន្ទី​កែច្នៃ ចំនួន ២១៣,៤១ ​តោន​កើនឡើង ៣១១,៨៣​ ភាគរយ​៕ LA

អត្ថបទគួរចាប់អារម្មណ៍