ភ្នំពេញៈ រដ្ឋាភិបាលកម្ពុជានឹងបោះផ្សាយមូលបត្របំណុលនៅក្នុងឆ្នាំ ២០២២ នេះដែលជាឧបករណ៍ហិរញ្ញវត្ថុថ្មីមួយទៀត ដើម្បីផ្តល់ជាជម្រើសដល់វិនិយោគិនក៏ដូចជាបើកលទ្ធភាពដល់រដ្ឋក្នុងការកៀរគរប្រភពទុនក្នុងស្រុក ដើម្បីអភិវឌ្ឍន៍សេដ្ឋកិច្ច។ នេះបើយោងតាមមន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងក្នុងសន្និសីទជាតិស្តីពីទីផ្សារមូលបត្រកម្ពុជា «១ ទសវត្សរ៍នៃការអភិវឌ្ឍទីផ្សារមូលបត្រកម្ពុជា និងដំណើរឆ្ពោះទៅមុខ»» កាលពីថ្ងៃទី ១៦ ខែឧសភា ឆ្នាំ ២០២២ ថា រាជរដ្ឋាភិបាលក៏គ្រោងនឹងចាប់ផ្ដើមបោះផ្សាយមូលបត្ររដ្ឋនៅក្នុងឆ្នាំ ២០២២ នេះដើម្បីបង្កើតនូវប្រភពហិរញ្ញប្បទានមួយថ្មី សម្រាប់ការកៀរគរទុនរបស់រដ្ឋក៏ដូចជាបង្កើតឧបករណ៍ហិរញ្ញវត្ថុថ្មីសម្រាប់វិនិយោគិននៅក្នុងទីផ្សារមូលបត្រ ជាពិសេសវិនិយោគិនស្ថាប័នដែលរួមមាន ធនាគារ ក្រុមហ៊ុនធានារ៉ាប់រង, មូលនិធិសោធននិវត្តន៍,មូលនិធិសន្តិសុខសង្គមជាដើម។
លោកថ្លែងថា៖ «ឧបករណ៍ហិរញ្ញវត្ថុថ្មីរំពឹងថានឹងទទួលការពេញនិយមសម្រាប់ការជួញដូរនៅផ្សារមូលបត្រកម្ពុជា និងផ្ដល់នូវទិន្នន័យ Benchmark សម្រាប់ការជួញដូរមូលបត្រសាជីវកម្ម និងការវិភាគហិរញ្ញវត្ថុនានាដូចត្រូវបានអនុវត្តនៅក្នុងប្រទេសដែលមានវិស័យមូលបត្ររីកចម្រើន»។
អគ្គនាយកនៃផ្សារមូលបត្រកម្ពុជា (CSX) លោក ហុង សុហួរ បាននិយាយថា ចាប់តាំងពីបើកដំណើរការជាផ្លូវការនៃផ្សារមូលបត្រកម្ពុជារយៈពេល ១០ ឆ្នាំមកនេះ CSX មានក្រុមហ៊ុនចុះបញ្ជីចំនួន ១៦។
លោកថ្លែងថា៖ «ដោយសារមានការលើកទឹកចិត្តផ្នែកពន្ធពីរដ្ឋាភិបាល និងកិច្ចសហការពីគ្រប់ភាគីពាក់ព័ន្ធ ផ្សារមូលបត្រយើងសម្រេចបានលទ្ធផលគួរជាទីមោទនៈដោយទីផ្សារយើងពិតមែនតែនៅមានទំហំតូច បើប្រៀបធៀបទៅនឹងប្រទេសជិតខាង តែទំហំជួញដូររបស់យើងបានកើនឡើងយ៉ាងខ្លាំងចាប់ពីឆ្នាំ ២០១៩ មក ដោយក្នុងឆ្នាំ ២០១៨ និងឆ្នាំមុនៗនោះទំហំជួញដូរប្រចាំថ្ងៃមានប្រមាណជាង ២ ម៉ឺនដុល្លារ ឬតិចជាងនេះ ហើយកើនដល់ប្រមាណជិត ១៦ ម៉ឺនដុល្លារនៅក្នុងឆ្នាំ ២០១៩ តែបានធ្លាក់ចុះបន្តិចមកត្រឹមជាង ១១ ម៉ឺនដុល្លារក្នុងឆ្នាំ ២០២០ ដោយសារតែការមកដល់នៃជំងឺកូវីដ ១៩»។
លោកបន្តថា ក្នុងឆ្នាំ ២០២១ ដោយសារប្រសិទ្ធភាពនៃការគ្រប់គ្រងស្ថានការណ៍បានល្អពីសំណាក់រដ្ឋាភិបាលបានធ្វើឱ្យទំហំជួញដូរបានកើនដល់ជាង ២៧ ម៉ឺនដុល្លារ។ ដោយឡែក ៤ ខែដើមឆ្នាំ ២០២២ នេះ ទំហំ ជួញដូរបានកើនដល់ជាង ១ លានដុល្លារក្នុង ១ ថ្ងៃ។
លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា (S-ERC) បានប្រាប់ថា SERC បានផ្តល់លេខអត្តសញ្ញាណវិនិយោគិនចំនួន ៣១ ៦៤០ ដែលក្នុងនោះវិនិយោគិនស្ត្រីចំនួន ៣៤ ភាគរយ និងវិនិយោគិនសញ្ជាតិខ្មែរ ៨៦ ភាគរយ។
លោកលើកឡើងថា៖ «ចំនួនវិនិយោគិនបានកើនឡើងយ៉ាងគំហុកក្នុងឆ្នាំ២០១៨ ដែលក្នុងឆ្នាំនោះ យើងបានផ្តល់លេខអត្តសញ្ញាណវិនិយោគិនចំនួន ១១៧១៤។ គិតត្រឹមថ្ងៃទី ១៣ ខែឧសភា ឆ្នាំ ២០២១ មានមូលធនូបនីយកម្មទីផ្សារ ៧ ភាគរយ ធៀបនឹងផលិតផលក្នុងស្រុកឆ្នាំ ២០២០»។
បើយោងតាមលោក អូន ព័ន្ធមុនីរ័ត្ន ផ្សារមូលបត្រកម្ពុជាត្រូវបានបង្កើតឡើងនៅក្រោមរូបភាពជាក្រុមហ៊ុនចម្រុះរដ្ឋរវាងរាជរដ្ឋាភិបាលកម្ពុជា ដែលតំណាងដោយក្រសួងសេដ្ឋកិច្ច និងហិរញ្ញវត្ថុ និងក្រុមហ៊ុនផ្សារមូលបត្រកូរ៉េនៅក្នុងឆ្នាំ ២០១០ និងបានបើកដំណើរការជួញដូរមូលបត្រជាលើកដំបូងនៅថ្ងៃទី ១៨ ខែមេសា ឆ្នាំ ២០១២ ជាមួយនឹងការចុះបញ្ជីជួញដូរមូលបត្ររបស់សហគ្រាសសាធារណៈចំនួន ១ គឺរដ្ឋាករទឹកស្វយ័តក្រុងភ្នំពេញ៕ LA