.jpg)
វិភាគដោយលោក៖ ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
តម្លៃប្រេងឆៅបានកើនឡើង ១៥% ពីកម្រិតទាបកាលពីសប្តាហ៍មុន ៩៨ ដុល្លារក្នុង ១ បារ៉ែលដល់កម្រិតខ្ពស់កាលពីថ្ងៃអង្គារ ១១៣ ដុល្លារ ខណៈដែលតម្រូវការដែលត្រូវបានរំពឹងទុកអាចនឹងកើន ដោយសារតែផែនការរបស់ទីក្រុងសៀងហៃក្នុងការបញ្ចប់ការបិទខ្ទប់ ដោយសារជំងឺកូវីដ ១៩ ត្រឹមខែមិថុនា និងការធ្លាក់ចុះជាសកលលើផលិតផលប្រេងសម្រេចបានជំរុញឱ្យមានការព្រួយបារម្ភអំពីការផ្គត់ផ្គង់នៅរដូវក្តៅ និងបន្តធ្វើឱ្យតម្លៃប្រេងឥន្ធនៈឡើងខ្ពស់។
យោងតាមគេហទំព័រ Theguardian.com ទីក្រុងស៊ាងហៃបានកំណត់ផែនការសម្រាប់ការវិលត្រឡប់នៃការរស់នៅតាមធម្មតាបន្ថែមទៀត ចាប់ពីថ្ងៃទី ០១ ខែមិថុនា និងការបញ្ចប់នៃការបិទខ្ទប់នៃជំងឺកូវីដ ១៩ ដែល មានរយៈពេលជាង ៦ សប្តាហ៍ ដែលបានរួមចំណែកដល់ការធ្លាក់ចុះយ៉ាងខ្លាំងនៃសកម្មភាពសេដ្ឋកិច្ចរបស់ប្រទេសចិន។ ទន្ទឹមនឹងនេះ US gasoline future បានឡើងដល់កំពូល គឺ ៤ ដុល្លារក្នុង ១ ហ្គាឡុងជាលើកដំបូងដែលមិនធ្លាប់មាន ខណៈដែលតម្លៃលក់រាយជាមធ្យមបានកើនឡើងដល់កំណត់ត្រាថ្មីមួយ។ ចំណែកអត្រាអតិផរណាប្រចាំឆ្នាំសម្រាប់សហរដ្ឋអាមេរិក គឺ ៨,៣% សម្រាប់រយៈពេល ១២ ខែ បញ្ចប់ក្នុងខែមេសា ឆ្នាំ ២០២២ បន្ទាប់ពីបានកើនឡើង ៨,៥%។
តម្លៃប្រេងសាំងបានកើនឡើង ៤៣,៦% ក្នុងរយៈពេល ១២ ខែ គិតត្រឹមខែមេសា ធៀបនឹងការកើនឡើងប្រចាំឆ្នាំ ៤៨,០% នៅក្នុងខែមីនា នេះបើយោងតាមទិន្នន័យអតិផរណាចុងក្រោយបំផុតដែលបានចេញផ្សាយនៅថ្ងៃទី ១១ ខែឧសភា ឆ្នាំ ២០២២។ តាមការវិភាគផ្នែកបច្ចេកទេសវិញ តម្លៃប្រេងស្ថិតក្នុងទិសដៅកើនឡើង ហើយអត្រាជួញដូរលើសពីតម្លៃក្នុងមួយម៉ោងជាមធ្យមក្នុងរយៈពេល ២០០ ថ្ងៃ ដូច្នេះវិនិយោគិនអាចពិចារណាជួញដូរប្រេងនៅតម្លៃ ១០៨,៥០ ដុល្លារ ដោយកំណត់មុខងារការពារហានិភ័យនៅតម្លៃ ១០៥ និងមុខងារទាញយកប្រាក់ចំណេញនៅតម្លៃ ១១៥ ដុល្លារ។
