ភ្នំពេញៈ កម្ពុជាជាប់ចំណាត់ថ្នាក់ទី ១ ក្នុងចំណោមប្រទេសអាស៊ានលើក្រុមហ៊ុននាំចេញឈានមុខគេទៅប្រទេសចិន កាលពីត្រីមាសទី ១ នៃឆ្នាំនេះ ដែលឆ្លុះបញ្ចាំងពីលទ្ធផលនៃការសម្រេចបានកិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេសទាំង ២។ នេះបើយោងតាមមន្ត្រីពាណិជ្ជកម្មចិន។
ថ្លែងក្នុងវេទិកាពាណិជ្ជកម្ម និងវិនិយោគរវាងប្រទេសចិន-កម្ពុជា ឆ្នាំ ២០២២ នាថ្ងៃទី ១៨ ខែឧសភាលោក Wu Guoquan អគ្គទីប្រឹក្សាពាណិជ្ជកម្មស្ថានទូតចិនប្រចាំកម្ពុជាបានឱ្យដឹងថា ក្នុងគ្រានៃការរីករាលដាលជំងឺកូវីដ ១៩ ក្រោមការណែនាំជាយុទ្ធសាស្ត្រ និងការលើកកម្ពស់ផ្ទាល់ខ្លួនរបស់មេដឹកនាំប្រទេសទាំង ២ កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសចិន និងកម្ពុជា បានបង្ហាញពីភាពធន់ដ៏រឹងមាំ និងសម្រេចបានការអភិវឌ្ឍគួរឱ្យកត់សម្គាល់។
លោកបន្តថា ក្នុងត្រីមាសទី ១ ឆ្នាំនេះ ទំហំពាណិជ្ជកម្មរវាងចិន និងកម្ពុជាបានកើនឡើងដល់ ៣,៧៥ ពាន់លានដុល្លារ កើនឡើង ៣៩,២ ភាគរយធៀបនឹងរយៈពេលដូចគ្នាឆ្នាំមុន ដោយជាប់ចំណាត់ថ្នាក់លេខ ១ ក្នុងចំណោមប្រទេសនៅអាស៊ាន។ ការវិនិយោគផ្ទាល់មិនមែនហិរញ្ញវត្ថុរបស់ប្រទេសចិននៅក្នុងប្រទេសកម្ពុជាមានចំនួន ២០៦ លានដុល្លារ កើន ៣៥,២ ភាគរយធៀបនឹងរយៈពេលដូចគ្នាកាលពីឆ្នាំមុន។ ការវិនិយោគរបស់កម្ពុជានៅប្រទេសចិនក្នុងត្រីមាសទី ១ បានកើនឡើងដល់ ២៤,៨៦ លានដុល្លារកើនឡើង ២៥៥ ភាគរយធៀបនឹងរយៈពេលដូចគ្នាកាលពីឆ្នាំមុន។
លោកបានថ្លែងថា៖ «គម្រោងសំខាន់ៗនៃគំនិតផ្តួចផ្តើម «ផ្លូវ និង ខ្សែក្រវាត់» ដែលភាគីទាំង ២ សាងសង់រួមគ្នាបានដំណើរការយ៉ាងរលូន ហើយការនាំចេញកសិផលកម្ពុជាទៅប្រទេសចិនបានកើនជាលំដាប់»។
លោកឱ្យដឹងថា ក្រោមបរិយាកាសគាំពារនិយមដែលកើនឡើងកាន់តែខ្លាំង ការធ្លាក់ចុះសេដ្ឋកិច្ចពិភពលោក និងទីផ្សារពិភពលោកដែលធ្លាក់ចុះ ប្រទេសចិន និងកម្ពុជាត្រូវតែបន្តទំនាក់ទំនងមិត្តភាព ដើម្បីបង្កើត «គំរូថ្មី និងកំណើនថ្មី» សម្រាប់កិច្ចសហប្រតិបត្តិការសេដ្ឋកិច្ច និងពាណិជ្ជកម្មប្រកបដោយប្រសិទ្ធភាព។
លោក Qian Keming អនុរដ្ឋមន្ត្រីក្រសួងពាណិជ្ជកម្មចិនបានថ្លែងតាមរយៈសន្និសីទវីដេអូពីទីក្រុងប៉េកាំងថា ចិននៅតែជាដៃគូពាណិជ្ជកម្មឈានមុខគេរបស់កម្ពុជា ហើយបានក្លាយជាគោលដៅនាំចេញអង្ករ និងចេកឈានមុខរបស់កម្ពុជា។
លោកលើកឡើងថា៖ «ដើម្បីទាញយកសក្តានុពលសម្រាប់កំណើនពាណិជ្ជកម្ម ប្រទេសចិនបានខិតខំនាំចូលផលិតផលកសិកម្មក្នុងតម្លៃ ១៥០ ពាន់លានដុល្លារពីអាស៊ានក្នុងរយៈពេល ៥ ឆ្នាំខាងមុខ ហើយមានឆន្ទៈក្នុងការធ្វើការងារជាមួយកម្ពុជា ដើម្បីជំរុញពាណិជ្ជកម្មដោយផ្ទាល់ ផ្នែកកសិកម្ម»។
លោក ស៊ាង ថៃ រដ្ឋលេខាធិការក្រសួងពាណិជ្ជកម្មកម្ពុជាដែលតំណាងឱ្យប្រទេសកម្ពុជានៅក្នុងវេទិកានេះបានឱ្យដឹងថា កម្ពុជាបានបន្តកិច្ចសហប្រតិបត្តិការជាមួយប្រទេសចិនលើបញ្ហាជាច្រើនដែលជាប់ទាក់ទងនឹងពាណិជ្ជកម្ម រួមទាំងការបង្កើតមជ្ឈមណ្ឌលពាណិជ្ជកម្មឯកជនកម្ពុជាចំនួន ៩ នៅទីក្រុងធំៗមួយចំនួនក្នុងប្រទេសចិន ដើម្បីលើកកម្ពស់ផលិតផលកម្ពុជាដែលមានសក្តានុពល។
លោកថ្លែងថា៖ «ថ្មីៗនេះយើងបានចុះហត្ថលេខាលើអនុស្សរណៈយោគយល់គ្នា ស្តីពីការពង្រឹងកិច្ចសហប្រតិបត្តិការជំរុញពាណិជ្ជកម្មរវាងអគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្មកម្ពុជា និងមន្ទីរពាណិជ្ជកម្មនៃតំបន់ស្វយ័តជនជាតិជាំងក្វាងស៊ី ក្នុងគោលបំណងជំរុញផលិតផលសក្តានុពលកម្ពុជាទៅទីផ្សារចិនក្នុងនោះក៏នឹងជំរុញការនាំចេញដំឡូងមីស្ងួតកម្ពុជា ៤០ ០០០ តោន ទៅប្រទេសចិន ក្នុងឆ្នាំ ២០២២-២០២៣ នេះ»។
លោកបន្ថែមថា ក្រោមក្របខ័ណ្ឌតំបន់ ភាគីទាំង ២ បានរួមបង្កើតកិច្ចព្រមព្រៀងពាណិជ្ជកម្មសេរីអាស៊ាន-ចិន និងជំរុញឱ្យសម្រេចបាននូវកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។ ក្រោមក្របខ័ណ្ឌទ្វេភាគី កម្ពុជា-ចិនបានចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិនកាលពីថ្ងៃទី ១២ ខែតុលាឆ្នាំ ២០២០៕ LA
វីដេអូ៖