ទីក្រុងកូនីកវីនធ័រ (Konigswinter) អាល្លឺម៉ង់ៈ ដៃគូ​ប្រទេស​ឧស្សាហកម្ម G7 បាន​ជួបប្រជុំគ្នា​កាលពី​ថ្ងៃ​ព្រហស្បតិ៍​ដោយ​សង្ឃឹម​ថានឹង​ស្វែងរក​ដំណោះស្រាយ​សម្រាប់​បញ្ហា​ថវិកា​របស់​ទីក្រុង​កៀវ (Kyiv) ខណៈ​ដែល​ការធ្លាក់ចុះ​ពី​ការឈ្លានពាន​របស់​រុស្ស៊ី​លើ​អ៊ុយក្រែន​បន្ត​ធ្វើឱ្យ​សេដ្ឋកិច្ច​ពិភពលោក​កាន់តែ​យ៉ាប់យ៉ឺន​។

រដ្ឋមន្ត្រី​ហិរញ្ញវត្ថុ​មកពី​ក្រុម​- ប្រទេស​ឧស្សាហកម្ម​ទាំង​ ៧​ កំពុង​ជួបពិភាក្សា​នៅ​ទីក្រុង Koenigswinter ភាគ​ខាងលិច​ប្រទេស​អាល្លឺម៉ង់ ដើម្បី​សម្របសម្រួល​ការឆ្លើយតប​របស់​ពួកគេ​។

លោកស្រី Janet Yellen រដ្ឋមន្ត្រី​ក្រសួង​រតនាគារ​សហរដ្ឋ​-​អាមេរិក បាន​និយាយ​នៅក្នុង​សុន្ទរកថា​នៅ​ទីក្រុង​ប្រ៊ុចសែល​កាលពី​ថ្ងៃ​អង្គារ​ថា​៖ «​ការគាំទ្រ​ទ្វេភាគី​និង​ពហុភាគី​ដែល​ប្រកាស​រហូតមក​ដល់ពេល​នេះ​នឹងមិន​គ្រប់គ្រាន់​ ដើម្បី​ដោះស្រាយ​តម្រូវការ​របស់​អ៊ុយក្រែន​ទេ ទោះបីជា​ក្នុង​រយៈពេល​ខ្លី​ក៏ដោយ​»​។

លោកស្រី Yellen ដែល​កំពុង​ចូលរួម​ក្នុង​កិច្ចប្រជុំ​នៅ​ទីក្រុង Koenigswinter បាន​អំពាវនាវ​ដល់ដៃ​គូ​សហរដ្ឋ​អាមេរិក​ឱ្យ «​ចូលរួម​ជាមួយ​យើង​ក្នុង​ការបង្កើន​ការគាំទ្រ​ផ្នែក​ហិរញ្ញវត្ថុ​របស់​ពួកគេ​» សម្រាប់​អ៊ុយក្រែន​ដែល​ពោរពេញ​ដោយ​សង្គ្រាម​។

សហរដ្ឋអាមេរិក​បាន​បន្ត​ដឹកមុខ​លើ​ការគាំទ្រ​ជាមួយ​នឹង​កញ្ចប់​ជំនួយ​ចំនួន ​៤០ ​ពាន់​លាន​ដុល្លារ (៣៨ ​ពាន់​លាន​អឺរ៉ូ​) ដើម្បី​បំពេញ​ទ្រព្យសម្បត្តិ និង​សេចក្តីត្រូវការ​ផ្នែក​យោធា​របស់​ទីក្រុង Kyiv​។

ប៉ុន្តែ​នៅក្នុង​ប្រទេស​អាមេរិក ដែល​ជា​ប្រទេស​មាន​សេដ្ឋកិច្ច​កំពូល​របស់​ពិភពលោក​ត្រូវ​ប្រឈមមុខ​នឹង​អតិផរណា​ដ៏ខ្ពស់​មិន​ធ្លាប់​ជួប​ក្នុង​រយៈពេល​ ៤០ ​ឆ្នាំ​កំពុង​បន្ត​កើនឡើង​ ខណៈ​ពេល​ដែលមាន​ការភ័យខ្លាច​ថា​ប្រទេស​នេះ​អាច​ឈានទៅរក​វិបត្តិ​សេដ្ឋកិច្ច​ទៀតផង​។

រឿងនេះ​គឺ​ស្រដៀង​គ្នា​នៅ​អឺរ៉ុប​ដែល​ការរំខាន​ដែល​ប៉ះពាល់​ដល់​ការផ្គត់ផ្គង់​វត្ថុធាតុដើម សមាសធាតុ និង​ទំនិញ​កសិកម្ម​បានធ្វើ​ឱ្យ​ទស្សនវិស័យ​សេដ្ឋកិច្ច​មាន​ភាព​ស្រអាប់​។

ការពឹងផ្អែក​យ៉ាងខ្លាំង​របស់​ប្រទេស​នានា​ក្នុង​ទ្វីបអឺរ៉ុប​លើ​ការ​នាំចូល​ថាមពល​របស់​រុស្ស៊ី​ក៏​បណ្តាល​ឲ្យ​ទ្វីប​នេះ​ប្រឈមមុខ​នឹង​ការកើនឡើង​តម្លៃ​ប្រេងឥន្ធនៈ​បន្ថែមទៀត ឬ​ការរំខាន​នានា​ដែល​អាច​កើតមាន​ចំពោះ​ការផ្គត់ផ្គង់​។

Christian Lindner រដ្ឋមន្ត្រី​ហិរញ្ញវត្ថុ​អាល្លឺម៉ង់​បាន​ប្រាប់​កាសែត German daily Die Welt នៅមុន​កិច្ចប្រជុំ​ថា ដៃគូ G7 ត្រូវតែ ​«​ធានា​នូវ​ដំណោះស្រាយ​ដល់​ប្រទេស​អ៊ុយក្រែន​ក្នុង​រង្វង់​ប៉ុន្មាន​ថ្ងៃ​បន្ទាប់ ឬ​ប៉ុន្មាន​សប្តាហ៍​បន្ទាប់​»​។

សង្គ្រាម​បាន​បង្ក​វិនាសកម្ម​ក្នុង​ហិរញ្ញវត្ថុ​របស់​អ៊ុយក្រែន ខណៈ​ដែល​ប្រាក់ចំណូល​ពន្ធ​បាន​ធ្លាក់ចុះ​យ៉ាងខ្លាំង ដែល​ទុកឱ្យ​អ៊ុយក្រែន​មានការ​ខ្វះខាត​ប្រហែល​ ៥ ​ពាន់​លាន​ដុល្លារ​ក្នុង​ ១ ​ខែ​។

ប្រភព​ស្និទ្ធ​នឹង​អ្នករៀបចំ​កិច្ចប្រជុំ​នៃ​ប្រទេស​ឧស្សាហកម្ម​ជឿនលឿន G7 បាន​និយាយថា កញ្ចប់​ជំនួយ​ប្រហែល ៧,៥ ​ពាន់​លាន​ដុល្លារ​អាមេរិក​ត្រូវបាន​បង្កើតឡើង​ ដើម្បី​ជួយ​ភ្ជិត​នៅក្នុង​ថវិកា​រដ្ឋាភិបាល​អ៊ុយក្រែន​ដែល​កំពុង​ទទួលរង​គ្រោះ​ ដោយសារ​សង្គ្រាម​ចាប់តាំងពី​ចុងខែ​កុម្ភៈ​មក​នោះ​។

នៅមុន​កិច្ចប្រជុំ​នៅ​ថ្ងៃ​ពុធ សហភាព​អឺរ៉ុប​ក៏បាន​ស្នើឱ្យ​បង្កើន​ជំនួយ​របស់ខ្លួន​ដល់​អ៊ុយក្រែន​រហូតដល់ ​៩ ​ពាន់​លាន​អឺរ៉ូ​។

ដោយ​ប្រកាស​អំពី​ការផ្តល់​មូលនិធិ​ថ្មី​នេះ ប្រធាន​គណៈកម្មការ​អឺរ៉ុប Ursula von der Leyen បាន​និយាយថា វា​ដល់​ពេលដែល​ត្រូវ​គិត​អំពី​ការកសាង​អ៊ុយក្រែន​ឡើងវិញ នៅពេល​ណា​ដែល​សង្គ្រាម​បានបញ្ចប់ ដោយ​បន្ថែមថា សហភាព​អឺរ៉ុប​មាន​ «​ផលប្រយោជន៍​ជា​យុទ្ធសាស្ត្រ​» ដើម្បី​គាំទ្រ​ដល់​កិច្ចខិតខំ​ប្រឹងប្រែង​នេះ​។

លោក Yellen បាន​និយាយ​នៅក្នុង​សន្និសីទ​សារព័ត៌​មាន​នៅ​ទីក្រុង Koenigswinter កាលពី​ថ្ងៃ​ពុធ​ថា ការពិភាក្សា​អំពី​របៀប​ផ្តល់​ហិរញ្ញប្បទាន​ដល់​ការកសាង​ឡើងវិញ​រយៈពេល​វែង​សម្រាប់​ប្រទេស​អ៊ុយក្រែន​គឺ​ «​ទើបតែ​ចាប់ផ្តើម​»​ទេ​៕ RR