ភ្នំពេញៈ ប្រតិបត្តិការទូទាត់ប្រាក់ពីការនាំចូល-នាំចេញទំនិញប្រមាណ ៩៣០ លានដុល្លារបានកើតឡើងក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) នៅក្នុងរយៈពេល ៤ ខែដើមឆ្នាំ ២០២២ កើនឡើង ៥០ ភាគរយបើធៀបនឹងរយៈពេលដូចគ្នាឆ្នាំ ២០២១។
ទិន្នន័យរបស់ SSEZ បង្ហាញថា ចាប់ពីខែមករា ដល់ខែមេសា ឆ្នាំ ២០២២ តំបន់សេដ្ឋកិច្ចក្រុងព្រះសីហនុបាននាំចូល-នាំចេញទំនិញក្នុងតម្លៃសរុប ៩៣០ លានដុល្លារ កើនពីចំនួន ៦២០ លានដុល្លារនារយៈពេលដូចគ្នាឆ្នាំ ២០២១ ដែលស្មើនឹងកំណើន ៥០ ភាគរយ។
SSEZ បានលើកឡើងថា៖ «កំណើនទឹកប្រាក់នាំចូល-នាំចេញទំនិញ និងសកម្មភាពផលិតកម្មនៅក្នុងតំបន់សេដ្ឋកិច្ចពិសេសក្រុងព្រះសីហនុ មិនត្រឹមតែធ្វើឱ្យមានស្ថិរភាពការងារប៉ុណ្ណោះទេ ប៉ុន្តែថែមទាំងបានចាក់បញ្ចូលសម្ទុះយ៉ាងរឹងមាំទៅក្នុងការអភិវឌ្ឍសេដ្ឋកិច្ចនៃខេត្តព្រះសីហនុថែមទៀតផង»។
អនុប្រធានសភាពាណិជ្ជកម្មកម្ពុជាលោក លឹម ហេង បានប្រាប់ភ្នំពេញប៉ុស្តិ៍កាលពីពេលថ្មីៗនេះថា ភាពអំណោយផលនៃទីតាំងភូមិសាស្ត្រនៅជិតកំពង់ផែសមុទ្រទឹកជ្រៅបានធ្វើឱ្យសកម្មភាពផលិតកម្ម និងការចូលទៅបណ្តាក់ទុនវិនិយោគថ្មីៗនៅទីនោះកើនឡើងជាបន្តបន្ទាប់។ លោកប្រាប់ទៀតថា ភាគច្រើននៃក្រុមហ៊ុននៅទីនោះ គឺមានម្ចាស់ជាវិនិយោគិនមកពីប្រទេសចិន។
លោកនិយាយថា៖ «បន្ថែមលើភាពអំណោយផលនៃទីតាំងភូមិសាស្ត្រ កត្តាច្បាប់វិនិយោគថ្មីដែលមានលក្ខណៈអំណោយផល និងភាពសម្បូរនៃកម្លាំងពលកម្ម និងការទទួលបានលក្ខខណ្ឌពិសេសនៅពេលនាំចេញទៅទីផ្សារប្រទេសធំៗបានធ្វើឱ្យចំនួនវិនិយោគិនដែលចង់មកវិនិយោគនៅកម្ពុជាកើនឡើងជាបន្តបន្ទាប់»។
អ្វីដែលជាការកត់សម្គាល់ថ្មីមួយទៀតរបស់លោក លឹម ហេង គឺការចូលមកបណ្តាក់ទុននៅកម្ពុជានៅពេលនេះ គឺមានលក្ខណៈចម្រុះលើគ្រប់វិស័យ។ ការវិនិយោគដែលមានលក្ខណៈចម្រុះកំពុងរួមចំណែកយ៉ាងសំខាន់ក្នុងការធ្វើឱ្យកំណើនសេដ្ឋកិច្ចកម្ពុជាកាន់តែមានភាពរឹងមាំ។
ក្នុងឆ្នាំ ២០២១ កន្លងមកទឹកប្រាក់នៃការនាំចូល-នាំចេញទំនិញរបស់ SSEZ មានសរុប ២ ២៣៤ លានដុល្លារ កើនឡើង ៤២,៧៥ ភាគរយបើធៀបនឹងឆ្នាំ ២០២០៕