.jpg)
លោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអះអាងថា ការដកប្រព័ន្ធអនុគ្រោះពន្ធ (EBA) របស់សហភាពអឺរ៉ុបមិនបានប៉ះពាល់ដល់ការនាំចេញរបស់កម្ពុជានោះទេ ខណៈឆ្នាំ ២០២១ ទំហំពាណិជ្ជកម្មកម្ពុជា និងសហភាពអឺរ៉ុបសម្រេចបានជាង ៤ ១៩០ លានដុល្លារអាមេរិកបើធៀបនឹងឆ្នាំ ២០២០ ដែលមានទំហំទឹកប្រាក់ប្រមាណ ៣ ៨៦៣ លានដុល្លារ។
ក្នុងឱកាសនៃជំនួបសំណេះសំណាលជាមួយប្រជាជនខ្មែររស់នៅសហគមន៍អឺរ៉ុបប្រមាណ ២ ១០០ នាក់ នាទីក្រុង Zurich ប្រទេសស្វ៊ីស កាលពីថ្ងៃទី ២១ ខែឧសភា លោក ហ៊ុន សែន បានលើកឡើងថា ការដកប្រព័ន្ធអនុគ្រោះពន្ធ (EBA) របស់សហភាពអឺរ៉ុប មិនបានធ្វើឱ្យប៉ះពាល់ដល់ការនាំចេញរបស់កម្ពុជាមកកាន់ទីផ្សារអឺរ៉ុបទេ ដោយទឹកប្រាក់នៃការនាំចេញទំនិញកម្ពុជាមកទីផ្សារអឺរ៉ុបមាន ៤ ១៩០ លានដុល្លារ។
លោកនាយករដ្ឋមន្ត្រីថ្លែងថា៖ «រឿង EBA វាមិនជាបញ្ហាទេ រឿងកូវីដបានជាបញ្ហា។ ការនាំចេញមានកំណើនរហូតរឿង EBA ចង់ដក ២០ ឬ ៣០ ស្រេចតែគេទៅ ចំណែកយើងនាំចេញចេះតែនាំចេញមក។ ខ្ញុំចង់ឱ្យសេដ្ឋកិច្ចយើងរឹងមាំ ព្រោះ EBA គង់តែដាច់ទេ គ្រាន់តែយូរហើយនិងឆាប់ឱ្យតែសេដ្ឋកិច្ចរបស់យើងឡើងដល់កម្រិតណាមួយហើយនោះ»។
បើតាមលោកនាយករដ្ឋមន្ត្រីវិស័យឧស្សាហកម្មកាត់ដេរ និងវាយនភណ្ឌក្នុងប្រទេសកម្ពុជាបាននិងកំពុងដំណើរការល្អ និងមានការកើនឡើង។ វិស័យនេះមិនត្រឹមតែមិនបិទទ្វារប៉ុណ្ណោះទេ ប៉ុន្តែថែមទាំងមានរោងចក្របើកថ្មីជាច្រើនផងដែរ ដោយសារតែមានតម្រូវការបញ្ជាទិញពីអាមេរិក និងអឺរ៉ុបកាន់តែខ្លាំង។ ជាមួយគ្នានេះ ក៏មានរោងចក្រប្រមាណ ៥០០ បានបន្ថែមម៉ោងធ្វើការ។ មកដល់ពេលនេះនៅសល់តែវិស័យទេសចរណ៍ប៉ុណ្ណោះដែលទទួលរងផលប៉ះពាល់ខ្លាំងពីការរីករាលដាលជំងឺកូវីដ ១៩។
បើតាមលោកនាយករដ្ឋមន្ត្រី ហ៊ុន សែន កម្ពុជាបាននាំចេញសម្ភារអគ្គិសនី សម្ភារសំណង់ រថយន្ត ជីកសិកម្ម ថ្នាំសម្លាប់សត្វល្អិត ផលិតផលឱសថ ទឹកបរិសុទ្ធ ដែក និងផលិតផលផ្សេងៗទៀតទៅកាន់ប្រទេសនៅតំបន់អឺរ៉ុប។
ពាក់ព័ន្ធនឹងបញ្ហាខាងលើ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម នៅថ្ងៃទី ២២ ឧសភា ឆ្នាំ ២០២២ មិនអាចទាក់ទងបានទេ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ភ្នំពេញ-ប៉ុស្តិ៍ថា ការដកប្រព័ន្ធអនុគ្រោះពន្ធ EBA របស់សហគមន៍អឺរ៉ុបមិនមានអ្វីប៉ះពាល់ខ្លាំងដល់ការនាំចេញពីកម្ពុជាទេ។ ការនាំចេញរបស់កម្ពុជានៅតែបន្តមានសកម្មភាពដដែល ដោយមានភាពបត់បែនសម្រាប់នាំទៅប្រទេសទាំងអស់នោះ។
លោកបានបន្តថា វិបត្តិជំងឺកូវីដ ១៩ គឺជាឱកាសសម្រាប់កម្ពុជា ដោយសារតែកម្ពុជាមានយុទ្ធសាស្ត្រវ៉ាក់សាំងដែលធ្វើឱ្យចំនួនរោងចក្រមានការកើនឡើងចំនួនជាង ៦៦៣ ដែលក្នុងនោះរោងចក្រប្រមាណ ២០ បានរត់ចេញពីប្រទេសមានហានិភ័យពីជំងឺកូវីដ និងបានបង្វែរទិសដៅមកកម្ពុជា។
លោកបញ្ជាក់ថា៖ «គេមកប្រទេសកម្ពុជាយើងនេះ គឺជាឱកាសមួយ និងជាសក្តានុពលសម្រាប់ផលិតកម្មរបស់កម្ពុជាក្នុងការនាំចេញទៅកាន់អឺរ៉ុប និងប្រទេសមួយចំនួនទៀតលើពិភពលោក»។
គណៈកម្មការអឺរ៉ុបបានចេញសេចក្តីសម្រេចមួយកាលពីថ្ងៃទី ១២ កុម្ភៈ ឆ្នាំ ២០២០ ដោយបានសម្រេចដកការលើកលែងពន្ធ ២០ ភាគរយតាមប្រព័ន្ធអនុគ្រោះពន្ធ EBA របស់អឺរ៉ុបចំពោះទំនិញនាំចេញពីកម្ពុជា ក្រោមហេតុផលកម្ពុជារំលោភសិទ្ធិមនុស្សធ្ងន់ធ្ងរ។ ទោះយ៉ាងណា គណៈកម្មការមួយនេះបានអះអាងថា ទ្វារចរចានៅតែបើកចំហសម្រាប់កម្ពុជាក្នុងការឈានទៅកែទម្រង់លើការរំលោភសិទ្ធិមនុស្ស ដើម្បីបានទទួលប្រព័ន្ធអនុគ្រោះ EBA ពេញលេញមកវិញ៕ LA
វីដេអូ៖
